Nagpapahayag an Partido Komunista ng Pilipinas hin maksimum nga kangalas kontra ha imperyalista nga gubyerno han US han pasista nga tuyaw nga hi Donald Trump ngan han Zionista nga estado han Israel han igkasi pasista nga hi Benjamin Netanyahu ha paghimo hadton Pebrero 28 han tinagdako nga misayl nga pangatake kontra ha Iran.

An butaray nga atake tinuyo ngan patraydor nga ginhimo ha butnga han nukleyar nga negosasyon. Kaupod an ngatanan nga rebolusyunaryo nga pwersa ha Pilipinas, nakikig-usa an Partido ha nahigugma-ha-kamurayawan nga katawhan han Iran ha mahugot nga pagkundenar ha misayl nga pangatake nga usa nga butaray nga pag-atake ha soberaniya han Iran ngan nasupak ha pankalibutan nga ginkakarawat nga internasyunal nga mga balaud.

Ginhimo an tinagdako nga pangatake ha sentro han gubyerno han Iran nga nagpatay ha Supreme Leader han nasud nga hi Ayatollah Ali Khamenei ngan iba nga yawe nga lider han gubyerno. Ginhimo ni Trump an pagpatay kan Khamenei basar ha sayop nga pagtuo nga mapupugos hini an katawhan nga Iranian nga karawton an panmilitar, pan-ekonomiya ngan pampulitika nga mga dikta han US ngan igsurender an soberaniya han Iran. An panmatay, lugod, piho nga mas mag-uurusa ha katawhan nga Iranian nga maiha na nga gin-aatuhan an imperyalista nga panmuypoy.

Responsable hira Donald Trump ngan Benjamin Netanyahu ha dako nga ihap han pagkamatay nga gindurot han dagko nga pangatake nga ginhimo subay ha ira mando. Subay ha inisyal nga mga report nagresulta an dagko nga pangatake ha pagkamatay han masobra 200 katawo, upod an 148 katawo, kadak-an mga estudyante nga babaye, kahuman maigo han mga misayl han ira eskoylahan ha syudad ha baybayon nga Minab. Damo pa an posible nga patay.

Atubangan han panmilitar nga atake han US ngan Israel ha soberaniya hini, mayda gud katungod an Iran nga depensahan an kalugaringon pinaagi han paghimo han pagbulos ha pangatake ha mga panmilitar nga pasilidad han Israel ngan mga base militar ngan aircraft carrier han US, labina ha Middle East. An pagpintas han armado nga sumpakiay ha rehiyon direkta nga resulta han imperyalista nga interbensyon han US ngan panmilitar nga hegemonismo.

An magkatig-ob nga panmilitar nga atake piho nga gintutumuyo nga pwersahon an katawhan han Iran nga yumukbo ha demanda han imperyalista nga US nga igsurender an ira soberaniya, ngan an ira nasyunal nga kontrol ha lana ngan iba pa nga mineral nga rekurso. Tungod kay gin-insister han Iran an nasyunal nga soberaniya hini ngan ginsuportahan an iba nga mga pwersa nga naato ha imperyalismo nga Amerikano, maiha na nga karuyag nga lupigon an nasud agud mahiestablisar an waray karibal nga hegemoniya hini ha Middle East.

Ini an pinakabag-o nga pitad han panmilitar nga agresyon han mga imperyalista nga US. Tungod kay naatubang ha natikaiha nga pan-ekonomiya nga krisis ngan tikapintas nga kumpetisyon, ginduduso han mga monopolyo kapitalista nga US nga agawon an kontrol ha mas damo pa nga surok han lana ngan mga kritikal nga mineral, sugad liwat an mga merkado ha kalibutan agud tambakan han sarplas nga epektos. Ha sakob liwat hini nga konteksto amo nga, waray pa magduha kabulan an nakalabay, naghimo an mga imperyalista nga US hin atake kontra ha Venezuela ngan ginsikmit an lider hini nga hi Nicolas Maduro upod an asawa nga hi Cilia Flores, ha butaray nga pag-atentar nga kontrolon an mga rekurso ha lana han nasud.

Ginsundan ini han mga mando ni Trump ha mga panmilitar nga pwersa han US nga agawon an mga oil tanker tikang ha Venezuela, ginpagrabe nga pan-ekonomiya nga sangsyon ngan pag-atentar nga payukbuon an Cuba, pananarhug ha Mexico, Colombia ngan iba nga Latin American nga nasud nga natipa ha pagbalik ni Trump ha Monroe Doctrine, butaray nga mga deklarasyon han pag-agaw ha Greenland, pagpaluya ha United Nations ngan iba pa nga akto han unilateralismo. Ngatanan ini ginbubuksas an pagin ipokrito han kunuhay “rules-based order” (kaayusan nga nakabasar ha pagsurundon). Padayon nga nakikigkonsabuhay an US ha Israel agud ig-imponer an hegemoniko nga mga katuyuanan hini kontra ha katawhan nga Palestinian ha Gaza.

Padayon nga ginpupuntirya han US an Asia, pinaagi han waray wantas nga pag-atentar nga sulsulan an Taiwan nga magdeklara han paglulugaring, ngan paggamit ha Pilipinas agud mag-istak han armas, magpusisyon han mga tropa nga Amerikano, ngan maglansar hin war exercises, ngatanan agud papintason an panmilitar nga tensyon ha China.

Nananawagan an Partido ha katawhan Pilipino, kaupod an mga migrante nga trabahador ha Middle East, nga makig-usa ha katawhan han Iran samtang gin-aatuhan nira an panmilitar nga pangatake han US, ngan umato agud depensahan an ira soberaniya kontra ha mga pag-atentar nga payukbuon hira. Nananawagan kami ha ngatanan nga patriyotiko ngan kontra-imperyalista nga pwersa nga manindugan agud tipahan an panmilitar nga agresyon han US ha bug-os nga kalibutan, ngan paundangon ini nga maglansar pa hin mga gerra ha ngaran han mga interes han US.

Atubangan han mga tarhug nga madanas ha usa nga gerra nga sinulsulan han US, mayda dako nga panginahanglan para ha katawhan Pilipino nga magtukod han usa nga hiluag nga nagkakaurusa nga prente kontra ha panulsol ha gerra han US, ngan pahitas-on an ira demenda para ha mga gubyerno han US ngan Pilipinas nga bungkagon an ngatanan nga base militar ngan pasilidad han US ha Pilipinas, tanggalon an mga misayl han US ngan iba pa nga armas ha gerra nga nakaistak ha mga sikreto nga lokasyon ha nasud, tanggalon an ngatanan nga tropa han US ha nasud, ngan ig-atras an presensya han pwersa nabal han US ha West Philippine Sea ngan South China Sea. Kinahanglan nira pakusgon an demanda nga igbasura an Enhanced Defense Cooperation Agreement (EDCA), an Visiting Forces Agreement (VFA), an Mutual Defense Treaty (MDT) ngan ngatanan nga diri pantay nga panmilitar nga tratado ha US ngan igduso an naglulugaringon nga palisiya nga pan-gawas.

Kinahanglan nira magtukod han internasyunal nga pakig-usa ha katawhan han South Korea ngan Japan diin nag-iinsister liwat an katawhan nga matalwas hira ha panmilitar nga presensya han Amerika, ngan ha ngatanan nga katawhan ha bug-os nga kalibutan nga nag-iinsister han pagpaundang ha makinarya ha gerra han US.

Mayda dako nga panginahanglan para ha klase nga trabahador ngan rebolusyunaryo nga proletaryado ha bug-os nga kalibutan nga magkaurusa ngan pamunuan an ngatanan nga demokratiko ngan kontra-imperyalista nga pwersa ha pag-ato ha imperyalismo ngan an mga tarhug hini han gerra. Kinahanglan nira pamunuan an mga rebolusyunaryo nga pakigbisog ha ngatanan nga nasud nga magpasulong hin rebolusyunaryo nga mga pakiggerra para ipakigbisog an nasyunal nga katalwasan ngan sosyalismo, komo yawe ha pakigbisog agud tapuson an mga imperyalista nga gerra ngan kab-uton an tinuod nga pankalibutan nga kamurayawan.