Sa signipikante kag bulawanon nga okasyon sang ika-57 nga anibersaryo sang Communist Party of the Philippines (CPP), ang Komiteng Rehiyunal sang Partido Komunista sa Isla sang Negros (KRPIN), nagasaludo kag nagadayaw sa wala tupong nga kaisog kag determinasyon sang mga kadre, katapuan sang Partido, mga Pulang kumander kag hangaway sang banwa sang nagalig-on nga lima ka larangan gerilya sa idalom sang Apolinario Gatmaitan Command-New People’s Army Negros Island Regional Operations Command (AGC-NPA) kaupod sa mga tampad nga katapuan sang organisasyon masa sang National Democratic Front (NDF)-Negros (NDF-Negros), mga kaalyado, abyan, pigos kag ginahimuslan nga pumuluyong Negrosanon sa krusyal nga pagpakig-away kag paghimakas nga mapangibabawan ang mas mapintas nga kontra-rebolusyonaryong kampanya sang korap, inutil kag tuta nga rehimeng US-Marcos II.

Bug-os taguipusuon nga ginapasidunggan namon ang mga rebolusyonaryong martir paagi sa pagbayaw sang amon tuo nga inumol sa pagkilala kag pagdayaw sang ila nga kaisog kag pagkabaganihan. Naghalad sila sang ila bilidhon nga kinabuhi kag kinaalam. Wala duha-duha nga nag-atubang sang mga sakripisyo kag kabudlayan tubtob sa katapusan nga pitik sang ila mga pulso sa mapisan nga pagpatuman sang mga rebolusyonaryong hilikuton kag indibidwal nga tahas agud maangat ang armadong paghimakas kag inaway banwa sa mataas nga halintang. Namartir sila Noynoy (Ka Jojo) Ponteras, Marissa (Ka Kim) Pobresa, Ruben (Ka Marcos) Tingal, Reniel (Ka Randy) Cellon, Maryjane (Ka Cediea) Magquilat, Charity (Ka Mayang) Amacan, Jhon Dee (Ka Dahlia) Supelanas, Jhonrey (Ka Jai) Mejares, Glenda (Ka Glendale) Tonio Mejares kag Ka Pitong. Kalakip man sila Rogelio (Ka Cocoy) Posadas, Ericson (Ka Fredo) Acosta, Romeo (Ka Juanito) Nanta, Florida (Ka Panie) Ceballos, kag iban pa.

Ginasuluduhan kag lubos ginapasidunggan man naton ang mga rebolusyonaryong masa nga naghalad sang ila kabuhi sa rebolusyon. Sila ang aton buhi nga handumanan kag inspirasyon sa wala kataka nga pagtadlong sa aton mga kahuyangan, hugot kag lig-on nga pag-uyat sang mga sandigan nga prisipyo, disiplina, patakaran kag linya nga nabalhag sa konstitusyon sang aton Partido nga padayon nagpa-abante sang demokratikong rebolusyon paagi sa pangmalawigon nga inaway banwa padulong sa sosyalismo.

Militante nga ginasaulog naton ang ika-57 ka tuig nga pagsukat sang CPP bangud sang aton padayon nga pagpangibabaw sa natumod nga mga kakulangan kag nag-ani sang mga signipikanteng kadalag-an sa patag sang ideolohiya, pulitika kag organisasyon. Samtang maisog nga nag-atubang sa kaaway nga puno sang determinasyon sa pagpatuman sang aton rebolusyonaryong tahas nga mag-amot sa kalibutanon nga misyon nga hilwayon ang sahing proletaryado sa mapiguson kag mahimuslanon nga kamot sang imperyalismo.

I. Hayagan nga pagpangurakot sang rehimeng US-Marcos Jr sa kaban sang pumuluyong Pilipino, lubos nga ginkaakig sang mga Negrosanon

Sa sulod sang masobra tatlo ka tuig sang rehimeng US-Marcos II sa poder, indi mapunggan ang pagtay-og sang tuta kag maki-imperyalistang rehimen tuga sang naga-igting nga krisis sang mala-kolonyal kag malapyudal nga sosyedad Pilipino dala sang pabulusok nga krisis sang sistemang kapitalismo.

Ang maniobra sang Marcos-Romualdez nga hubon sa sistemang pamulitika-repleksyon sa paghugakom sang ekonomiya sa pungsod nga kaangay lang sang nagligad nga administrasyon Duterte. Ini nagresulta sang masalimuot nga banggi-anay sa pulitika sa tunga sang hubon Marcos-Duterte. Sa likod sang pasismo kag terorismo sang estado batok sa nagahimakas nga pumuluyong Pilipino, kada isa sa ila nagapanikasog sa pagmaniobra kag nagahugas sang ila mapintas nga kamot kag krimen sa katawhang Pilipino nga hinabunan ang ila kaugalingon kag liwat manipulahon ang palaabuton nga eleksyon 2028 agud magpabilin sa poder.

Madumduman sa ika-4 nga State of the Nation Address (SONA) ni Marcos Jr sadtong July 2025, ginpatutsada sini nga lagson ang may kahilabtanan sa isyu sang korapsyon sa kaban sang pumuluyo. Sa pihak sang binilyon-bilyon ka pesos nga badyet nga gin-aprubahan sa flood control project, padayon nga lubog sa baha ang pungsod nga nagtuga sang dislokasyon sa kabuhi kag pangabuhian sang malapad nga pumuluyong Pilipino. Matinggas ang pahayag ni Marcos nga “mahuya man kamo.” Gusto niya nga limpyuhan ang iya kaugalingon kag mga kahimbon sini sa mata sang pumuluyo kaangot sa isyu sang pagpangurakot kag lagson ang hubon Duterte bilang nagapanguna nga karibal sa pulitika sa pungsod. Kaangay nga mga hakugan kag kurakot, tuyo ni Marcos nga hugakumon ang mga kikbak, SOP kag iban pa nga pasuni agud suyupon kag i-garnatsar ang kabilugan nga manggad sang pungsod. Gusto man sang dinastiyang Marcos nga pahubsan sang manggad kag poder ang hubon Duterte gikan sa mga proyekto sa imprastraktura sang lokal nga gobyerno kag dumuluong kapitalista nga pungsod China.

Bangud sini, mas nag-igting pa gid ang kontradiksyon sa tunga sang mga Marcos kag Duterte kaupod sa mga alipures kag mga kaalyado sang magkatimbang nga bahin. Ang paghabuyanay sang isyu batok sa isa tanda sang pagpalig-on sa ila hanay kag danihon ang malapad nga pumuluyo nga mag-upod sa ila. Sang Pebrero 2025, ginsampa ang kaso nga impeachment kontra kay Bise Presidente Sara Duterte sang House of Representatives pero nagliso ang kaso bangud ginpunggan mismo ni Marcos Jr ang hearing sang Senado. Sang Marso 2025, nagbulig kag nakigkonsabo si Marcos sa Interpol sa pag-aresto kag pagpapriso sa Netherlands kay anay Presidente Rodrigo Duterte sa mando sang International Criminal Court (ICC) kaangot sa maduguon nga kampanya kontra-druga.

Ginhimo ang eleksyon sang Mayo 2025 sa Senado, Kongreso kag lokal nga gobyerno. Mas hayagan nga dinaya-ay kag manipulasyon ang nangin resulta. Ginasalamin sini ang banggi-anay kag akomodasyon sang nagkalain-lain nga hubon sang nagahari nga sahi sa dikta sang imperyalismong Estados Unidos. Samtang nagapabilin ang lubos nga suporta sang US kay Marcos, ginpwesto man sini ang iya nga reserbang kabayo para padalaganon sa eleksyon 2028.

Wala tupong ang pagpakatuta ni Marcos sa US agud magpabilin sa poder paagi sa barahubal nga pagpasugot sa pagpasilabot sang US sa pungsod. Nakigkunsabo ang rehimeng Marcos sa US gamit ang AFP. Ginbuksan ang mga bag-ong base kag pasilidad militar sang US. Nagdugang man ang mga armas panggyera sa Pilipinas. Padayon ang pagpanutsot sa China paagi sa mga military exercises sa sulod kag palibot mismo sa South China Sea nga naghalit sa mga mangingisda nga Pilipino.

Labi pa nga nag-igting ang banggi-anay sang nagahari nga sahi sang nabuyagyag na ang dalagko nga kaso sa korapsyon kaangot sa flood control projects nga puno sang anomaliya lakip na ang kontrata sang proyekto nga imprastraktura. Nag-usbong ang kainit sang pumuluyong Pilipino bangud sang kinaban-kaban nga manggad sang pumuluyo nga ginbulsa ni Marcos Jr upod sa mga korap nga opisyal sang gobyerno kag kakunsabo nga mga kumprador burgesya sa konstruksyon.

Sa Negros, ang wala-tuo nga korapsyon kag paggarnatsar sang pundo sang banwa ang labi man nga ginakaakig kag ginkaugot sang mga Negrosanon. Rason sang pagkamabinantayanon sang Negrosanon sa padayon kag maid-id nga imbestigasyon sa mga maanomaliya nga proyekto sang lokal nga gobyerno sa imprastraktura, flood control projects kag iban pa. Madumduman nga nag-angkon ang isla sang indi-hamak nga kahalitan nga gintuga sang mga bagyo kag pagbaha. Suno sa datos mismo sang reaksyonaryong ahensya, ang bagyo nga Tino sang Nobyembre 4, nagdangat sa P1.976 bilyon pesos ang gintuga nga kahalitan, 96 ang nagkalamatay, 308 ang nasamaran samtang 46 ang missing, 200,685 ang lubos nga nagkalaguba nga mga puluy-an kag 19,862 ang partially damaged. Lakip nga nahalitan ang mga buluthuan nga nagdangat sa 13 ka mga eskwelahan nga may 1,070 ka classrooms kag 24,779 ka mga pulungkuan nga kinahanglan kay-uhon suno pa sa Department of Education-School Division of Negros Occidental. Samtang binilyon-bilyon pesos man ang kahalitan nga gintuga sang paglupok sang bulkan Kanlaon. Nagdislokar sang pangabuhian sang mga mangunguma sa palibot sini kag ang kadam-an sa ila ang wala pa makarekober tubtob subong.

Bisan pa sa tunga sang grabe nga krisis sa ekonomiya nga naaguman sa isla, wala-untat man ang neoliberal nga pagpang-atake nga nagresulta sang padayon nga pagpang-agaw sang mga kadutaan sang mga mangunguma paagi sa Support to Parcelization for Land for Individual Titling (SPLIT), pagpatindog sang mga minahan kag patalang nga programa sa reporma sa duta sang mga ahensya sang reaksyonaryong estado.

Kadungan diri ang lapnagon nga pasismo kag militarisasyon sa kaumahan paagi sa focused military operations (FMOs) kag Retooled Community Support Program (RCSP) sang Armed Forces of the Philippines (AFP), Philippine National Police (PNP), paramilitar kag NTF-Elcac. Ini tanan ang nagdislokar sang malapad nga sahing mangunguma sa mga kaumahan sa isla. Samtang sa kasyudaran, nagasingki man ang ejectment sa mga imol nga taga-syudad bunga sang reklasipikasyon kag reklamasyon pabor sa mga dumuluong nga kapitalista, burgesyang komprador kag agalon may duta.

Sa kabilugan, ginalaragway sa gihapon sang Negros ang bangkarote nga mala-kolonyal kag malapyudal nga sistemang Pilipino. Ang Negros ginakilala sa bilog nga pungsod bilang sugar bowl kag diri nagasandig ang ekonomiya sang isla apang padayon naga-antus ang pumuluyong Negrosanon nga nagasalig sa monocrop nga industriya sang kalamay. Sa karon ang mga plantador sa isla, 80% sini ang ginabug-os sang mga small planters kag Agrarian Reform Beneficiaries (ARBs) nga amo ang pinakasentro nga naigo sa grabe nga pagsarurot sang kalamay humalin bulan sang Oktobre sini nga tuig sa pagbukas sang milling season tubtob subong nga nagdangat nalang sa P2,103/50 kilo ang bili sang kalamay. Samtang ang total production cost nga naga-abot na sa P2,400 kada 50 kilo. Tuman ini ka dako nga deperensya sa presyo kon itandi sang nagligad nga tuig sa pagbukas sang galing nga P2,980.88 kada 50 kilo. Sa pihak nga bahin ang presyo sang kalamay sa merkado, nagapabilin sa average nga P75.00-95.00 ang kada kilo. Bangud wala sang suporta sa reaksyonaryong estado, halos nalubong ang mga ini sa utang sa tuyo nga makatibawas sa palangbuhian. Nagapanghayhay kag nagapanguy-ab sila sa tuman ka nubo nga presyo sang kalamay kag nubo nga puresa (1.0-1.40), mag-an kag mataas nga trash sang tonelada sang tubo sa sulod sang isa ka tuig nga pagpangabudlay kag wala makabawi sa ila gingasto.

Suno pa sa mga plantador, magalab-ot sa P23.3 bilyones ang mapierde ukon madula nga kita sa kalamay kon indi ini mahatagan sang nagakaigo nga kasolbaran. Apang mas kalolooy ang mga mamumugon sa kampo nga tuman na ka miserable ang pangabuhi, kulang sang kita, manubo nga sweldo, kulang sang benepisyo kag indi makalagas sa pagsirit sang presyo sang mga balaklon bangud sang wala-puas nga implasyon.

Dapat nga pasabton si Marcos Jr upod sa mga ahensya sang gobyerno kaangay sang Department of Agriculture (DAR) kag Sugar Regulatory Administration (SRA) nga wala nagahatag sang proteksyon sa lokal nga industriya samtang nagahatag naman sang pabor sa neoliberal nga patakaran lakip na sa kalamay. Ginhatagan ligwa ang mga dumuluong kapitalista kag dalagkong komprador burgesya nga mga traders, mga lokal nga kapitalistang korporasyon sang pagkaon kag softdrinks sa pagsuyop sang higanteng ganansya. Magatuga ini sang lapnagon nga gutom kag kaimulon nga mangin kondisyon sa paglupok sang bulkan sosyal sa isla sang Negros.

II. Ginpamunuan sang Partido ang maisog kag malig-on nga pagpakig-away sang rebolusyonaryong Negrosanon batok sa imperyalismo, burukrata-kapitalismo kag pyudalismo

Sa balayon sang kahublagan panadlong, lubos kaisog nga may kalig-on nga nakig-away ang rebolusyonaryong Negrosanon batok sa imperyalismo, burukrata kapitalismo kag pyudallismo bangud sang determinado kag hugot nga pagpamuno sang KRPIN. Wala kahadlok nga ginsulay sang bug-os nga pwersa ang mga kabudlayan kag sakripisyo lamang nga mapursige ang pagpatuman sang integradong buluhaton sa pagtungod sang hilikuton masa sa pihak sang masingki nga operasyon militar, neoliberal nga agresyon kag iban pa nga porma sang pagpamintas sang reaksyonaryong estado. Bangud sang mataas nga determinasyon kag puno sang inspirasyon, nag-ani kita sang mga signipikanteng kadalag-an sa ideolohiya, pulitika kag organisasyon (IPO) nga nagmarka sa pag-angat sang demokratiko nga rebolusyon sang banwa (DRB) sa mataas nga halintang paagi sa pangmalawigon nga inaway banwa (PIB).

Subong nga tuig, relatibo napangibabawan naton ang kahuyangan sa empirisismo nga nagapanguna sa ideolohiya kag konserbatismo sa pulitika diin gintumod ini sang nagligad nga mga tinuig nga nagbunga sang mga pag-atras sa tanan nga bahin. Ginpalig-on sang KRPIN ang ginpanuguran nga tikang paagi sa paghakos sang mga sandigan nga prinsipyo, linya, programa, patakaran ilabe na ang aplikasyon sang Marxismo-Leninismo-Maoismo (MLM) sa praktika dira sa kongkretong kahimtangan kag laye sang inaway banwa. Ginhimo ang pila ka pag-adyas sa naandan nga gawi, pagpangibabaw sa comfort zones, pormasyon kag iban pa nga porma sang mga kahinaan nga gintumod sa mga pagsaway kag pagsaway sa kaugalingon kag pagtadlong gikan sa nasumada na nga mga inagihan. Sa pagpanguna sang KRPIN, hugot kag lig-on nga gin-uyatan sang mga kadre kag katapuan sang Partido, Pulang hangaway kag bug-os nga rebolusyonaryong Negrosanon ang mga bulawanon nga leksyon nga nangin sagabal sa komprehensibong pagsulong.

Sini nga tuig, madinalag-on nga nahimuan sang mga simpleng pamaagi apang maunod nga mga pagtuon agud konsolidahon kag pataason ang kamuklatan pampulitika sang tanan nga katapuan kag mga kadre sang Partido sa MLM. Nalunsar ang tatlo ka halintang sang pang-Partido nga kurso ilabe na ang Batakang Kurso sang Partido (BKP) kag Intermedyang Kurso sang Partido (IKP). Padayon man nga ginkampanya ang pagtuon sang Kursong Oryentasyon sa Partido (KOP) kag Konstitusyon sang Partido. Nagserbe ini nga giya sa pag-angat sang mga rebolusyonaryo kag integradong hilikuton gikan sa ginsumada nga rebolusyonaryong praktika kag nakarekrut sang bag-ong miyembro sa Partido.

Kolektibo nga gintun-an ang mga memorandum kag advisories sang mataas nga organo kag rehiyon. Naghatag ini sang iwag sa paghulag kag implementasyon sang mga plano sandig sa kongkretong kahimtangan sang inaway banwa sa isla kag bug-os nga pungsod.

Husto nga tion nga gintun-an ang mga rebolusyonaryong publikasyon kaangay sang Ang Bayan, Rebolusyon, Ang Paghimakas, Ispading, Ang Budyong kag Ngurob. Nakabulig ini sa pagpasangkad sang panghuna-huna sang mga katapuan sang Partido sa sulod sang hukbo kag lokal nga organisasyon masa sa malaparan nga paghangup sang DRB kag pangmalawigon nga inaway banwa.

Kadungan man sini ang paghatag bug-at sa pagtuon sang buhi nga mga inagihan sang mga larangan gerilya kag iban pa nga rehiyon gikan sa mga nasumada nga inagihan. Paagi sini, nakahatag sang inspirasyon kag nakapunpon sang mga bulawanon nga leksyon serbe sa pagpalambo sang mga teknika kag taktika agud pangibabawan ang aktwal nga atake sang kaaway sa NPA kag baseng masa. Samtang ginpalambo man ang indibidwal nga pagtuon sang mga sandigan nga prinsipyo kag kurso pang-Partido.

Kadalag-an man ang pagsumada sang mga inagihan sa IPO sang mga larangan gerilya kag iban pa nga yunit kag organo sang Partido. Nag-ubay ini sa pagpauswag sang mga rebolusyonaryong hilikuton kag nag-angkon sang kongkretong kadalag-an sa tanan nga aspeto sang pagsulong.

Dako man nga bulig ang paghim-os sang hilikuton SICA sang mga larangan gerilya sa pagpukaw, pag-organisa kag pagpahulag sa masa dira sa ginalunsar nga paghimakas masa. Ini ang kongkreto nga dagway sa pagpaninguha nga malampuwasan ang sakit sang suhetibismo sa ideolohiya sa dagway sang empirisismo.

Nakonsolida ang tanan nga yunit sang Partido sa kaumahan kag kasyudaran paagi sa hilway nga pagtigayon sang kalidad nga mga pagtasa kag paghimo sang maundanon kag patok nga plano sa padayon nga paglambo sang mga rebolusyonaryong hilikuton dira sa baseng masa.

Kadungan sini ang paghiwat sang mga pagsaway kag pagsaway sa kaugalingon bilang superyor nga armas sang mga katapuan, kadre sang Partido kag bug-os nga rebolusyonaryong pwersa sa pagremolde sa kaugalingon kag pagpakig-away sa kaaway sa sahi kag mga makinaryas sang mapintas nga estado nga AFP, PNP, NTF-Elcac kag paramilitar.

Wala kataka nga nagkonsolida kag nag-angat sang kamuklatan pampulitika sang baseng masa paagi sa paglunsar sang pina-uswag nga mga pamaagi kag simpleng mahangpan nga mga kurso sang pagtuon sang PADEPA, mga sinulat nga artikulo, sosyal imbestigasyon kag iban pa nga sumada gikan sa rebolusyonaryong inagihan.

Nabuyagyag man ang mga kabutigan, saywar, patalang kag black-propaganda nga padugi sang estado paagi sa AFP, PNP kag NTF-Elcac batok sa rebolusyonaryong kahublagan. Labi nga ginpalambo kag opensibang postura sang tit for tat nga hilikuton propaganda dira sa social kag mainstream media. Ini ang nakabulig sang kadam-an nga Negrosanon sa paghangup sang kamatuoran sa isyu sang peke nga amnestiya, E-Clip, peke nga reporma sa duta, korapsyon kag iban pa. Ini ang nagtulod sa pumuluyong Negrosanon nga padayon magsuporta sa NPA kag armadong paghimakas sa isla.

Karon nga tuig, signipikante ang ginpakita nga kusog sa mga paghimakas masa sa kaumahan kag kasyudaran. Ini ang ginbun-ag sang panggwa nga kahimtangan sa ekonomiya kag pulitika sa pungsod. Sa kaumahan, may pagbuylo na sang tingob kag kolektibong paghulag kaangot sa reporma sa duta, pagduso sang matarung nga sweldo kag benepisyo sa nagkalain-lain nga palamugnan sang mga mamumugon sa uma kag sahing mangunguma. Subongman paghulag sang masa para kontra-terorismo kag kontra-pasismo batok sang rehimeng US-Marcos II nga estado.

Isa diri ang kadalag-an sang masang mangunguma sa Sur nga bahin sang isla batok sa mapiguson kag manug-agaw duta nga Hda Asia Plantation Incorporated (HAPI-Araneta), Department of Environment and Natural Resources (DENR), pamilya Consunji kag kakunsabo nga lokal nga gobyerno sang Candoni, Negros Occidental. Subongman ang padayon nga paghimakas kag paghublas sang mga ARBs batok sa manugpatalang nga programa sang SPLIT sang Department of Agrarian Reform Program kag programa ni Marcos Jr nga New Agrarian Emancipation Act (NAEA) para sa liwat nga pagpadasig sa pagpang-agaw sang napanagtag na nga duta sa mga mangunguma.

Samtang sa Norte, malig-on nga naghiliusa kag nagpanindugan man ang mga mangunguma sa EB Magalona kag Victorias City, agud depensahan ang ila duta kag pangabuhian batok sa mapintas nga blue guards kag despotikong agalon may duta.

Sa Silay City, ang mabakod nga tindog sang Silaynon kag kasikbit nga banwa batok sa Bulk Water Project ni Gov. Eugenio “Bong” Lacson sang Negros Occidental. Ini nga proyekto ang tuyo nga monopolyohon sang probinsya ang tubig halin sa Malugo kag Embang river sa North Negros paagi sa Private Public Partnership (PPP) nga ginpundohan sang US Agency for International Development (US-AID) kag Asian Development Bank (ADB) kag mga dalagkong kumprador burgesya.

Samtang sa kasyudaran ilabe na sa sentro sang Bacolod, asud-asod nga rali-protesta kag untat-biyahe sang mga drayber kag gagmay nga opereytor ang ginpatigayon batok sa mapiguson nga Jeepney Modernization Program sang rehimeng US-Marcos II, pagsaka sang presyo sang krudo kag gasolina bunga sang deregulasyon kag iban pa. Bangud sang wala-untat nga reklamo sang mga kunsumidor angot sa inutil nga serbisyo sa tubig sang Primewater, napilitan ang pamilya Villar sa pagbaligya sang sini nga kumbuyahan agud magpalagyo sang ila dako nga salabton sa pumuluyo sa Negros partikular sa Bacolod, Himamaylan, Bago City kag Cadiz City. Nabihangan man ang Bacolod City Water District (BACIWA) sa iligal nga pagpahalin sa mga regular nga trabahante kag indi makatarungan nga paghatag sang benepisyo sini sang nasambit nga lokal nga ahensya bangud man sang padayon kag maisog nga paghimakas sang mga biktima halin sa lokal tubtob nga gindala ang isyu sa pungsodnon nga sentro.

Sa isyu sang reklamasyon kag reklasipikasyon sang mga kadutaan, tudo reklamo man kag pag-gios sang imol nga taga-syudad sa pagdemanda nga maka-angkon sang duta, matarung kag permanente nga puluy-an kag palangabuhian sa pihak sang pilit nga pagpahalin sa ila pabor sa interes sa mga dumuluong nga kapitalista kag dalagkong kumprador burgesya.

Sang naglupok ang maanomaliya nga flood control projects, signipikante ang pagmobilisa sang 8,000-10,000 gikan sa sandigan nga sektor, mga nahanunga, demokratiko kag patriotikong pwersa sa isla nga nagpartisipar sa pungsodnon nga protesta sa isyu sang korapsyon sadtong Septyembre 21 kadungan sa komemorasyon sang maduguon nga Martial law sang anay rehimeng US-Marcos Sr kag 12,000 nga pwersa ang napahulag sang Nobyembre 30 (Bonifacio Day). Nangin signipikante ang kusog sang mga mangunguma kag mamumugon, kabataang-estudyante, kababaihan, mga lokal nga artista, pulitiko, mga manunudlo, abogado, health workers kag iban pa nga mga propesyunal ilabe na gid ang tawong-simbahan kaangay sang mga kaobispohan, kaparian, madre sang nagkalain-lain nga dominasyon kag mga layko. Ginbaha ang kadalanan sang dako nga protesta sini nga panahon ang syudad sang Bacolod kag Dumaguete kadungan sa ginlunsar nga pungsodnon nga rali-protesta. Ini ang pinakadako nga protesta sa isla kumparar sang mga paghulag sang masa humalin sadtong tuig 2016.

Ang mga detinidong pulitikal nagpakita man sang kaisog kag padayon nga paghimakas bisan pa man sang ila kapiot nga kahimtangan sa sulod sang bilangguan. Asud-asod nga naglunsar sang mga aksyon masa batok sa mapiguson nga tratasyon, pagdingot sang ila mga kinamatarung kag iban pa nga pagpamintas sang estado sa ila. Sila ang inspirasyon sang malapad nga pumuluyong Negrosanon sa pagpadayon sang paghimakas para sa pungsodnon nga kahilwayan kag demokrasya.

Mas aktibo nga nagpabilin ang lima ka larangan gerilya sa isla idalom sa AGC-NPA nga absoluto ginpamunuan sang KRPIN. Bangud sang mapisan, maukod kag maalam nga pagbasa sang sitwasyon militar, ang CPP-NPA hilway kag padayon nga nagpatuman sang integradong hilikuton sa pagtukod sang baseng masa, agraryong rebolusyon kag armadong paghimakas sa pihak sang pasulit-sulit nga saywar kag dedlayn sang AFP, PNP kag NTF-Elcac nga tapuson na ang insurhensiya sa isla. Sa baylo, bangud man sang suporta sang masa, sustenido apang sekreto nga natungdan ang pagtukod sang organong gahum pampulitika sa mga kaumahan sang isla.

Mas naglapad kag nagdako sang 33% ang lugar nga hilway maniobarahan kag mahulagan sang NPA. Nagdugang sang 20% ang kusog sang organisadong masa kabangdanan sang pagtimbuok sang kabilugan nga isip sang baseng masa nga indi magnubo sa 20%. Ini ang magserbe nga bubon nga tuburan sang mga rebolusyonaryong pwersa nga magpasakop sang CPP, NPA kag bug-os nga rebolusyonaryong kahublagan.

Samtang padako nga nagapadako kag nagalig-on ang kusog sang NPA kag mga yunit gerilya sa isla. Hugot nga gina-uyatan sini ang mga sandigan nga prinsipyo, linya, patakaran kag programa sang DRB paagi sa pangmalawigon nga inaway banwa nga may sosyalistang perspektiba. Lig-on nga gina-uyatan man sini ang 3 ka dispilina kag 8 ka punto sa tagsa ka paghulag nga may pulitiko-militar nga kapabilidad dira sa pagpatigayon sang mga hilikuton masa. Ini ang bunga sang padayon nga paglunsar sang kolektibo nga mga rebolusyonaryong pagtuon kag paghanas militar. Magaserbe ini nga armas sa pagpalig-on sang NPA sa ila komitment kag kahanas sa pagtungod kag pagpatuman sang mga rebolusyonaryong hilikuton ilabe na sang sentral nga katungdanan sini nga agawon ang gahum-pulitika sa kaaway sa sahi paagi sa armadong paghimakas kag tukuron ang sosyalismo.

Sa sulod sang isa ka tuig, madinalag-on nga nakalunsar ang NPA sang 44 ka taktikal nga opensiba sa nagkalain-lain nga tipo kag porma sang opensiba kag nakakumpiska sang mga armas kag lohistika militar diin nagtuga sang kahalitan sa kaaway. Nag-agum sang 58 nga killed-in-action (KIA) kag 21 ang wounded-in-action (WIA) sa AFP, PNP, kontra-rebolusyon kag mga malain nga elemento.

Ang malaba nga kamot sang rebolusyonaryong hustisya paagi sa NPA ang naghatag sang nagakaigo nga hustisya sa mga biktima sang lapnagon nga pasismo kag terorismo sang estado. Taliw-as ini sa ginasugid ni Marcos Jr nga “wala na sang aktibo nga larangan gerilya sa pungsod.” Sa pihak sini, nag-agum man ang BHB sang 5 ka depensibang aksyon kag tatlo nga kontra-opensiba nga may 10 ka mga rebolusyonaryong martir.

Padayon nga ginpaslaw sang KRPIN ang pagpapas sang kaaway sa Partido sa isla. Gusto sang reaksyonaryong gobyerno nga punggan ang paghiliusa kag paghimakas sang Negrosanon nga ginapamunuan sang proletaryong Partido.

Determinado nga ginpamunuan sang Partido sa isla ang hangaway sang banwa upod sa mga rebolusyonaryong masa nga naga-isa sa pagpatuman sang mga desisyon, linya, programa kag mga plano sa balayon sang demokratikong sentralismo. Tuyo sang Partido nga ginapamunuan sang sahing proletaryado nga hilwayon ang malapad nga masa sa kamot sang mapiguson kag mahimuslanon nga dumuluong kapitalista kag nagaharing sahi kag pagpamintas sang pasista kag mersenaryong makinaryas sini nga AFP, PNP, NTF-Elcac kag paramilitar.

Samtang nagatungod kita sang integradong hilikuton kag aktwal nga nagapakig-away sa kaaway sa patag-awayan, madinalag-on nga nakarekrut sang mga bag-ong katapuan sang Partido nga nagdangat sa halos 70%. Bug-os taguipusuon nga ginbaton nila ang kahustuhon sang DRB/PIB nga may masanag nga sosyalistang padulungan bilang pangkabilugan nga linya pampulitika. Wala duha-duha nga nagbaton sang ila mga tahas kag katungdanan nga pamunuan ang rebolusyonaryong kahublagan sa isla.

Kadungan man sini, nakapatuhaw kag nakadebelopar kita sang mga lamharon kag responsable nga mga kadre nga nangin katimbang sang mga edaran nga mga kadre sa pag-abaga sang mga responsibilidad sa tanan nga linya sang mga hilikuton. Sila ang magbinuligay paagi sa doble tubtob triple nga pagkayod kag pagpaninguha sa pagpalambo sang mga hilikuton sa mataas nga halintang sang pagsulong sa padayon nga pagpatuman sang kahublagan panadlong.

Sa kabilugan, may lebel na kita sang signipikante nga pag-igpaw sa aton natumod nga mga kahuyangan sa ideolohiya, pulitika kag organisasyon gikan sa aton pag-atras sang nagligad nga mga tinuig. Ginasigahum nga sa aton padayon nga pagtadlong sang aton mga kahinaan paagi sa pagsaway kag pagsaway sa kaugalingon, malab-ot naton ang prisipyado nga pag-isa, husto nga mapamunuan ang nagahimakas nga masa para daugon ang inaway banwa paagi sa lapnagon kag dasok nga pakig-away gerilya sandig sa nagalapad kag nagadalom nga baseng masa.

III. Hugot nga uyatan ang mga bulawanon nga leksyon kag mga kadalag-an sang nagliligad, dugang kakahas nga magpangibabaw sa mga kahinaan kag angkunon ang komprehensibo kag signipikanteng pag-uswag

Sa pagpamuno sang KRPIN, halos duha na ka tuig nga ginpatuman naton ang Kahublagan Panadlong kaangot sa liwat nga panawagan sang Komite Sentral sang CPP. Naangkon naton ang signipikanteng pag-igpaw kag pagsulong apang kinahanglan ang hugot nga pagkamabinantayon sa liwat nga pagsulpot sang mga kahuyangan sa IPO nga huyog sang indibidwalismo-mga burges kag pyudal nga impluwensiya kag sahi nga ginhalinan nga maga-ut-ot sa sulod sang organisasyon sang Partido. Kinahanglan ang padayon nga pagremolde sa kaugalingon samtang paabante nga ginasulong ang armadong rebolusyon tubtob sa kadalag-an.

1. Padayon nga konsolidahon ang Partido sa Marxismo-Leninismo-Maoismo! Pamatukan ang empirisismo kag konserbatismo sa tanan nga bahin sang pagsulong

May lebel na kita sa pag-igpaw sa aton mga kahuyangan sa empirisismo kag konserbatismo matapos ang halos duha ka tuig nga pagpatuman sang kahublagan panadlong. Bisan pa man nga may naulihi kag nakaangkon sang mga kahalitan bangud sa pagpabilin sa mga comfort zones kag wala-untat nga atake militar, nag-angkon kita sang signipikante nga pag-uswag kag pagsulong sini nga tuig. Dapat nga indi kita magkampante sa aton naabot nga mga kadalag-an, kinaalam kag praktika. Kinahanglan wala-kataka nga pagpakunot sang agtang sa pagtuki sang mga butang kag mga kontradiksyon sa pagpauswag sang aton praktika nga ipaabante ang demokratiko nga rebolusyon sang banwa.

Magpabilin nga mangin mapisan sa pagtuon sang sandigan nga prinsipyo, linya, patakaran, programa kag konstitusyon sang aton Partido.

Magmangin maalam paagi sa maukod nga pagbasa sang sitwasyon militar nga amo ang magdeterminar sa aton husto nga plano sa paghulag kag pagpakig-away. Ini ang husto nga aplikasyon sang MLM nga malikawan ang konserbatismo sa pulitika, ultra-demokrasya, burukratismo kag liberalismo sa sulod sang organisasyon.

Padayon nga ginpalig-on kag ginapauswag sang mga kadre kag komite sang Partido sa isla ang hilikuton SICA sa tagsa sini nga ginsakopan. Sa katuyuan nga pagkumpleto kag pagpadalom sang hilikuton SICA amo nga puntingon ang mga nagapanguna nga problema kag mga isyu nga gina-atubang sang malapad nga masa ilabe na ang kinaiya sang pagpanghimulos kag pagpamigos sa sandigan nga sahi kag sektor para sa husto kag nagakaigo nga taktika para himuon ang pagpukaw, pag-organisa kag pagpahulag sa ila. Paagi sini makahimo sang nagakaigo nga plano kag panawagan sa husto nga paghakos sang masa sa ila mga paghimakas.

Ginpalig-on man sang nagkalain-lain nga organo sang Partido sa isla ang pagsumada sang ila tagsa ka rebolusyonaryong inagihan sakop sang ila ginahulagan. Kinahanglan lig-on nga mahiusa ang Partido tubtob sa masang katapuan kag ipaseguro nga hugot mauyatan ang mga napunpon nga mga bulawanong leksyon.

Determinado ang mga kadre sa tanan nga lebel sang aton Partido nga magtumod, magsaway kag padayon nga magpangibabaw sa mga kahinaan kag pagsayop sang nagliligad nga panag-on kag dal-on ang aton rebolusyonaryong praktika sa mas mataas nga halintang sang pagsulong.

2. Absoluto nga pamunuan sang Partido ang NPA kag paigtingon ang nagalapad nga kahublagan kontra-pyudal sa kaumahan kadungan sa nagasingki nga kahublagan kontra-imperyalista kag kontra-pasista sa kasyudaran

Sa subong, tuman ka athag ang pag-igting sang kronikong krisis sang malakolonyal kag malapyudal nga sistema sang pungsod kag sang pangkalibutanon nga sistemang kapitalista. Napamatud-an nga husto, makatarungan kag lubos nga kinahanglanon ang pagsulong sang armadong paghimakas dira sa Demokratiko nga Rebolusyon sang Banwa paagi sa pangmalawigon nga inaway banwa nga may sosyalistang perspektiba. Ini lang ang solo nga pamaagi para lubos mahilway ang pumuluyong Pilipino sa pagpamigos kag pagpanghimulos sang imperyalismo, pyudalismo kag burukrata kapitaslimo.

Ara sa husto nga posisyon ang Partido nga pangunahan ang pagsulong sang armadong paghimakas upod sa malapad nga masa sa balayon sang hambalanon nga “Magpalig-on samtang nagapakig-away, makig-away samtang nagapalig-on.” Kinahanglan nga matum-ukan ang padayon nga pagpataas sang kamuklatan sang mga Pulang hangaway kag ikasarang sa pagpakig-away paagi sa tayuyon nga pagtuon kag paghanas pulitiko-militar. Ang ini nga kapasidad kag ikasarang maga-ubay sa pagpatuman sang mga rebolusyonaryong hilikuton dira sa talunsay nga pagtungod sang hilikuton masa kag aktwal nga pagpakig-away sa kaaway. Naga-upod man diri ang hugot nga pag-uyat sa 3 ka disiplina kag 8 ka punto nga amo ang tunay nga tatak sang pulang hangaway.

Sa kaumahan, ang NPA bilang mayor kag nagapanguna nga makinaryas sang Partido. Padayon ini nga ginatungdan ang pagpalapad kag pagpalig-on sang mga sandigan nga rebolusyonaryong organisasyon masa sang mga mangunguma, mamumugon sa uma, mga pamatan-on kag kababaihan. Sila ang ubod sang baseng masa nga katimbang sang NPA sa pagtukod sang organong gahum pampulitika kag pagpapagsik sa kontra-pyudal kag kontra-pasista nga mga paghimakas masa.

Tukuron, palig-unon kag papagsikon ang mga platun gerilya nga absoluto ginapamunuan sang Partido. Ipatuman ang dinamismo sang platun nga may pulitiko-militar nga ikasarang kag kapabilidad. Istrikto nga paandaron ang pulitikal kag pang-militar nga seksyon nga naga-atipan man sang kaayuhan sang hangaway sa sulod sang platun gerilya.

Sandig sa sitwasyon, dapat magmangin maayo sa pag-aplikar sang teknika kag taktika sa pagpakig-away gerilya kag epektibo nga gamiton ang gerilyang paghulag sang konsentrasyon, dispersal kag pagbalhin. Ginakonsentrar ang pwersa sa panahon sang konsolidasyon, pulong, pagtasa, plano kag paglunsar sang taktikal nga opensiba gamit ang mas superyor nga kusog sang NPA batok sa gamay kag mahuyang nga pwersa sang kaaway. Ginahimo ang dispersal sang pwersa agud lubos nga alagaran ang masa dira sa pagpatuman sang hilikuton masa subongman indi matumod sang kaaway ang kabug-usan nga pwersa. Samtang nagabalhin agud ipreserbar ang kusog sang Partido, Hukbo kag organisasyon masa batok sa naga-atake nga kaaway sa mga sona kag prenteng gerilya.

Malig-on man nga ginatukod ang milisya sang banwa kag iban pa nga yunit gerilya sa idalom sang mga yunit kag organo sang Partido. Kinahanglan nga matum-ukan ang pagkonsolida sa ila paagi sa mapagsik nga paglunsar sang pulitiko-militar nga mga pagtuon kag paghanas. Gina-organisa sila bilang reserbang kusog sang hangaway sang banwa dira sa mga baseng masa. Kinahanglan ang hugot kag mahapsay nga koordinasyon sa tunga sang regular nga hangaway kag lokal nga mga yunit gerilya. Sila ang mapagsik kag dululungan nga nagatungod kag nagapatuman sang integradong hilikuton sa hanay sang masa.

Nagapanguna ginatungdan ang pagsulong sang armadong paghimakas ilabe na ang pagpadako sang hukbo kag paglunsar sang madinalag-on nga taktikal nga opensiba nga makakumpiskar sang armas batok sa pasistang AFP, PNP, paramilitar kag iban pa nga makinaryas sang reaksyunaryong estado.

Sa ginsiling na, ang kasyudaran ginalaragway nga balwarte sang dalagkong komprador burgesya, burukrata-kapitalista kag despotikong haciendero agalon may duta upod sa ila mga imperyalistang agalon nga ginagwardyahan sang mapintas nga AFP, PNP kag pribadong armadong hubon. Sila ang sentro nga kaaway kag nagapanguna nga target sang rebolusyon sa isla nga nagamonopolyo sang mga kadutaan kag nagasuyop sang super-ganansya para sa ila personal nga interes kag luho. Diri ginasulong ang kahublagan anti-imperyalista kag anti-pasismo sa giya sang duha ka taktika sang pagpakig-away paagi sa ilegal-legal kag likom-hayag nga paghulag kag paghimakas gamit ang mga reaksyonaryong laye para sa interes sang nagkalain-lain nga sektor ilabe na sang imol nga taga-syudad, mamumugon sa industriya kag serbisyo, mga drayber kag iban pa nga sahing mala-proletrayado. Kalakip nga ginatib-ong ang interes sang ispesyal nga sektor sang kabataang-estudyante, pamatan-on kag kababaihan upod sa ginahimuslan nga kusog kag kinaalam sang sahing peti-burgesya.

Sa karun nga tuig, bisan pa man sang nagabagusbos nga atake militar kag iban pa nga padugi sang rehimeng Marcos II nga punggan ang nagahimakas nga Negrosanon, signipikante sa gihapon ang ginbuhos nga kusog sang nagkalain-lain nga sektor sa pagpamatok sa mga kontra-pumuluyo kag makidumuluong nga programa sang rehimeng US-Marcos II. Liwat nga nag-usbong ang kainit kag kaakig sang Negrosanon sa isyu sang korapsyon kag paggarnatsar sang trilyones nga pundo sang gobyerno sa kaban sang pumuluyong Pilipino sang pareho nga korap kag hakugan nga Ferdinand Marcos Jr kag Sara Duterte.

Lubos man nga ginkaakig sang pumuluyong Negrosanon ang gulpi kag padayon nga pagnubo sang presyo sang kalamay kag paghatag pabor sang rehimeng Marcos Jr sa mga makidumuluong nga traders, burgesya komprador kag agalon may duta sa isla.

Sa pagpamuno sang Partido, dapat magmangin maayo kita sa hilikuton alyansa para makaagum sang malapad nga suporta kag ma-engganyo man ang iban nga sektor, patriotiko-demokratiko kag sahi sa mga nahanunga nga pwersa nga isulong ang ila mga kinamatarung batok sa hampak sang imperyalistang neoliberal nga opensiba. Likawan ang sektaryanismo, ikogismo kag repormismo. Buyokon ang suporta sang mga tawong simbahan, akademya, mga pulitiko, abogado kag iban pa nga nagasimpatiya sa nagalarga nga kahublagan masa sang pumuluyo.

Ang pagsulong sang kontra-pyudal, kontra-pasista kag kontra-imperyalista nga kahublagan sa kaumahan kag kasyudaran ang magaserbe nga alagyan sang hilikuton konsolidasyon, pagpalad kag rekoberi. Sa konsolidasyon, dapat magpakamaayo kita sa solido nga pag-organisa. Tukuron ang mga organisasyon masa sa proseso sang huluhalintang nga pag-organisa. Tukuron ang mga grupo, sanga sang Partido sa mga lugar nga ginahulagan bilang bag-as sang bug-os nga rebolusyonaryong kahublagan. Kinahanglan nga madasig nga mapundar ang mga pangteritoryo nga komite sang Partido sa mga distrito nga magtahi kag magpayong sa mga ginalunsar nga kahublagan masa sa isla. Sa pagpalapad, lab-uton ang mga populado kag estratehikong lugar kag balikan ang mga madugay na nga lugar nga wala na mahulagan para sa hilikuton rekoberi.

Kadungan man sini, ang pagpataas sang pampulitika nga kamuklatan sang masa paagi sa paglunsar sang mga pampulitika nga pagtuon kag paghanas. Dapat nga ikampanya ang pagtuon sa PADEPA. Ipaseguro nga matun-an ang Malip-ot nga Kurso sang Katilingban Pilipino, Aralin Aktibista, Espesyal nga Kursong Masa kag Rebolusyonaryong Giya sa Reporma sa Duta. Ikampanya man ang pagtuon sa Comprehensive Agreement on Respect for Human Rights and International Humanitarian Law (CARHRIHL), Ang Bayan kag ang rehiyunal nga publikasyon sang Ang Paghimakas.

Maghiusa kag maghimo sang partikular nga plano kaangot sa nabalay nga rehiyonal nga kampanyang masa. Tasahon kag sumahon ang mga nalunsar nga paghimakas masa kaangot sa sweldo-benepisyo, reporma sa duta, renewable energy, jeepney modernization kag iban pa. Punponon ang mga leksyon kag ipalapnag sa tanan nga yunit sang Partido tubtob sa lebel sang organisasyon masa. Liwat nga ginapanawagan nga ipatuman ang rehiyunal nga plano sang kahublagan masa nga “Isla sang Negros: Isla sang mapagsik kag mapalad nga kontra-pyudal nga mga paghimakas masa.” Paagi sini, malig-on nga ginapalapad naton ang hanay sang Partido sa pagrekrut halin sa mga bag-o nga mga rebolusyonaryo gikan sa paghimakas masa sa kaumhan kag kasyudaran man. Mahimo naton ini bangud ang mga kadre kag katapo sang Partido ang ubod sang mga paghimakas masa kag kaupod sang masa sa ila paghulag.

Ikampanya man ang pagpatuhaw sang dugang nga pwersa sa hilikuton propaganda. Dapat nga tumuron ang mga potensyal nga pwersa sa tunga sang mga yunit kag organo sang Partido. Hanason sila sa nasambit nga kinaiya sang hilikuton kag pagpalambo sini. Dapat wala untat nga mabantala sa publiko paagi sa mainstream media kag social media ang naangkon nga mga kadalag-an sang kahublagan masa sa isla. Kadungan sini mabaskog man nga ibuyagyag ang mga kalakasan, kapintas kag kabutigan sang reaksyonaryo, mersenaryo kag pasistang kaaway nga AFP, PNP kag NTF-Elcac.

Sa kabilugan, ang pagpausbong sang kahublagan masa sa kaumhan kag kasyudaran sang isla ang nagapalig-on sang Pungsodnon Nagahiliugyon nga Prente nga armas sang Partido nga aplikable sa nagkalain-lain nga porma sang legal nga paghimakas kag sang rebolusyonaryo nga porma sang paghimakas. Ang sandigan nga alyansa sang mamumugon kag mangunguma amo ang malig-on nga pundasyon para sa tanan nga tipo sang alyansa sa tunga sang progresibo kag patriyotiko. Ini ang malapad nga pundasyon apang temporaryo. Magamit ini para mapalapad ang kusog kag impluwensya sang mga rebolusyonaryong pwersa agud ihamulag, mapahuyang kag mapukan ang kaaway sa sahi nga sa karon ginatiglawas sang magkaribal apang parehong mga inutil, pasista kag korap nga si Marcos Jr kag Sara Duterte.

Sa karon, mas naggrabe pa ang pag-indakal sang krisis sa ekonomiya kag pulitika sang katilingban Pilipino kag gina-atubang nga krisis sang sistemang kapitalismo. Ini ang matambok nga duta kag paborable nga kondisyon para hakupon ang pinaka-malapad nga bahin sang katawhan nga maghimakas para sa pagbag-o sosyal. Ginasigahum ang matunog nga paglupok sang bulkan sosyal sa isla ang magapabaskog sang inaway banwa sang ginahimuslan kag ginapigos nga Negrosanon nga maga-amot sa kadalag-an sang Demokratiko nga Rebolusyon sang Banwa paagi sa pangmalawigon nga inaway banwa. Ginalauman ang liwat nga pag-usbong sang mataas nga halintang sang inaway sa bag-o nga halintang sang kasaysayan sa isla sang Negros.

Hugot nga uyatan kag ikabuhi ang Marxismo-Leninismo-Maoismo!

Isulong kag Padaugon ang demokratikong rebolusyon sang banwa!

Mabuhay ang sahing proletaryo kag pumuluyong Pilipino!

Mabuhay ang ika-57 nga anibersaryo sang Communist Party of the Philippines!