Sa adlaw sa July 23, 2026, maoy adlaw sa ika-duha ka tuig nga kasumaran sa kamatayon ni Kaubang Ernesto Jude Rimando Jr nga usa ka maayong leader komunista sa Rebolusyonaryong Kalihokan sa mag-uuma ug mananagat sa Cebu. Gihamdum nato dili lang ang iyang kamatayon kundili gihandum nato ang iyang lig-ong paghupot sa proletaryadong rebolusyonaryong baruganan, panglantaw ug pamaagi nga maoy tatak sa matinud-anong komunista.

Sa kahinudoman, Si Ernesto Jude Rimando Jr, naila isip Bogs/Talong sa iyang mga higala didto sa Manila nga gipangulohang kabatan-onan, ug Ka Dante/Bing/Mon sa lapad nga masang mamumuo ug mag-uuma sa Cebu, Bohol, ug Negros.

Nailhan usab siya nga si Felipe Marcial, ang lider sa Kabataang Makabayan sa panahon sa Ikaduhang Bantugang Kalihukang Pagtul-id (IBKP), pagpatigbabaw sa malukpanong disoryentasyon sa kalihukang estudyante, pagbatok sa paksyunalismo, ug pag‐pabwelo sa kalihukang pagtuon ug pagpadasig sa kalihukang protesta niadtong dekada 1990.

Apil siya sa nanguna sa kalihukang pagtul-id batok sa pagsupak sa prinsipyong duha-ka-yugtong rebolusyon ug nasudnon demokratikong pakigbisog. Isip lider sa KM, nahimong daluyan siya sa pagtuki ug mga palisiya aron palig-onon ang han-ay sa kabatan-onan batok sa mga tigpanabotahe sa kalihukan.

Ilalum sa iyang pagpangulo, subling gipakusog ang mga tsapter sa KM sa han-ay sa kabatan-onan. Gipangulohan niya ang komiteng nagsumada sa kasinatian sa sektor niadtong 1994. “Alang kanako, mahukmanong aktitud kini sa pagtul-id tungod kay ang pinakadakung ambag sa rektipikasyon mao ang ibutyag ang mga kasinatian ug kritikal kining tukion,” matud niya.

Kapin duha ka dekadang milihok sa sektor sa kabatan-onang estudyante si Jude. Dinhi, naila siya isip usa ka kugihan ug mainantusong organisador. Gidayeg siya sa iyang mga magtutudlo sa Philippine Science High School, nga sa una nagtuong “bulakbol” tungod kay sagad siyang wala sa klase, tungod diay sa iyang pag-organisa. Mitungha siya sa University of the Philippines (UP) ug mikuha og kursong Mechanical Engineering aron ipadayon ang iyang mga tahas. Wala niya kini gihuman tungod gihatag na niya ang kaugalingon sa tibuok panahon sa rebolusyon sa edad nga 14 anyos matud sa iyang politikanhong rekord ug subay sa iyang pagpaambit.

Mitubag siya sa panawagan sa Partido alang sa pagpadala og mga proletaryadong kadre sa ubang rehiyon. Uban ang iyang unang asawa, nagpadeploy siya sa Central Visayas. Gikan 1998 hangtud 2016, milihok si Jude sa Cebu kung asa gituboy siya isip kagawad sa kalihiman sa rehiyunal nga komite sa Partido sa Central Visayas. Hugot niyang gisubaybayan ang kalihukang mamumuo sa isla, lakip ang malukpanong welga sa mga mamumuo sa Sulpicio Shipping niadtong 2002.

Pag-abot sa tuig 2012, gisubaybayan usab niya ang kalihokang welga sa mamumu-o sa mga pabrika sa Cebu nga gisuportahan usab sa rebolusyonaryong kalihokang mag-uuma ug mananagat.

Tuig 2017-2019, milihok si Jude sa Negros kung asa mibarog siya isip kagawad sa komiteng tigpatuman sa Partido sa isla. Gipangulohan niya ang mga pakigbisog sa mga mamumuong-panguma sa katubhan, lakip ang pagduso sa katungod sa kolektibong pag-ugmad sa yuta alang sa pagkaon.

“Tibuok kasingkasing niyang gihuptan ang mga responsibilidad nga gisangon kaniya. Kugihan siya sa pagtuon sa mga hisgutanang makuti ilabina sa pagpaasdang sa kontra-pyudal nga pakigbisog alang sa yuta,” pamahayag sa Pambansang Katipunan ng mga Magbubukid-Negros. “Alang kaniya, ang sakripisyo ug kalisdanan uban ang masang mag-uuma usa ka normal na panghitabo sa kinabuhi sa usa ka rebolusyonaryo.”

Tuig 2008 hangtud sa tuig 2011, nahimong Kalihim siya sa Regional Peasant Bureau diin iyang gipanguluhan ang rebolusyonaryong kalihokang mag-uuma ug mananagat sa Cebu.

“Nagkaila ug nagkaistorya kami niya tungod kay nahimong kolektibo usab namo si Ka Jude. Sa panahon sa pagpaambit niya sa IBKP didto sa Manila, iyang gipaambit kung unsa ka garapal si Popoy Lagman diin gikombinsi siya ni Popoy Lagman nga mokuyog sa “reject” sa IDKP, sa wala pa siya gikumbinsi ni Popoy gikasab-an pa siya tungod kay nganong wala mobarug sa pagsalikway(reject) sa IDKP ang Kabataang Makabayan, apan bisan sa pagpangasaba ni Popoy kaniya, kusganon kining mibarug sa IBKP tungod kay mao kini ang husto ug tukma alang sa pagkusog sa nasudnong demokratikong rebolusyon pinaagi sa malanatong gubat sa katawhan sa tibuok nasud” asoy ni Ka Luis sa Pambansang Katipunan ng mga Magbubukid-Cebu.

Subay dinhi , nahimong suod siya sa mga kauban sa RPB ug sa tibuok rebolusyonaryong mag-uuma ug mananagat sa Cebu. Gipangunahan niya ang usa ka tigum sa rebolusyonaryong kalihokang mag-uuma ug mananagat niadtong tuig 2006 aron tukion ug puntingon ang mga nahimong bara sa pagsulong sa rebolusyonaryong kalihokang mag-uuma sa Cebu.

Human sa tigum niadtong tuig 2006, iyang gipanguluhan ang kampanyang masa batok sa Oil exploration sa Cebu sama sa Japex ug NorAsia niadtong 2008. Sa Tuig 2011, gisubaybayan usab niya ang rebolusyonaryong pagsukol sa mag-uuma ug mananagat sa isang distrito sa Cebu.

“Sa among panagkuyog diha sa RPB, dako ang among naka-onan gikan kaniya ilabina sa sistematisasyon sa filing sa mga rebolusyonaryong basahon, pagkutlo sa mga prinsipyo isip giya sa pagsulbad sa mga praktikal nga suliran nga among nasugatan diha sa aktwal nga paglihok ug ubang pang gimbuhatong sa nataran sa ideolohiya, pulitika ug organisasyon alang sa pagpalig-ong sa Partido” dugang pamahayag ni Ka Luis sa PKM-Cebu.

Enero 2021, iligal nga giaresto si Ka Jude sa mga pwersa sa estado sa hinimuhimong kaso samtang nagpatambal sa Metro Manila. Ulahi na siyang gihatagan og atensyong medikal ug miabot sa stage 4 cancer ang iyang sakit sa atay. Bisan nakalaygay, kanunay anaa sa iyang hunahuna ang mga nabiyaan niyang gimbuhaton.

Sa ulahing pakighinabi kaniya, gisaysay niya ang maanindot nga pagtulun-an nga iyang nahibaloan sa iyang deka-dekadang pakigbisog. Kritikal usab niyang gituki ang iyang mga nahimong tampo. “Ang diyalektika sa rebolusyonaryong kinabuhi ingon niini gyud ka lagsik. Adunay kalipay sa mga pag-abante ug aduna usay kalisdanan. Mas lalum ang kalipay kung nabutang ka sa lisud kaayong sitwasyon pero nakaya nimo,” pagsumada niya.

Ang proletaryadong rebolusyonaryong kasinatian ni Ka Jude maoy naghatag og kadasig ug kalagsik sa rebolusyonaryong pagsukol sa mag-uuma ug mananagat Cebu batok sa pyudal ug alang-alang pyudal nga pagpahimulos sa mga agalong yutaan sa Cebu. Natin-aw usab niya ang agrarian rebolusyon maoy kasulbaran sa suliran sa yuta nga giatubang sa mag-uuma ug pagbungkag sa monopolyo sa kayutaan sa Cebu ug sa tibuok nasud.