Ang sige og pagpagawas ug pabalik-balik nga pahayag susama sa bag-o lang gipahayag ni 3ID Commander Maj. Gen. Michael Samson nga wala nay aktibong larangang gerilya sa isla sa Negros, usa lang ka ilusyon ug pagtabon lamang kini sa kapakyasan sa mga reaksyonaryong tropa ni Marcos Jr sa pagpukan sa New People’s Army (NPA) ug sa tibuok rebolusyonaryong kalihukan.

Sukwahi sa pahayag ni Samson, nagpadayon pa gihapon nga naglihok ang liboan ka pwersa sa Armed Forces of the Philippines (AFP), Philippine National Police (PNP) ug ilang mga paramilitari sa kabukiran ug bisan sa kasyudaran.

Sa kabukiran, padayon nga gipailalum sa subsob nga militarisasyon ug okupasyon ang komunidad sa mga mangunguma pinaagi sa sustenido nga focused military operation sa mga baryo sa takuban sa Retooled Community Support Program (RCSP). Niini nga mga operasyon, walay mga larangan gerilya ang ilang napukan, hinuon mga inosenteng mag-uuma ang nangunang target sa pagpanumpo ug kabangis sa militar. Mimugna kini og grabeng kalapasan sa mga reaksyonaryong tropa batok sa tawhanong kinamatarung sa katawhan susama sa pagpamatay, pagpangdakop, paturagas nga pagpamusil, pagpanghulga, pagpangransak ug uban pa.

Sa kasyudaran, biktima man sa red-tagging ug pagpangsurbeylans ang mga organisador kag mga development workers sa mga non-government organization.

Dugang pa niini, gipatuman usab sa AFP/PNP ang bag-ong kampanyang kontra-insurhensya sa rehimen Marcos II nga mao ang National Action Plan for Unity, Peace and Development (NAP-UPD). Gipanghambog kini ni Marcos Jr nga plano para sa “kauswagan”. Apan, wala kini kinalahi sa National Task Force-Elcac nga gitukod ni kanhi Presidente Duterte. Gipadayon lamang gihapon niini ang todo gyera sa pagpanumpo batok sa katawhan.

Susama sa nangaging mga kampanyang kontra-insurhensya sa mga milabay nga rehimen, ang NAP-UPD walay laing kapadulngan kondili kapakyasan sa pagpukan sa Partido Komunista sa Pilipinas, sa NPA ug sa National Democratic Front of the Philippines (NDFP).

Kini nga pahayag ni Samson mas dugang nga naghatag og hagit sa mga Pulang manggugubat ilalom sa Leonardo Panaligan Command -New People’s Army (LPC-NPA) ug sa tanang mga rebolusyonaryo sa isla sa Negros nga padayong isulong ang gubat sa katawhan alang sa interes sa katawhang dinaug-daug sa mapahimuslanong sistema sa nasud. Kakuyog sa masa nga walay hunong nga nagsuporta sa NPA, padayon usab nga tungdan sa mga Pulang manggugubat ang ilang mga tahas hangtod makab-ot ang kalampusan.