Ang mga serye sang punitibo nga aksyon sa Escalante City, Negros Occidental nagapamatuod sa paghiliusa sang masa kag ang ila hangaway sang pumuluyo. Bisan sa tunga sang dalagko nga badyet sa makinarya sang black propaganda, ilabi na sa social media, ang pumuluyo nagapadayon ang pagsalig sa NPA tungod sa iya aktwal nga serbisyo: sa hambalanon sang rebolusyonaryong hustisya kag sa ila nga sosyo-ekonomiko nga interes.

Sa mga nanligad nga tuig, ang #DiMasaligan79IB naghimo sang mga mala-drama nga naratibo sa kung ano ang natabo sa engkwentro sadtong February 27, 2023 sa Barangay Pinapugasan, sa amo nga banwa. Ila ginalaragway ang isa ka depensibo nga engkwentro kung sa diin ang yunit madinalag-on nga naka-maniobra bilang “serye sang banggaan” kag “desaysibo nga inaway.” Isa lang ini ka pakuno-kuno sa ila kawad-on sang aktwal nga mga kadalag-an kag ang ila kapierdihon sa pagtuman sa ila ginatikal nga pag-utas sa NPA.

Sa ila desperado nga tikang para masalbar ang ila dungan, ang tagapamababa sang AFP nagpalutaw liwat sang interbyu ni Dario Dayanan, nga madugay na nga ginasikway sa kahublagan tungod sa iya nga pagkawalay pulos kag pamalibad nga magpanadlong sang iya mga kasaypanan pang-organisasyon; Nag- AWOL (absent without leave) si Dayanan makapila ka beses tungod indi siya makasarang sang aksyon pangdisiplina nahanungod sa iya ginadumilian nga mga relasyon sa mga may bana kag menor de edad. Halin sadto, wala na siya naga-alagad sa masa, kundi para sa mga korap nga opisyal sang militar nga padaskol-daskol ang moda sa pagtrabaho pareho sa iya. Nagapamatuod lang sa tinaga nga “ang mga pispis nga may pareho balahibo, nagaululupod.”

Sa kabaliskaran sang ila mala-transaksyon nga paghiliusa base sa kaugalingon nga interes, ang Partido, ang NPA, kag ang tanan nga sektor sa kahublagan nga ginapamunuan sang mga mamumugon, kag ang mga mangunguma bilang iya nga nagapanguna nga pwersa, padayon kag matinugahon nga ginaduso ang rebolusyon. Ang mga martir nga naghalad sang ila nga sakripisyo tubtob buhi hinumdumon sa tagsa nga rebolusyonaryo kag henerasyon.

Samtang ang mga traidor sa rebolusyon amo ang maisip lang sa kamot kag sa madason madula man ang ila kabuluhan kag gamit sa kaaway.