Ginreport han Bagong Hukbong Bayan ha Northern Samar nga ginsirutan han usa katim han mga Pula nga mangaraway an usa nga aktibo nga impormer han militar nga responsable ha panmatay, pangilkil, pan-ngawat ngan iba pa nga krimen kontra ha katawhan.

Ginsering han Rodante Urtal Command (BHB-RUC) nga ginpatok han lokal nga yunit han BHB an sirot kamatayon kan Romil “Oming” Acebuche, 26, ha Barangay Geadgawan, Pambujan hadton August 22 dapit alas-9 han aga.

Kahuman imbestigaran an pira nga reklamo nga nakarawat hini tikang ha mga taghimaryo, nakit-an han BHB nga responsable hi Acebuche ha masunod nga krimen kontra ha masa:

o Aktibo nga kolaborasyon ha pasista nga militar. Nagserbe hiya komo impiltrador ngan ahente ha paniktik, nag-atentar nga ireyd an usa nga yunit han BHB, ginpirit an pira nga indibidwal nga “magsurender,” ngan nagkuha hin pira nga armas de fuego nga ginsurender niya ha kaaway kabalyo hin kwarta;

o Panmatay han mga sibilyan nga hira Halito Taco, Sales Galero, “Boranting” Lukban, ngan duha nga kabataan;

o Pamostura komo representante han rebolusyunaryo nga kagiusan agud mangilkil hin maabot ha P335,000 nga balor hin kwarta, pagkaon ngan iba pa nga katigayunan tikang ha masa;

o Pan-ngawat hin kahayupan sugad han karabaw, baktin ngan manok;

o Panarhug ngan panharas ha taghimaryo, nga nagdurot han ira dislokasyon ngan karinggal ha ira pakabuhi.

Dugang han yunit han BHB nga responsable hini nga aksyon militar, ginkakahadlukan ngan ginkukundenar han taghimaryo han Geadgawan hi Acebuche tungod ha destroso nga gindurot niya ha ira kinabuhi ngan pakabuhi.

“Usa nga porma han pagkab-ot han rebolusyunaryo nga hustisya an sirot nga ginpatok kan Acebuche ha ngaran han iya mga biktima ngan ira mga pamilya.

“Nagseserbe ini nga pahinumdom nga mayda rebolusyunaryo nga hustisya para ha nga mga aktibo nga nakikigkolaborar ha pasista nga militar, nagdudurot hin kahibangan ha masa, ngan nagdadara hin tarhug ha mga teritoryo han Demokratiko nga Gubyerno han Katawhan ha kabaryuhan.”