Ginkundenar han mga rebolusyunaryo nga pwersa ha Eastern Visayas an pagpalit hadin naglabay han rehimen Marcos Jr han 12 pa nga yunit han FA-50 fighter jet, kunuhay agud “pakusgon an pan-gawas nga depensa,” gagamiton agud papintason an panmomba ha mga komunidad han parag-uma.

“Gin-uutro na liwat han rehimen US-Marcos pinaagi han Department of National Defense ini nga buwa,” sering han National Democratic Front-Eastern Visayas (NDF-EV). “Sugad ha nakalabay, gin-gagamit an mga fighter jet ha brutal nga gerra hini kontra ha masa nga parag-uma ha kabaryuhan.”

“Angay papagbatunon an rehimen Marcos para ha hiluagan nga ugmad (troma) ngan destroso ha propyedad ngan kalibungan nga gindurot han kampanya han panmomba tikang ha kahanginan, kun diin waray paglalain nga gin-aatake an katawhan.”

Subay ha natirok nga mga report tikang ha Bagong Hukbong Bayan, an mga aada ha serbisyo nga FA-50 fighter jet gin-gamit ha diri mamenos 10 nga aerial bombing ha upat ha unom nga prubinsya ha rehiyon. Diri mamenos ha usa an ginhimo kada tuig tikang 2019-2024, diin pinakadamo nga insidente (tulo) nahitabo hadton 2021 ngan 2022.

Tinagdagko nga panalapas han balaudnon han gerra an makikit-an ha masunod nga mga kaso han aerial bombing:

• Marso 2024 ha interyor nga parte han Palapag, Northern Samar. Ginpatay an parag-uma nga hi Tuwing Lucendo han mga “smart bomb,” kundi nagbinuwa an militar nga namatay hiya ha usa nga panmilitar nga engkwentro.
• Nobyembre 2022 ha Barangay Imelda, Las Navas, Northern Samar. Kahuman han panmomba, ginpailarum liwat an mga residente han barangay ha lockdown (hamlet) hin pira kaadlaw samtang ginsulaysukay han mga tropa an ira mga uma.
• Pebrero 2022 ha Barangay Deit de Turag, Silvino Lobos, Northern Samar. Dorudosena nga kalubian han usa nga lokal nga residente an nahibang ngan diri na nabunga.
• Septyembre 2021, ha tri-boundary area han mga prubinsya ha Samar, kalakip an mga baryo han Las Navas. Pira nga bablay ngan uma an nahibang. An mga parag-uma nga hinigda ha ira kalawid napukaw han tunog han edro. Han gumawas an usa ha ira agud mag-imbestiga ngan magpasuna han iya ispat, gin-istraping hiya. Nagdadlagan an mga ugmaron nga taghimaryo kaupod an kabataan ha kahadlok ha mga pagbuto.

Agosto 2021 Barangay Osmeña, Dolores, Eastern Samar. Usa nga projectile an nakaluho ha atop ha balay han usa nga tagabaryo nga nakatindog pira kakilometro an distansya ha pokus han mga atake. Diri makagawas an mga residente han baryo ha kahadlok ha mga bomba.

Oktubre 2019, Barangay Caputoan, Las Navas, Northern Samar. Usa nga kalawid ngan umhanan han dorudosena nga residente an naruba. Nagbilin an mga bomba hin mga luho nga 15 piye an kahilarumon.

Ginsukna liwat han NDF-EV an rehimen Marcos ha pagmalgastar ha limitado nga rekurso han gubyerno agud padamuon an mga armas hini ha gerra, imbes nga maghatag hin libre nga irigasyon ngan pagpalit han humay han mga parag-uma ha eksakto nga presyo agud seguruhon nga barato an bugas, labot ha iba pa nga pauswagon ha sektor han agrikultura.

“Waray gud labot hi Marcos ha natikagrabe nga kagutom ngan kakablasan han masa nga parag-uma, nga diri gud masosolbar han mga bag-o nga uyasan ha gerra. Mas grabe pa, ginbomba han 8th Infantry Division an mga umhanan diin kulang gidaan an pagkaon,” dugang han NDF-EV.

Haros ngatanan nga kaso han aerial bombing ngan panganyon ginhimo ha mga umhanan ha Northern Samar. Partikular ha erya han Pacific, ha Silvino Lobos, ngan ha bawnderi han prubinsya ha Western Samar, mas haligot an mga hagna. An mga parag-uma nga waray kalugaringon nga tuna kinahanglan kumita pinaagi han cash crops, sugad han lukad, agud makasakli hin bugas—diin an usa kasako nabalor na yana hin P2,300 diri pa kalakip an pamasahe.

“Kun nahulog hin mga bomba an mga pasista nga tropa, nag-ooperasyon ha gawas han mga baryo, ngan ginla-lockdown an mga barangay, tiunan-o makita an mga kablas nga parag-uma para makapalit hin pagkaon? Yana, diri na ngani nira akos makakaon luto hin tulo kabeses kada adlaw.”

Marcos, gindadanas an PH ha sumpakiay han US-China

Nagpahimatngon liwat an NDF-EV ha rehimen Marcos nga an pag-insister ha usa nga militarista nga daup ha isyu kasumpay han South China Sea, ha pagsulsol han imperyalismo nga US, magpapagrabe la han tensyon ha nasering nga internasyunal nga kadagatan.

“Ha panginyupo ha iya mga imperyalista nga agaron, ginhihimo ni Marcos an Pilipinas komo proxy ha estratehiya nga ‘first-island chain’ (syahan nga kaw-it han mga isla) han US kontra China.

“Kinahanglan idemanda han katawhan Pilipino nga resolbahon an mga tipa-tipa ha kadagatan ha diplomatiko nga mga pamaagi, nga ig-insister an soberaniya han nasud ha mga teritoryo hini ngan exclusive economic zone kalakip an West Philippine Sea, ngan pakalmahon an tensyon ha South China Sea para ha komun nga interes han mga katawhan ha palibot hini nga kadagatan.

“Kundi an paglansar han mga pagpatrulya ha kadagatan ngan war games ha US, nga waray unta sarabutan nga mahingadto ngan naghihingyap la nga perdihon an pag-ayat han China ha natikadugmok nga hegemoniya hini ha kalibutan, diri makakapugong ha China. Gindadanas la ni Marcos an katawhan Pilipino ha usa nga gerra nga ginsusulsol han imperyalista nga US,” sering han NDF-EV.