Mabaskog nga ginakondenar sang Leonardo Panaligan Command-New People’s Army ang pilit nga paglusob sang mga katapo sang 62nd IB sa panimalay Tubalado kag brutal nga pagtiro-patay Kay Bunny Tubalado, mangunguma, may asawa kag mga kabataan sang sityo Karanawan, Barangay Amuntay, Binalbagan, Negros Occidental, Disyembre 6, 2023 las 5:00 sang kaagahon. Peke naman nga engkwentro sa tunga sang NPA kag AFP ang ginhinabon sang berdugong 62nd IB.

Tuig 2014 nangin miserable ang pangabuhi sang biktima bangud ginpasibangdan siya sang pasistang militar nga supporter sang NPA. Rason man nga haluson na siya makapanguma bangud ginalagas siya sang tropa militar. Tuig 2023 naninguha siya nga mag-atubang sa militar para klaruhon ang mga pagpasibangud sa iya. Sa baylo sang iya masami nga pag-atubang sa militar gikan sadto nangin biktima pa siya sang kapintas kag wala-kaluoy nga pagpatay. Nagtuga ini sang trauma sa iya mga kabataan, asawa kag mga kasilingan.

Lubos man ginakondenar sang LPC ang nerbyusong 62nd IB sa pagpangkastigo sang 3 ka mag-utod nga Gallego sang sityo Paho, Barangay Kabagnaan, La Castellana, Negros Occidental pasado alas 8:00 sang gab-i Disyembre 5. Ginkastigo sang pasistang 62nd IB nga naga-operasyon ang mag-utod samtang nagapanulo-paniro sang pispis sa nasambit nga lugar.

Nadumduman, Nobyembre 29 sang aga, ginkastigo man sang berdugong 62nd IB si Don-don Dandoy, pamatan-on kag mangunguma sang sityo Buragwak, Barangay Manghanoy, La Castellana, Negros Occidental. Nobyembre 23 sang gab-i nagpakuno-kuno man ang tropa sang 62nd IB nga mga katapo sang NPA kag nangilkil sang P2,000.00 sa pobre nga pamilya Garsula sa sityo Patag, Barangay Riverside, Isabela, Negros Occidental. Nadimat kag wala pa gid naayawan ang nasambit nga tropa, kaagahon sang Nobyembre 24 liwat naman nga ginlusob ang nasambit nga panimalay ni Bitoy Garsula. Ginransak sang militar ang panimalay, ginpang-ukay ang kagamitan kag ginpangdala pa ang kagamitan lakip na ang wala maisipan nga kantidad sang kwarta sang biktima.

Wala sang handum nga kalinong ang reaksyonaryong AFP sa isla sang Negros dira sa pagpanguna ni B/Gen. Orlando Edralin sang 303rd Bde kag Lt. Col. William Pesase Jr sang 62nd IBPA. Ang nagapadayon nga pagpamintas kag pangpanglapas sang tawhanon nga kinamatarung sang mga sibilyan kag inosenteng mangunguma sa kaumahan sang Central Negros, ang muklat nga kalakasan sang berdugong militar ilabe na ang uhaw sa dugo nga mga katapo sang 62nd IB, ang nagasabotahe sa ginpirmahan nga Oslo Joint Statement sang NDFP kag GRP sadtong Nobyembre 23, 2023 sa Oslo, Norway para sa liwat nga pagbukas sang Peacetalks agud solbaron ang ugat sang gyera sibil sa pungsod sa pagpaluntad sang just and lasting peace nga madugày na nga ginahandum sang malapad nga pumuluyong Pilipino.#