‎Ginpatuman sang isa ka yunit sang Armando Sumayang Jr Command-New People’s Army (ASJC-NPA) ang desisyon sang rebolusyonaryong korte sang pumuluyo sa pagsilot kay Renante ‘Bulantoy’ Vedarte, 39 anyos, sa Purok Tuburan, Barangay Tapi, Kabankalan City, Negros Occidental, pasado alas-5:00 sang hapon sadtong Pebrero 23.

Narekober kay Vedarte ang isa ka kalibre .45 nga armas kag mga bala.
‎
Napamatud-an sang rebolusyonaryong korte sang pumuluyo si Vedarte nga isa sa mga naggiya sa 15th IB sa natabo nga engkwentro sadtong Abril 27, 2025 sa Purok Maghirupay, sa nasambit nga barangay. Residente man si Vedarte sa amo nga lugar. Nagresulta ini sa pagkamartir sang pito ka mga Pulang hangaway nga naglakip kay Jhon Dee “Ka Dahlia” Supelanas, isa ka transwoman, nga mas ginpili nga magserbi sa masang pigos kag ginahimuslan.

‎Padayon nga ipatuman sang NPA ang sistema sang rebolusyonaryong hustisya sang demokratikong gobyerno sang banwa. Bilang nagatiglawas sa interes sang ginahimuslan nga mga sahi kag sektor, responsibilidad kag katungdanan sang demokratikong gobyerno sang banwa nga ipatuman ang sistema sang hustisya nga nagapabor sa masang nilupigan.

Subongman, determinado ang Pulang hukbo nga manukot sa mga kontrarebolusyonaryo kag malain nga elemento nga napamatud-an nga may dalagkong halit sa pumuluyo kag sa rebolusyonaryong kahublagan.
‎
‎Palyado ang pabalik-balik nga retoriko sang AFP, PNP, kag NTF-Elcac nga ang rebolusyonaryong hustisya “wala pulos nga kapintas”. Sa matuod, ini ang ekspresyon sa pumuluyo nga lawig na nga ginbiktima sa kapintas sa terorista kag pasistang estado nga gintiglawas subong sa rehimeng US-Marcos II. Akto ini sa pagdepensa sa interes kag kinamatarong sang ginapigos kag ginihimuslan nga amo ang ginatarget sang sistematikong pagpamintas sa mersenaryong AFP kag PNP.

Ginapanawagan man sang Armando Sumayang Jr Command-New People’s Army (ASJC-NPA) ang iban pa nga mg imbolbado sa pagkamartir sa Tapi 7 nga magsungka sa pinakalapit nga yunit sang NPA.