Wala sang handum nga kalinong kundi maduguon, brutal kag pasismo ang gusto nga isabat sang gobyernong Marcos Jr upod sa iya National Security Council (NSC) adviser nga si Eduardo Año sa pagsolbar sang gyera sibil sa pungsod. Gintin-aw nila ang ila tindog sa ila pagsirado sang liwat nga pagpadayon sang paghambalanay sang kalinong (peace talk) sa tunga sang GRP kag sang National Democratic Front of the Philippines (NDFP).

Ngaa isungka sang NPA ang ila armas kon amo ini ang magadepensa sa pumuluyo batuk sa mga uhaw sa dugo nga Armed Forces of the Philippines (AFP)-Philippine National Police (PNP) kag mga paramilitar sini nga nagapang-atake sa mga mangunguma sa kabukiran? Ngaa igasungka sini ang nagapangunang porma sang paghimakas kag rason ngaa napundar kag naagum ang madamo nga kadalag-an sa lain-lain nga patag sa halos 55 ka tuig na sini nga paghimakas?

Mapaniplang ang tuyo sa kampo ni Marcos Jr kag NSC adviser Año sa ila mga kondisyon nga ginlahad para sa pagpadayon sang peace talk. Tin-aw nga ang ultimo nga tinutuyo sini amo ang paglupog kag pagpasurender sa bilog nga rebolusyonaryong kahublagan ilabina sa armadong pwersa sini nga amo ang NPA. Makita ini sa teroristang patakaran sang estado sa wala untat nga pagpamatay sang mga progresibong lider, pagdukot, pagtortyur, pagpamahug, pagpamomba sa komunidad kag iban pa nga porma sang pagpang-atake kag pasismo sang estado sa idalom US-Marcos Jr nga rehimen.

Kabaliskaran sa tuyo sang Communist Party of the Philippines CPP-NDF, paagi sa peace talk, nga solbaron ang ugat sang gyera sibil paagi sa politikal kag ekonomikanhong mga reporma nga magasabat sa lain-lain nga demanda sang pumuluyong Pilipino ilabina sa sahing ginahimuslan kag ginapigos.

Sa deklarasyon ni Año, nagapakita lang nga siya lakip si Marcos Jr mga utok-pulbura kag desperado nga mapukan ang bilog nga demokratikong pwersa kag para lubos nga mapakita sa ila amo nga imperyalismong US nga sundon nila tanan nga mando sini bisan pa makompromiso ang kaayuhan sang mayoriya sang pumuluyo sa pungsod.

Athag sa bilog nga rebolusyonaryong kahublagan nga ang armadong kusog lamang nga NPA ang rason ngaa magsulod ang Gobyerno sa Republika sa Pilipinas (GRP) sa hambalanay sa kalinong. Sa esensya, ang pang-away nga pwersa sang CPP, ang magaduso nga malab-ot ang matuod nga kahilwayan, demokrasya kag kalinong sa bilog nga pungsod. Paagi sa lupok sang pusil kag pagpabaskog sang NPA mareyalisar sang pumuluyo ang ila handum para sa isa ka masanag nga bwasdamlag.

May peace talk man ukon wala, kutob indi mabag-o ang mapiguson kag mahimuslanon nga sistema sang pungsod padayon nga magapabaskog ang NPA sang iya hanay, magalunsar sang taktikal nga opensiba kag magapundar sang organong gahum sa pulitika sa kabukiran.