Binibigyang-pugay ng Kabataang Makabayan ang mga pulang kumander at kawal ng Bagong Hukbong Bayan para sa ika-56 na anibersaryo ng rebolusyonaryong armadong hukbo ng mamamayang Pilipino. Ipinagbubunyi din ng KM ang lahat ng proletaryong rebolusyonaryong kabataan na naglilingkod sa BHB at ang mamamayang lumalaban.

Sinasaluduhan din ng KM ang mga kumander at kawala ng BHB sa paggapi sa kontrarebolusyonaryong dahas ng rehimeng US-Marcos II, sa pagsusulong ng Kilusang Pagwawast, higit na pagpapaunlad ng teorya at praktika ng matagalang digmang bayan, at walang-maliw na paglilingkod sa mamamayan.

Kinikilala ng KM ang bakal na paninindigan, katapangan, at katapatan sa tungkulin ng Hukbong Bayan. Para sa KM, ang Hukbo ay mabubuting ehemplo ng rebolusyonaryong optimismo, at pagmamahal sa bayan at mamamayan.

Hindi matatawaran ang kabuluhan ng araw na ito para sa buong mamamayan at kabataang dinidelubyo ng krisis ng malakolonyalismo at malapyudalismo. Batid ng dumaraming bilang ng kabataan na ang tanging solusyon sa krisis, at upang iluwal ang mas maalwan at makatarungang kinabukasan ay ang digmang bayan.

Batid ito ng kabataan dahil sa lumalala at hindi naiibsan na pyudal at malapyudal na pagsasamantalang nagbubunsod ng kawalan ng lupa, atrasadong pagsasaka, pagkalugi at pagkabaon sa utang ng mga magsasaka. Sa kawalan ng tunay na repormang agraryo, ang mga lupang sakahan ay kinakamkam ng mga malalaking komprador burgesya para sa kanilang mga negosyo, aliwan, at imprastrakturang hindi mapapakinabangan ng masa. Batid ng kabataan ang kawastuhan ng armadong pakikibaka dahil sa hindi matinding kawalan ng trabaho, hindi nakabubuhay na sahod, kakulangan ng kabuhayan, pagyurak sa mga unyon, at pag-apak sa karapatan sa paggawa, at marami pang iba.

Ganundin, batid ng kabataan na rebolusyon ang tanging landas pasulong dahil sa bulok na sistemang edukasyong nagsisilbi sa interes ng imperyalismo, komersyalisado, at mapaniil. Namumulat ang kabataan sa katotohanan na ang ganitong tipo ng edukasyon ay para lamang sa paglikha ng mura at supil na paggawa na siyang pagsasamantalahan ng mga naghaharing-uri. Nagtataas taon-taon ang matrikula sa harap ng huwad na batas para sa libreng edukasyon habang malawakan ang paniningil ng iba pang mga bayarin sa paaralan. Sinusupil ang mga demokratikong karapatan ng mga estudyante, at kanilang mga organisasyon at pinapasok ng mga sundalo at pulis ang kanilang mga paaralan.

Kung sa gayon, malinaw sa kabataan na nasaan man siya sa bulok na lipunang ito ay malagim ang kanyang kahihinatnan. Kahit mangibang bansa ay hindi niya matatakasan ang talim ng krisis ng imperyalismo, banta ng inter-imperyalistang digma, at napakaraming porma ng pagsasamantala at pang-aapi. Ang tanging pag-asa ng kabataan ay ang pagususulong ng demokratikong rebolusyong bayan.

Ang rebolusyonaryong pakikisangkot ng kabataang Pilipino ay kasing haba ng kasaysayan ng BHB. Sa konsepsyon pa lamang ng BHB, at sa pagpapalakas nito sa dekada sitenta hanggang sa maagang bahagi ng dekada otsenta ay susi ang naging papel ng mga proletaryong rebolusyonaryong kabataan. Aktibo din ang naging papel ng mga nagpanibagong-hubog na mga kabataan sa pagsusulong ng Ikalawang Dakilang Kilusang Pagwawasto upang itakwil ang “Kaliwa” at kanang oportunismo upang bawiin ang lakas at higit na patatagin ang Hukbo. Mula sa dulo ng dekada nubenta hanggang sa bagong milenyo, ang lakas at talino ng mga kabataang rebolusyonaryo ay nilaan para sa walang kaparis na pagpapalawak at pagpapaigiting ng digmang bayan.

Sa dekada na ito, tampok na ang katapangan at kahandaang magsakripisyo ng mga kabataan para sa pambansang demokrasya at sosyalismo. Nakahanay sa bulwagan ng mga bayani ng KM ang mga kabataang rebolusyonaryo na nag-alay ng ng buhay para sa mamamayan. Pinagpupugayan ng KM si Kevin “Ka Facio” Castro, Queenie “Ka Kira” Daraman, Arc John “Ka Hunter” Varon, Lennel “Ka Morga” Domanais, Joshua “Ka Kiko” Regalado, at Angelo “Ka Kaloy” del Rosario, Markus “Ka Reb” Tayco, Royce “Ka Alex” Magtira, Baby Jane “”Ka Binhi” Orbe, Asaze “Ka Shyla” Galang, Archie “Ka Ron” Arceta, Hannah “Ka Maya” Cesista, at iba pang nagbuwis ng buhay para sa mamamayan at rebolusyong Pilipino.

Aalalahanin ng KM ang ehemplo ng mga bayani’t martir na inalay ang lahat para sa rebolusyonaryong adhikain ng proletaryong Pilipino, sa walang pag-iimbot na pagsusulong ng digmang bayan, matapat na paglilingkod sa masa, at determinadong paglaban sa rehimeng US-Marcos II.

Ang BHB ang bayani ng mamamayan at kabataang Pilipino—naghahawan ito ng landas para sa mas makatarungang kinabukasan sa pamamagitan ng armadong pakikibaka. Kaya naman sa pagharap ng BHB sa mas malalaking hamon sa gitna ng Kilusang Pagwawasto, titindig ang KM bilang maaasahang katuwang at balon ng mga susunod na pulang kumander at mandirigma. Handa ang KM, kasama ng mamamayang pinagsasamantalahan at ang Hukbo nito na magpursige hanggang tumalunton sa mas abanteng yugto ng digmang bayan.

Kabataan, tumungo sa kanayunan! Sumapi sa Bagong Hukbong Bayan!
Palakasin at palawakin ang BHB! Isulong ang pambansa demokratikong rebolusyon!
Mabuhay ang BHB! Mabuhay ang proletaryo at mamamayang Pilipino!