Wala sang natabo nga engkwentro sa Guihulngan subong nga bulan sang Oktubre 2022. Lunsay binutig kag patalang ang ginawakal ni B/Gen. Inosencio Pasaporte.

Wala man sang lehitimo nga engkwentro sa tunga sang New People’s Army kag 62nd IB sa sityo Banderahan, Brgy Trinidad, Guihulngan sadtong Oktubre 13, 2022 sang aga, kundi desperado nga nagpakilala ang 62nd IB nga mga katapo sang NPA, nagpinalupok kag patarasak nga nagpaniro sa payag ni Merlinda Benero sa sityo Tagbak, Brgy Macagahay, Moises Padilla antis pa man nga ginransak sini ang nasambit nga payag-palahuwayan sang nasambit nga pamilya. Ginkawat kag gin-ihaw sang katapo sang 62nd IB ang 5 ka sinagod nga manok sang pamilya Benero. Gintamnan sang armas-luthang, backpack kag iban pa nga ebidensya agud papatihon ang publiko sa mga linubid nga mga istorya kag kabutigan ni Pasaporte.

Ang matuod, Oktubre 13-nagpangsaka-saka kag nagpangkastigo ang 62nd IB sa mga sibilyan sang sityo Banderahan. Gin-imbestigar, ginkuga kag gintiklod sini si Maysil Callora, 26 anyos, lalaki kag may asawa sang sityo Banderahan, Brgy Trinidad, Guihulngan. Ginsaka man ang mga puluy-an sang pamilya Memes, Callora, Benero kag Pat sang amo gihapon nga lugar. Ginpahug ang mga ini kay kuno mga “NPA supporters” kag may ginatago nga mga katapo sang New People’s Army sa ila mga kabalayan.

Wala gihapon sang engkwentro sa tunga sang NPA kag 62nd IB sa Brgy. Calupaan, Guihulngan sadtong Oktubre 12, 2022 sang hapon, kundi isa ka madinalag-on nga sniping operation nga ginlunsar sang LPC-NPA batok sa tropa sang pasistang 62nd IBPA dira sa sityo Mapun-as, Brgy Guba, Vallehermoso. Kwarenta metros (40 meters) ang distansya kag nagatinumpok ang pasistang tropa sang gin-snipe sang NPA. Nagresulta ini sang kamatayon sang 1 ka katapo sang militar kag pagdinalagan sang iban pa. Hungod naman nga ginlikom sang nasambit nga tropa militar ang ila kaswalti. Wala sang kaswalti kag matawhay naman nga naka-atras ang NPA.

Samtang, sadtong Oktubre 12 pasado alas 5:00 sang hapon ginsaka sang 62nd IB ang panimalay nanday Benito Pasigna kag Etie Pasigna sang sityo Mapun-as, sakop sang Brgy Calupaan, Guihulngan City. Ginkuhaan sang litrato kag ginpasibangdan sila sang militar nga amo ang tagtago sang NPA kay dira kuno naghalin sa ila balay ang “NPA snipers.”

Sa esensya, ginakondisyon na ni B/Gen. Pasaporte sang 303rd Bde kag M/Gen. Arevalo sang 3IDPA ang Negrosanon sa pagpatuman sang Martial Law sa isla. Kaangay lang sang ginhimo nga pagpang-ipit sang tawhanon nga kinamatarung sang mga tumandok nga Himamaylanon sa Occidental kag amo man ang buko sini nga himuon sa mga Guihulnganon sa Oriental Negros.

Sa kabilugan, desperado kag nagalubid lamang sang kabutigan si Pasaporte agud hinabunan ang mga kapalpakan sa ila kampanya kontra-insurhensiya sa isla. Indi mahangpan ni Arevalo kag Pasaporte nga kon nagaluntad ang masingki nga militarisasyon kag terorismo sang estado sa kaumahan bisan pa sa kasyudaran nga wala man nagasabat sa sandigan nga problema sang gutom kag kaimulon sang pumuluyo, labi nga mag-usbong ang armadong paghimakas. Madamo ang maghimakas batok sa mapintas nga estado kag magpasakop sa New People’s Army.

Mentras tanto nga indi mapatuman ang tunay nga reporma sa duta kag pungsodnon nga industrialisasyon, ang demokratiko nga rebolusyon sang banwa ang magapadayon sa pagsulong padulong sa sosyalismo.
Maghimakas kag magbato! Isulong ang inaway banwa tubtob sa kadalag-an!