Madinalag-on nga gin-implementar sang isa ka tim sang mga Pulang hangaway sang Mt. Casermon Command-New People’s Army (MCC-NPA) ang silot kamatayon batok kay Diosdado “Dadoy” Apatan, kapin 60 anyos kag nagapuyo sa Sityo Gihubon, Barangay Amontay, Binalbagan, Negros Occidental kagapon, Oktubre 26, alas 6:00 sang aga.

Napamatud-an si Apatan nga aktibo nga aset sang paniktik sang Philippine Army humalin pa sadtong dekada 80 kag tubtob subong, aktibo man gihapon siya nga nagapaniktik kag nagagiya sa mga operasyon sang militar sa amo nga erya. Bantog man siya nga nagapanudlo sa mga residente nga kuno mga supporter sang NPA. Upod sa mga soldado, nagapanghalit man si Apatan sa mga pumuluyo paagi sa pagpamahug kag pagpangkastigo sa ila.

Bangud sini, si Apatan makabig nga lehitimo nga target militar sa rebolusyonaryo nga kahublagan kag ginhukman sang silot kamatayon.

Narekober kay Apatan ang isa ka .45 nga nubo nga armas, isa ka carbine kag isa ka shotgun kag mga bala sang sini nga mga armas. Ini nagapamatuod lamang nga siya isa ka armado kag peligroso nga elemento.

Napamatud-an man si Apatan sang rebolusyonaryo nga hukmanan sang pumuluyo sa kaso nga pagpatay kay Felipe Camingawan kag Amado Garson nga mga lunsay pumuluyo sa nasambit man nga lugar sang nagligad nga mga tinuig.

Isa ka daku nga halit kag sablag ang mga kontra-rebolusyonaryo kag malain nga elemento pareho kay Apatan para sa mga pumuluyo nga padayon nga nagahimakas para sa ila tawhanon nga kinamatarung kag hustisya sosyal sa tunga sang nagalala nga krisis sa ekonomiya kag pulitika sang pungsod.

Sa pagpamuno sang Communist Party of the Philippines (CPP) kag sa bulig sang ginapalangga nga matuod nga soldado sang pumuluyo, ang NPA, mas labi nga determinado ang pumuluyong pigos kag ginahimuslan nga lutoson ang sin-o ukon ano man nga mangin sablag sa dalan sang ila kahilwayan. Amo nga ang pagsilot kay Apatan isa ka daku nga kadalag-an para sa tanan nga rebolusyonaryo nga pwersa.

Gani, ginahangkat sang MCC-NPA ang tanan nga mga intel asset lakip ang mga surrenderees ilabina yadtong mga napilitan nga magsurender, nga magmuklat na sa kamatuoran nga ginagamit lamang kamo para sa interes sang mga dalagku nga agalon kag komprador burgesya nga nagapangkurakot kag nagapangawat sa dunang manggad kag kaban pangpubliko sang aton pungsod. Indi na kamo magpagamit pa sa mga reaksyonaryo kag bayaran nga AFP, PNP kag iban nga paramilitari nga grupo. Bukas kabubut-on ang rebolusyonaryo nga kahublagan sa inyo pagtampad kag pagbag-o.

Mabuhay ang CPP-NPA-NDF!
Mabuhay ang pumuluyong pigos kag ginahimuslan nga Pilipino!