Si Raquel Dahoyla Santillano, naila sa pangalan nga “Bok/Pon/Jelo” residente sa Cabadbaran, Agusan del Sur, 40 anyos ug may 5 ka anak. Usa siya ka iskolar sa Caraga State University ug kapin 20 ka tuig na kining nagserbisyo sa rebolusyonaryong kalihukan isip usa sa maayong mga kadre sa rehiyon sa North Central Mindanao.

Niadtong Septyembre 4, 2022 nagbyahe siya gikan sa Malaybalay City, Bukidnon paingon sa Lanao del Sur aron magpatsek-ap sa doktor. Niining tungora usab siya gipik-ap ug gidakop sa 1st Special Forces Battalion (1SFB) ug 51st Battalion kuyog ang Military Intelligence Battalion (MIB) didto sa Bumbaran, Lanao Sur. Gikan niining adlawa, na-missing na si Raquel sulod sa upat (4) ka adlaw ug may nakataho nga nakita siya niadtong Sept. 8, 2022 sa Valencia City, Bukidnon kuyog sa mga sundalo. Sa bag-ong mga balita, kasamtangan pa kining gigunitan sa 3rd Company sa 1SFBn sa Bukidnon.

Dili lalim ang presyur nga gihimo sa AFP ngadto kang Raquel sulod sa 4 ka adlaw sa pagdagit ug pagtago kaniya sa AFP. Ang pugos nga pagpaangkon kaniya nga nag-“voluntary surrender” kuno usa ka haw-ang nga paningkamot aron pahugnoon ang rebolusyonaryong morale ug detetminasyon sa mga rebolusyonaryong pwersa, alyado ug mga higala sa pagpadayon sa rebolusyonaryong armadong pakigbisog.

Gipanghimaraot ang bakak nga pamahayag ni Col. Ted Dumosmog, OIC sa 403Bde nga boluntaryong nagsurender si Raquel Dahoyla Santillano uban sa gikaingon nga 8 pa ka mga lider sa NPA didto sa Valencia City. Labaw pang walay kamatuoran ang giingong 6 ka armas nga nakuha kanila. Ang tinuod, napugos lamang sila paghimo-himo sa rasun tungod atol sa pagkadakop ni Raquel, diha-diha kining nabutyag tungod sa paningkamot sa mga kauban, higala, mga alyado ug nagpakabanang mga indibidwal ug organisasyon nga ma-surface siya. Sa ingon, pakyas ang 1SFBn ilalom sa pagpangulo ni Lt. Col. Roger Anthony Nuylan sa laraw niining padayong itago, iturtyor ug isalbeyds si Raquel sama sa nahitabo sa upat ka mga rebolusyonaryong kadre sa NCMR didto sa Talakag Bukidnon sa milabay’ng mga bulan.

Makauulaw ug hinungog ang pagdayeg ni Wilbur Mamawag sa 4ID sa kunohay naangkon nga “kalinaw” ubos sa Task Force ELCAC pinaagi sa gatusan ka mga surenderes ug mga armas sugod Enero 2022. Ang tinuod, usa lamang kini ka hugaw nga programa sa gobyerno. Biktima ang kadaghanan sa peke nga pagpasurender, mga sibilyan sa lokalidad nga pugos gipaangkon nga mga myembro sa NPA gamit ang mga hinipusan (savings) nila nga mga armas. Tungod kini, sa giilog-ilogan nga pabuya ug promosyon kung asa dakong pundo karon ang gibubo sa gobyerno sa NTF-ELCAC.

Ang gipanghinambog usab nga E-CLIP para kunohay sa bag-ong kinabuhi sa matag usa ka surenderee, usa ka buslot nga kaagian sa kurapsyon sa han-ay sa kasundalohan. Sa 60,000.00 matag usa ka surendere, sinsilyo lamang ang nadawat niini, anaa sa bulsa sa kasundalohan ang dakong kwarta. Busa, magsugnod lamang kini sa kaligutgot ug kasilag sa katawhan ilabina sa mga nabiktima. Dili kalikayan, sa gatusan nga inyong napasurender doble pa niini ang mosukol ug mogunit sa armas bunga sa pagpandaugdaog.

Giawhag ang mga higala, ilabina sa sektor sa simbahan ug unibersidad, sektor sa mamumuo ug mag-uuma nga singilon ang 1SFB, 51stIB ug MIB sa ilegal nga pag-aresto ug pagkawala ni Raquel Santillan sulod sa upat ka adlaw.