Katkatawaan dagiti masa iti kaaw-awayan kadagiti inuulbod manen nga insarsarita ni Maj. Gen. Gulliver Señires, kumander ti 5th Infantry Division Philippine Army a nakabase iti Upi, Gamu, Isabela. Babaen iti interbyu a naisayangkat iti opisina ti Provincial Information Office (PIO)-Cagayan idi Setyembre 15, 2025, naimatangan dagiti kinaulbod iti likudan dagiti “isem aso” a panagis-isem ni Señires.

Umuna, ranggas-militar

Kinunana nga awanen panagtortyur. Nalawlawag pay ngem iti sirnaat ti init ti pammapatay kadagiti hors de combat wenno awanan kabaelan a lumaban a mannakigubat iti NPA sadiay Peñablanca Cagayan. Naimatangan daytoy kadagiti litrato a pakakitaan a nakaro ti panangtortyur kadakuada. Nakaro met lang a tortyur iti panunot dagiti umili ti kinaawan pilpilyen na a panagpaputok ken panagpabettak ti bomba kadagiti pagub-ubraan da nga asideg met laeng iti pagindegan da, nalawag a panaglabsing iti international humanitarian law. Saan a mabilang dagiti pammutbuteng nga ipapaay dagiti tropa ti 5ID kadagiti sibilyan tunggal agoperasyon da, uray ti presensya da laeng kadagiti baryo ket nakaro ti epekto na a sikolohikal ken buteng kadagiti residente. Nalatak ti panangiparit ken panangkontrol ti garaw dagiti masa nga agturong kadagiti pagubraan iti panawen ti operasyon. Tortyur iti panunot nu awan maisaang ken malappedan ti umili nga agsapul ti pagbiagan.

Maikadua, amnesty program

Katkatawaan laeng dagiti umili daytoy awan kaes-eskan na a prorama ta ammo da a pagkuartaan laeng met dagiti opisyales ti militar. Iti agdadata a datos basar met laeng ken Señires, addaan laeng nasurok tallo pulo (30) ti nagaplay, kaadduan pay kadagitoy ket ordinaryo a mannalon ken dagiti sumagmamano a nabayagen a nagbalin a sibilyan idi pay panawen ti 1990s. Agkamakam da nga agpasurender kadagiti sibilyan ta dakkel ti malikkab dagiti nangangato nga opisyales militar ti 5ID. Tunggal surenderi, makaibulsa da ti P60,000 gatad segun iti E-CLIP a para kuma kadagiti naallilaw ken napilit da a nagsurender.

Maikatlo, na-brainwash wenno naallilaw

Dagiti rebolusyonaryo ket saan a maawanan ti kinasirib. Tuluy-tuloy a pagad-adalan da ti kasasaad ti gimong a Pilipino. Napaneknekan da a ti malakolonyal ken malapyudal a gimong ket isu ti puon ken gapu ti kinarigat ti mayorya a bilang ti umili a Pilipino. Ken babaen laeng iti rebolusyonaryo nga armado a dangadang a marippuog ti dasig nga agari-ari tapnon maitakder ti pudpudno a gobyerno ti umili a mangipaay ti pudno a demokrasya ken wayawaya.

Ti kolonyal nga ideolohiya nga isu’t impasaknap ti imperyalismo nga US usar dagiti aso-aso a burukrata iti Pilipinas ti pudpudno a nangallilaw ti umili a Pilipino. Al-allilawen ken isissiasi dagiti institusyon ken pagadalan dagiti agtutubo iti kinapudno nu apay nga agrigrigat ti nalawa nga umili idinto ta napnuan kinabaknang ti Pilipinas. Nalawag kadagiti masa, NPA ken dadduma pay a rebolusyonaryo ti pagrebbengan nga riingen, organisaren ken patignayen ti umili tapno buraken ti kammali nga ideya ken pammati a nabayagen nga nangbulsek kadakuada iti nasurok sangagasut a tawen tapnon maaddaan ti baro a biag iti sidong ti itakder a sosyalista a gimong kalpasan a maagaw ti bileg kadagiti agari-ari a dasig.

Naiparangarang ti kinapudno iti naglabas a tignayan protesta ti nalawa nga umili iti intero a pagilian nga awan kredibilidad ti agdama a sistema a maipaay kadagiti umili ti kalikagum da a nasayaat a panagbiag. Iti rehiyon ti Cagayan Valley, awan buteng a dimmalluyon dagiti mannalon, mangmangged, tao ti simbaan, propesyunal ken reprep nga kabataan-estudyante kadagiti kalsada tapno iparang ti gura ken iyebkas dagiti disgusto laban iti bulok a sistema. Pakakitaan daytoy a saan a napunas ti rebolusyonaryo a tignayan iti rehiyon kas iti inuulbod a paduyakyak ti 5ID ken RTF-ELCAC.

Agbiag ti NPA-Cagayan Valley!
Agbiag dagiti Nalabbaga a mannakigubat!
Agbiag ti umili a lumablaban!