Lubos nga ginakondenar sang Pambansang Katipunan ng mga Magbubukid (PKM)-North Negros ang maduguon nga insidente sang pagpangluthang sang mga blueguards kag armado nga naka-sibilyan sa mga mamumugon sa kampo nga nagapahuway gikan sa pagtapas sang tubo sa Hda. Escolastica, Barangay Mabini, sa syudad sang Cadiz, Negros Occidental nga nagresulta sa pagkasamad sang pito ka mga obreros sadtong Septyembre 30, sang alas 9:00 sang aga.

Wala labot sini, ginpamahog, ginpangharvest sang mga blue guards ang ila tanum nga mais kag gin-arado ang pangpubliko nga alagyan sa lugar nga bayolasyon sa tawhanon nga kinamatarung sang benepisyaryo.

Sa gihapon ang kabangdanan sining hitabo amo ang inutil nga pagpatuman sang peke nga reporma sa duta sang ahensya sang reaksyonaryong gobyerno nga Department of Agrarian Reform (DAR).

Nagapakita ini sa isa ka paltik kag pakitang-tao nga programa kon sa diin ang tinutuyo sini amo ang pagpaniplang sang mga mangunguma.

Sadto pang 2023 ukon 22 na ka tuig ang pagproseso sang mga benepisyaryo sa idalum sang Comprehensive Agrarian Reform Program (CARP) sang 66 ka ektarya nga duta sang Hda Escolastica nga ginapanag-iyahan ni Lyndon Lim kag sang pamilya Zaldarriaga. Gin-isyuhan na sila sang DAR sang Certificate of Land Ownership Award (CLOA) kag Writ of Installation. Apang bisan nag-agi na sa proseso kag may pamatuod na ang benepisyaryo sa ila pagpusisyon sa duta, inutil ang DAR nga ipatuman ang ila desisyon batuk sa mapintas nga agalon mayduta.

Sa sining kaso kag kasubong man sa iban pa nga mga kaso, nagakunsabuhay ang DAR kag lokal nga gobyerno nga mapabilin sang agalon mayduta ang pagpanag-iya sa malapad nga kadutaan. Ginpalaum ang mga mamumugon sa kampo sa Hda Escolastica nga maangkon na nila ang 22 ka tuig nga ila ginhimakasan nga duta.

Tungod sa ila kaakig sa pagka-inutil sa amo nga laye, nag-inisyatiba sila nga ipatuman ang desisyon bisan pa sa peligro sa paggamit sang pasismo sang despotiko nga agalon mayduta batuk sa ila.

Ining insidente nagapakita sa kagaruk sa nagalungtad nga malapyudal nga sistema sa ekonomiya sa pangkabilogan. Nagapaathag man ini sa kakinahanglanon sang agraryo nga rebolusyon para bungkagon ang monopolyo sang duta kag wasakon ang pampulitikal nga gahum sa mga agalon mayduta paagi sa armadong paghimakas kag rebolusyonaryong kahublagan masa sa kaumhan.

Gani amon ginahangkat ang mga mangunguma kag mamumugon sa kampo sa Norte sang Negros nga hilwayon ang ila kaugalingon paagi sa pagpakigbahin sa armadong paghimakas kag magpatapo sa NPA, ang matuod nga hangaway sang banwa.

Samtang, tukuron ang mga tsapter sa mga likom nga organisasyon masa kaangay sang PKM, Kabataang Makabayan (KM), Makabayang Kilusan ng Bagong Kababaihan (MAKIBAKA) kag iban pa para matukod ang gobyerno sang pumuluyo agud pangapinan ang ila makasahing interes kag kinamatarung batuk sining mga mahimuslanon nga agalon may duta kag mapaniplang nga ahensya sang gobyerno.

Subong man, nagapakig-isa ang PKM-North Negros sa kawsa nga ginaduso sang Hda. Escolastica United Farmers Association kag ila kaisog nga pangapinan ang ila kinamatarung sa duta batuk sa kapintas sang pamilya Zaldarriaga kag Lyndon Lim kag ila paghangkat sa inutil nga DAR nga ipatuman ang ila desisyon. Nagapanawagan man sang hustisya ang PKM-North Negros sa pilason nga pito ka biktima. Kon indi mapatuman ang hustisya sang reaksyonaryong gobyerno, sa indi madugay malab-ot gid ang hustisya paagi sa rebolusyonaryong korte sang pumuluyo batuk sa mga despotiko nga agalon mayduta nga may utang nga dugo sa malapad nga mamumugon sa kampo.

Maghimakas, indi mahadlok!
Ipakigbato ang kinamatarung sang mga pigos kag ginahimuslan! Anihon ang masulhay nga buasdamlag paagi sa pagsulong sang demokratikong rebolusyon sang banwa!