Nanghalit na man ang butigon kag berdugong batalyon nga 94th IB sa isa ka mamumugon sa kampo sadtong Hunyo 6, 2025 pasado alas-2:00 sang hapon sa Sityo Bugtangan, Barangay Buenavista, Himamaylan City, Negros Occidental.

Gintiro kag ginpatay sang nasambit nga militar si Junjun Binoy, 24 anyos, soltero, sa iya nga kamalig sa amo nga lugar. Wala sang engkwentro nga natabo kag wala sang yunit sang NPA sa palibot sa sini nga panahon.

Suno sa inisyal nga mga datos, ginkadtuan sang mga mersenaryong tropa upod sa mga surrenderees ang kamalig ni Binoy kag didto ginpatay. Sa sini nga panahon, nagapamugon ang biktima sa isa ka talamnan. Dugang pa, ang amay ni Junjun nga si Judy Binoy, 59 anyos, gintayaan, ginpahog, ginpahapa kag ginpabay-an nga maulanan sang mga pasista samtang ila ginpatay si Junjun. Sa subong, grabe ang kahadlok nga nabatyagan sa pamilya sa natabo.

Pagkatapos sang makasiligni nga krimen, gilayon nga gingamit sang 94th IB ang ila pabalik-balik nga script, sa porma sang pekeng engkwentro para panghinabunan ang ila pagpamatay.

Gintamnan dayon sang armas nga M16 bilang ebidensya ang biktima kag gindeklara nga Pulang hangaway, pareho sang pila na ka biktima sang paglapas sang tawhanon nga kinamatarung.

Indi katapuan sang NPA, kag sibilyan lang si Binoy. Ika-11 nga biktima sa pagpamatay si Binoy sa South Central Negros idalom sa rehimen US-Marcos II halin 2022.

Kadungan sini nga krimen ang malawig na nga focused military operations (FMO) sa bukiran nga mga barangay sang Buenavista, Carabalan, kag Mahalang tanan sakop sang Himamaylan City; mga barangay sang Orong, Oringao, Tan-awan kag Hilamonan nga sakop sang Kabankalan City; kag mga barangay sang Santol kag Biao sa Binalbagan halin sa bulan sang Mayo tubtob subong.

Nagatiner ang tropa militar sa tunga pa sang mga komunidad sang mga mangunguma, sa pihak sang ila pagpanginto nga deklarasyon nga ‘insurgency-free’ na ang isla sang Negros.

Bangud sa pagka-desperado sang rehimen US-Marcos II kag sa iya mga ido buang nga bayaran, berdugo, kag butigon nga mga tropa sang Armed Forces of the Philippines (AFP), ginabiktima nila ang mga inosenteng sibilyan sa pagpati nga ini ang makatapna sang rebolusyonaryong diwa sa pumuluyo para maghiliugyon kag magbato sa garuk nga sistema nga naglubong sa ila sa kapigaduhon kag kagutom.

Sa baylo, ang ila wala untat nga pagpamintas amo ang makapamuklat sa pumuluyo nga ang armadong rebolusyon lang ang paagi para mapasabat kag mahatagan sang hustisya ang mga biktima sang ila maduguon nga hinimoan.