Waray kaluoy nga ginpanmusil ngan ginpabuthan han pira nga M203 han diri mamenos ha unom nga elemento han 46th IB an duha nga magbugto nga parag-uma ha bawnderi han Sityo San Pedro, Poblacion 3, San Jose de Buan hadton Enero 3, ala-1 han kulop.

Basar ha pag-iimbestiga han Arnulfo Ortiz Command-BHB Western Samar ha nahireport nga bubto ha Sityo San Pedro nahibaruan nga an duha nga magbugto nga lalaki nga pareho nga menor de edad naghahakot han ira igbaraligya nga uring han makahitapo an tulo nga sundalo ngan tigda nala hira nga ginpabuthan. Basar ha asoy han bugto nga nakatalwas, mayda mga igo ha dughan, kamot ngan siki an iya manghud. Agud talwason an kalugaringon, linsuong hya ha gin-aapo nga salog tubtub ha talwas nga nakauli ha ira balay.

Diri pa maaram an pamilya han tinuod nga nahitabo ha ira manghud ha kamot han mga sundalo. Nahahadlok naman an pamilya nga magdayag ngan magreklamo. Tungod ha makangingirhat nga pagpatay kan Norberto Gabane han elemento han 87th IB hadton Hulyo 30, 2022, nalikay hira nga balikan han sundalo ngan bangin may patayon na liwat ha pamilya sanglit nagmingaw nala hira.

Sigon ha mga kag-anak han biktima, antes pa magpasko nag-uuring na an magbugto han mga gin-aro nga bagol ha mga kasapit nga kalibuan. Aada ha ₱26 kada kilo an presyo han uring ha bungto hito nga mga panahon ngan naniningkamot nga kumita an magbugto para makapalit han smartphone, sigon pa ha iroy han duha nga batan-on. An ginhahakot nala nira hiton nga adlaw an nasalin pa nira nga uring nga waray nira mapanginano antes mag-Ba-go nga Tuig. Tungod ha karuyagon nga makapagdeliber ha nag-order han uring ngan makumpleto an kinahanglanon nga kwarta nga igparalit han smartphone antes an patron ha San Jose de Buan, ginsungsong han magbugto an peligro han baha nga salog. Kundi natapos an ira hingyap tungod kay ginpatay han mga pasista nga tropa an barubata nga parag-uma.

Mahugot nga ginkukundenar han Arnulfo Ortiz Command an brutal nga pagpatay han 46IB ha nagpapakabuhi nga kabatan-unan. Ruruyagon la hira nga makab-ot an simple nga hingyap ha luyo han ira kakurian. An sugad hini nga waray wantas nga pangingistraping binuhatan han mga tinuod nga mga berdugo ngan terorista kontra ha katawhan.