Amkon an pinakamakusog nga rebolusyunaryo nga diwa, ginbabati yana han mga rebolusyunaryo nga pwersa ha Eastern Visayas an bug-os nga kaapihan han Bagong Hukbong Bayan (BHB) ha ika-57 nga anibersaryo hini. Ginsasaludaran naton an ngatanan nga Pula nga kumander ngan mangaraway ha diri nababantad hini nga pagpasulong han gerra han katawhan kontra ha ngatanan nga pasista nga papet nga rehimen ha haros unom kadekada ngan kontra ha presente nga rehimen US-Marcos.

Sugad han aton kabatasanan, saludaran naton an ngatanan nga rebolusyunaryo nga mga martir nga ginhalad an ira kinabuhi para ha katalwasan han katawhan Pilipino. Utang naton ha ira diri la an diri matutugbangan nga mga leksyon nga naggigiya ha pagpapadayon han rebolusyunaryo nga pakigbisog, kundi an ira liwat diri magpapapas nga pananglitan nga nahatag inspirasyon ha aton pinakamasirum ngan pinakamakuri nga mga adlaw.

An BHB ha Eastern Visayas, sugad han ira nga parte han nasud, ginlapayan an pinakamagkuri nga mga ayat agud igpabilin nga naglalarab an kalayo han gerra han katawhan. Kada tuig an mga gerilya nga mangaraway—armado la hin magluya nga mga armas kontra ha mas makusog nga pangontra, ngan amkon an diri napaperdi nga diwa han pagtatalwas ha masa nga Pilipino tikang ha mga demonyo han imperyalismo, pyudalismo ngan burukrata kapitalismo—ginpakyas an ngatanan nga estratehiko nga kampanya ngan dedlayn nga gindeklara han kada papet nga rehimen. Ini nga mga kampanya, subay ha imperyalista nga doktrina, brutal nga gintarget an sibilyan nga base panmasa pinaagi han butaray nga terorismo han estado, panmasaker ngan ekstrahudisyal nga panmatay, mga pagsikmit ngan iligal nga pangaresto, mga panmomba ngan hamlet, ha katuyuanan nga puguson an BHB ha usa nga lus-ay militar nga sitwasyon.

An sustenido nga kampanya nga supresyon inabot ha waray katupong nga lebel ha mga papet nga rehimen Duterte ngan Marcos Jr. Tungod ha mga internal nga kaluyahan kalakip an grabe nga kusog han kontrarebolusyunaryo nga gerra han kaaway, nag-amkon an Partido ngan an BHB hin mga kaperdihan. Tikang hadto, dugang nga gintagan-lugway han dagko nga negosyo, mga agaron maytuna, ngan lokal nga burukrata kapitalista an mapanhibang nga mina, mga “renewable energy” nga proyekto, mga putos-ha-korapsyon nga proyekto nga pangalsada ngan imprastruktura, kumbersyon han tuna, ngan ekoturismo. Ginhuhukip nira an mga upisyal militar han 8th Infantry Division nga gintuinan nga seguruhon an sugad nga mga aktibidad nga nadambong ha kalibungan ngan nahibang panginabuhi han masa nga parag-uma.

Kundi nagpapabilin an BHB. An armado nga pakig-away nga ginpapasulong han BHB nagseserbe nga lamrag han inspirasyon ha masa nga anakbalhas ha Pilipinas ngan ha bug-os nga kalibutan nga uhaw para ha rebolusyunaryo nga pagbabag-o, labina ha butnga han natikapintas nga inter-imperyalista nga sumpakiay ngan imperyalista nga agresyon, natikaraut nga pan-ekonomiya nga kamutangan, ngan panalapas ha tawhanon nga katungod ngan dignidad. Gintatagan liwat hin bag-o nga karayhak an BHB han kagiusan pagtutul-id nga ginpangunahan han Partido, nga nagtutumuyo nga adman ngan tudlukon an mga pagsasayop nga diri la nakaulang ha pag-uswag kundi nagdurot han mga kaswalti ha nakalabay nga mga tuig.

Duha katuig tikang han magtikang an kagiusan pagtutul-id, dagko na an nakab-ot han mga yunit han BHB kalakip an aada ha Eastern Visayas ha paghaum ha ira moda han operasyon. Ginhimo ini agud maseguro nga an BHB mahugot nga nakikig-usa ha masa, kun kanay an kahiluagon ngan kahilarumon mahilalansar an hiluagan nga ginerilya nga pakiggerra. An sugad nga mga paghahaum nakakabulig liwat ha mga yunit gerilya nga likyan an paglipol han kaaway ngan an mga mapagdesisyon nga aragway, nga ginpapasuntok ha hangin an kaaway. An barubata ngan baltok nga mga anak han katawhan padayon nga ginrerekrut ha BHB ngan ginpapahiara nga kumatin hin dagko nga pampulitika ngan panmilitar nga buruhaton.

Mahugot nga nananawagan an mga rebolusyunaryo nga pwersa ha Eastern Visayas ha BHB nga padayon nga pakusgon an kalugaringon ngan kab-uton an dagko nga kadaugan. Kinahanglan hini singabuton an mga oportunidad nga ginhahatag han ikatulo nga kagiusan magtutul-id agud ipasulong pa hini an pag-aram, pakusgon an kalugaringon ha lipuyok nga pamaagi (ha natad han ideolohiya, pulitika ngan organisasyon), ngan bawion an mga kaperdihan. An Partido nasarig prinsipal ha BHB agud ipasulong an armado nga pakig-away, nga importante kaupay agud padig-unon an nagkakaurusa nga prente ngan hinay-hinay nga tukuron an mga organo han pampulitika nga partido diin tutukuron an Demokratiko nga Gubyerno han Katawhan.

Labaw san-o pa man, kinahanglan hugot nga makig-usa han BHB ha masa. Kinahanglan hini buligan an masa nga parag-uma nga ipasulong an agraryo nga rebolusyon—an pamaagi gud la para hul-os nga masantop han masa an kadunutan han naghahadi nga sistema nga bagakolonyal ngan bagapyudal, ngan ha sugad masantop an programa han demokratiko nga rebolusyon han katawhan. Kinahanglan hini bumulig ha pagtukod han mga asosasyon han parag-uma para mahilansar han masa an mga kontrapyudal nga pakigbisog agud pahimub-on an plete ha tuna, pahitas-on an suhol, pauswagon an kooperasyon ngan produktibidad, ngan kun poyde makakumpiska pa han tuna tikang ha mga despotiko nga agaron maytuna. An mga armado nga gerilya nga aksyon han BHB nagseserbe nga depensahan an mga kadaugan tikang ha panmasa nga pakigbisog, pinaagi han pag-insister han Pula nga pampulitika nga poder ngan depensahan hira tikang ha pagbulos han mga agaron maytuna ngan ira mga mersenaryo.

Ha gilayon, kinahanglan kab-uton han BHB an rebolusyunaryo nga hustisya para ha katawhan. Kinahanglan hini maghimo hin mga anihilatibo nga opensiba kontra ha mas guti, pagal ngan nahihimulag nga yunit han kaaway agud lipulon ngan kumpiskahon an ira mga armasm sugad liwat an mga atritibo nga aksyon agud harason ngan gupungon an mga pasista nga tropa nga nasulod ha mga sona nga gerilya. Kinahanglan liwat hini igpatuman an mga desisyon han husgado han katawhan kontra adton mga responsable ha mga krimen kontra ha katawhan, kalakip an mga krimen ha kalibungan. Ini nga mga armado nga aksyon magmamanilampuson la pinaagi han makusog nga kooperasyon han BHB ngan han masa.

Dako an mahibubulig ha BHB han mga rebolusyunaryo kabatan-unan han Eastern Visayas nga mabaton ha panawagan nga suportahan ngan umapi ha hukbo han katawhan. Ha hiluag nga kabaryuhan, magagamit han kabatan-unan an ira kabatiran ngan talento ha pagserbe ha tinalumpigos nga masa.

An rebolusyunaryo nga kagiusan ha Eastern Visayas mayda hul-os nga kumpyansa nga mahipapatuman han BHB an mga buruhaton hini ngan dad-on an gerra han katawhan ha mas hitaas nga lebel. Bisan kun maluya ngan guti ini yana, tubtub nga gintatagamtaman hini an hiluag ngan hilarum nga suporta han masa, ha tidaraon magigin gamhanan ini nga pwersa nga pababagsakon an armado nga makinarya han estado ngan kab-uton an tinuod nga katalwasan ngan demokrasya para ha katawhan Pilipino. An hul-os nga kadaugan hini amo an kontribusyon han katawhan Pilipino ha pankalibutan nga pakigbisog kontra ha imperyalismo.

Mabuhay an Partido Komunista ng Pilipinas! Mabuhay an Bagong Hukbong Bayan! Mabuhay an rebolusyon Pilipino!
Ipasulong an gerra han katawhan kontra ha korap, pasista ngan papet nga rehimen US-Marcos!
Ipasulong an gerra han katawhan kontra ha kontrarebolusyunaryo nga gerra! Ipasulong an rebolusyunaryo nga gerra kontra ha imperyalista nga gerra!
Tinalumpigos nga katawhan han kalibutan, magkaurusa kontra ha imperyalismo nga US!