Mabaskog nga ginakundenar sang Mt. Cansermon Command-New People’s Army (MCC-NPA) ang brutal nga pagpatay kay Romeo V. Nanta ukon Ka Juanito Magbanua sa mga pasistang tropa sang 94th IB sa Sitio Medel, Brgy. Carabalan, Himamaylan City kagahapon, Oktubre 10, 2022, mga alas 5:45 sang hapon.

Hugot nga ginapanginwala sang MCC-NPA ang kabutigan nga ginawakal sang 303rd Brigade Commander nga si BGen. Pasaporte nga may nagluntad nga ikalima nga engkwentro sa tunga sang ila tropa kag sa pila ka katapo sang NPA. Indi ini matuod. Matapos nga natabo ang encounter sang Oktubre 06 sang aga, nagmaniobra na kag nakagwa na sang amo nga lugar ang bilog yunit sang NPA. Amo man gani nga may natabo nga liwat nga encounter sa Sitio Malangsa sang petsa 08 sang Oktubre sang nag-counter-offensive ang Pulang hangaway sa nagalagas nga tropa militar, kon sa diin walo ang kaswalidad sa tropa sang pasistang hubon.

Bangud sa kahimtangan sa ikaayong lawas, mas ginpili ni Ka JM nga magpabilin nalang sa lugar kag para man ma-monitor ang kahimtangan sang pumuluyo nga dako ang posibilidad atakihon sa pasistang militar. Gindakop siya kagahapon sang hapon kag wala sang duda nag-agi sang torture sa kaaway. Makabig na siya nga “hors de combat” ukon wala na sang ikasarang nga magbato.

Indi na katingalahan sa pasistang militar ang amo nga kondukta sa pakig-away bangud malaon na nga wala man gid sila nagasunod sa bisan anu nga laye sa tawhanon nga kinamatarung kaangay sang CARHRIHL. Napamatud-an na ini sa pila ka beses sa sini nga tuig sang nadakop sila Ka Carding kag Clea sang Marso, kasubong man sanday Ka Jack, Ka Chai, Ka Pernan kag Ka Kaloy sang Hunyo nga tanan nag-agi sa torture matapos gindakop kag sa ulihi ginpatay. Ikatatlo na ini nga insidente sang pagpamatay sang mga nadakop nila nga mga Pulang hangaway–bagay nga nagapakita sa ila ka desperado nga lutuson ang rebolusyonaryo nga kahublagan kag makatarunganon nga gyera nga ginalunsar sang NPA. Para sa AFP-PNP wala sang laye nga makatapna sang ila pagkaberdugo.

Ginakasubo sang bilog rebolusyonaryo nga pwersa ang natabo nga kamatayon ni Ka JM. Pero ini nga kamatayon mas magahatag pa sang inspirasyon sa bilog rebolusyonaryo nga hanay nga mas mangin determinado kag mangin resolbado pa nga ilunsar ang armado nga paghimakas paagi sa sinsin kag lapnagon nga inaway gerilya base sa nagadalom kag nagalapad nga baseng masa.

Ang bilog yunit sang MCC-NPA magapanikasog nga maangkon ang hustisya sa pagpatay kay Ka JM paagi sa paglunsar sang mga taktikal nga opensiba, rebolusyong agraryo kag pagtukod sg baseng masa.

Mabuhay si Ka Juanito Magbanua!