Bakak ang gipasigarbo sa kaaway nga naigo sa banatan ang magtiayong Ka Layka ug Ka Yuno(Uno). Niadtong Setyembre 1 sa hapon nadakpan ang magtiayong Ka Layka ug Ka Yuno sa Barangay Kapitan Bayong, Impasug-ong, Bukidnon. Sa pagka Setyembre 4 gibalita na dayon sa 4ID nga napatay sa 15-minuto nga engkwentro sila Ka Layka ug Ka Yuno sa banatan nga nahitabo sa Sept 3. Sila lang duha ang matod napatay sa maong banatan ug nakuha ang duha ka AK47 nga armas ug mga butang. Daw gipili gyud sa mga bala sa kaaway nga silang duha ang maigo sa gipanghambog nga 15-minuto nga banatan. Maigo gyud silang duha sa mga bala sa berdugo ug mapatay kay gipamusil sila nga dinakpan na. Mga “hors de combat” sila, walay katakus mosukol nga gipangpusil sa mga elemento sa 4ID PA.

Si Ka Yuno o Vincent Isagani Madlos anak sa gipatay usab sa kaaway nga si Ka Oris ug si Ka Layka o Glorivic Campos Belandres, mga myembro sa BHB. Kay anak lagi ni Ka Oris, apil sila sa gitarget sa 4ID nga patyon aron dili na makapadayon sa ilang pagserbisyo sa katawhang Pilipino pinaagi sa pagrebolusyon.

Nadakpan sila sa barangay nga anaa sa national highway, padulong unta sila syudad alang sa usa ka gimbuhaton nga dili mahimo sa sona. Naay medikal nga panginahanglan usab si Ka Yuno nga may samad sa bat-ang diha sa banatan. Wala silay dalang armas sa ilang paggawas gikan sa sona.

Nagmaya ang 4ID sa ilang giangkon nga bakak nga kadaugan, tinalawan nga kadaugan. Nganong dili na man lang nila angkonon nga nadakpan kini og ilang gipamusil kay mao na kini ang palisiya sa gobernong US-Marcos jr. nga sumpay pa palisiya ni Digong Duterte.

Bag-o lang gyud miingon ang bise presidente nga si Sara Duterte uban sa AFP/PNP Command Conference nga dili angay kaloy-an ang mga rebolusyonaryo (nga gibansagan nila nga mga terorista) ug mga kriminal. Nagbendisyon lang kini nga patyon silang Ka Layka ug Ka Yuno ug ubang mga rebolusyonaryo nga ilang biktima.

Mga bata pa sila Ka Layka ug Ka Yuno, apan gikutlo sa mga berdugo ang ilang bililhong kinabuhi. Gihikawan sa mga berdugo ang katawhang Pilipino sa mahimo pa unta nga mga bulawanong tampo nilang Ka Layka ug Ka Uno.

Alang sa usa ka inahang rebolusyonaryo, dili pwede mohilak sa ilang kamatayon, kay dili pwede ihilak ang kayugot ngadto sa mga berdugo, dili pwede ihilak ang kasubo nga gibali ngadto sa kaisog. Turn grief into courage, matud pa.

Kung madumduman sama kang Ka Oris nga gidakop usab niadtong Oktubre 29, 2021, samtang nagbiyahe padulong sa pagpatambal, ug nga gipasigarbo dayon sa 41D nga napatay nila sa usa ka banatan ang 72 anyos nga rebolusyonaryo.

Ihunong ang pagpatay sa mga “hors de combat” nga mga rebolusyonaryo.