Hustisya Para kay Atty Ben Ramos kag iban pa nga Biktima sang Extra-judicial Killings!

Mabaskog nga ginakondenar sang LPC-NPA ang wala-kaluoy nga pagtiro-patay kay Atty. Benjamin Ramos pasado alas 10:00 sang gab-i, Nobyembre 6, 2018 sa Roxas Street, Brgy. 5, Kabankalan City.

Suno sa mga nakasaksi, 2 ka wala makilal-an nga mga armado kag riding in tandem ang mga suspetsado. Diin matapos ang paghimo sang krimen gilayon ang mga ini nga nagpalagyo sa wala mahibal-an nga direksyon.

Si Atty. Ben Ramos bantog nga human rights advocates, defenders kag maalam nga abogado. Mabuot kag wala sang kontra. Respetado kag palangga man sang mga mangunguma sa makatarunganon kag libre sini nga pagpanabang lamang legal nga maangkon sang nasambit nga sektor ang duta, palangabuhian kag hustisya sosyal.

Kilala man si Atty. Ramos sang kadam-an nga pumuluyo labi na sang sahing anakbalhas sa iya demokratiko, siyentipiko kag maki-imol nga prinsipyo kag panindugan.

Tungod sini, madamo sang mga pagpamahug kag pagpanghingabot sa iya kabuhi nga naagyan. Prior sang hitabo diin nag-utas sang iya kabuhi, biktima siya sang masunson nga surveilance sang indi makilal-an nga mga tawo sa iya puluy-an, opisina kag kon diin pa nga mga lugar nga iya ginakadtuan. Bangud sang kontra-terorismo kag “red tagging” nga padugi kag kampanya sang AFP, PNP kag sang US-Duterte nga rehimen, isa si Atty. Ben Ramos nga gina-akusar sang estado sa mga aktibista nga may angot sa CPP-NPA. Malisyuso nga ginhinambit ang iya pangalan kag ginpalapta ang kaugalingon nga dagway sini sa Moises Padilla, Negros Occidental upod sa mga dagway sang gina-alegar nga mga katapo sang “CNN” ukon CPP-NPA-NDF.

Pasistang AFP, PNP kag ang US-Duterte lamang ang may makinaryas kag ikasarang sa pagtiro-patay sa National Union of Peoples Lawyer (NUPL)- Secretary General Atty. Ben Ramos sandig sa sirkumstansya sang panghitabo antis nahimo ang krimen.

Nagasigahum ang NPA sang madasig nga imbestigasyon sa paghatag sang nagakaigo nga hustisya sa biktima dira sa Kabankalan PNP. Labaw sa tanan, ang pagpangibabaw sang kamatuoran sa mga kabutigan kag ang natabo nga pagpatay sa biktima indi na magdugang pa sa mga unsolved cases kaangay sa madamo na nga kaso sang extra-judicial killings sa pungsod.

Hustisya Para kay Atty Ben Ramos kag iban pa nga Biktima sang Extra-judicial Killings!