Ginpatuman sa isa ka yunit sang Pulang hukbo idalom sang Mt.Cansermon Command-New People’s Army (MCC-NPA) ang silot kamatayon kay Raul Emancino, 49 anyos sa Sitio Kulihao, Brgy. Buenavista, Himamaylan City, Negros Occidental sadtong Mayo 25 pasado alas-12:40 sang udto.

Si Emancino isa ka masupog nga intel asset. Isa siya sa suspek sa pagkapatay sa duha ka katapo sang NPA mismo sa iya balay sadtong Abril 2022. Madumduman nga sadtong Abril 1, 2022, gindakop sa balay ni Emancino ang mag-asawa nga sanday Elbert Nicholas “Ka Carding” kag Je-is “Ka Clea” Quillano kag brutal nga ginpatay sang gintingub nga mga katapo sang Criminal Investigation and Detection Group (CIDG), Philippine National Police (PNP)kag 94th IB. Ginpagwa sang 94th IB nga may natabo nga engkwentro sa tunga sang militar kag yunit sang MCC-NPA sa amu nga lugar kag ang mag-asawa ang napatay sa amu nga engkwentro.

Sa proseso sang pagtalakay sa Rebolusyonaryong Korte sa Pumuluyo kag bilang kinamatarung sang suspetsado, ginpatawag si Emancino para sa pagsabat kag pagpaathag sa iya bahin sa amo nga kaso. Matapos ang maid-id nga pag-imbestiga, pagpadalom kag pagtalakay sa kaso, napamatud-an kag napamatbatan sang Rebolusyonaryong Korte nga may daku siya nga kahilabtanan sa pagkapatay sang duha ka NPA. Bisan ara pa sa proseso sang pagtalakay sa iya kaso, padayon man gihapon ini sang iya pagpanilag kag nagareport sa hulag sang NPA sa area.

Indi mag-untat ang NPA sa pagpasabat sa mga may utang nga dugo kag sala batuk sa pumuluyo kag sa rebolusyonaryong kahublagan kag tinguhaan sini nga mahatagan sang hustisya ang mga pumuluyo nga biktima sa pasistang rehimen Marcos Jr. kag sa iya mga bayarang AFP-PNP kag iban nga makinaryas nga ginagamit sini.

Sa pihak nga bahin, padayon ang MCC-NPA nga nagapanawagan, nagapaintindi kag nagapangabay sa pumuluyo nga indi gid magpa-into kag magpahaylo sa mga pasalig sang AFP/PNP.

Sa buligay sang NPA kag pumuluyo, malab-ot naton ang matuod nga kalinong kag demokrasya.

Hublasan ang militarisasyon kag pasismo sa berdugo nga AFP/PNP sa kaumhan sa South Central Negros!