Ginpapanaugan sang silot kamatayon si Banong Fuentes sa Sityo Macarandan, Barangay Camindangan, Sipalay City, Negros Occidental, sadtong Disyembre 4, ala-1:00 sang hapon. Isa ka tim sang Armando Sumayang Jr Command-New People’s Army (ASJC-NPA) ang nagpatuman sa amo nga aksyon.

Si Fuentes isa ka masupog nga intel asset sang 15th IB nga imbolbado sa pagpareyd sa isa ka yunit sang NPA sa amo man nga studad sadtong Oktobre 2024. Magluwas sini, aktibo nga nagapaniktik si Fuentes sa hulag sang NPA sa iya nga lugar.

Ini nga pagsilot kamatayon kabahin sang pagpanukot sang ASJC-NPA sang hustisya. Bangud sa asud-asod kag gani nagapadayon nga pagpangnapak sa tawhanon nga kinamatarung, kaangid sa pagsunog sang balay kag pagpamahug sang kababaihan kag kabataan, indi mag-untat ang NPA sa iya kampanya nga sabton ang panawagan sang pumuluyo.

Bisan pa man sa maathag nga pagkagaruk sa nagaharing sistema sa nabuksas nga mga iskandalo sa korapsyon kag mismo pag-away-away sa nagaharing paksyon nga Marcos kontra Duterte, padayon nga nagapanghalit ang mga ahente sang pasismo nga AFP, PNP kag NTF-Elcac. Ini mismo ang kabangdanan ngaa indi bisan san-o kapatihan nga dyutay na lang ang NPA bangud sila nga mga pasistang reaksyonaryong pwersa mismo ang nagapangrekrut sa mga ginapigos kag ginahimuslan para magbato sa ila kinamatarung kag hustisya.

Mabantayan nga sa sini nga tuig, asud-asod ang paglunsar sang taktikal nga mga opensiba sang NPA indi lang sa larangan kon indi pati na sa bilog isla. Paandam ini sa mga traydor sang rebolusyon kag may mga krimen kag utang nga dugo nga lab-ton gid kamo sang sumbohan sang hustisya.

Sa pihak nga bahin, abierto man ang rebolusyonaryong kahublagan sang mga gustong magsungka nga wala pa sang mga mabug-at nga krimen agud mapasiguro ang ila kabuhi kag pangabuhian.