Hugot nga gikondina sa NPA-Sultan Kudarat sa ilalum sa Mt. Daguma Sub Regional Operations Command-Far South Mindanao Region (FSMR) ang nahitabong pagpang-atake sa upat ka sibilyan, kauban ang duha ka menor de edad sa Sityo 27, Brgy. Sangay, Kalamansig, Sultan Kudarat.
Niadtong Pebrero 27, bandang alas 7:28 sa gabi-i nahitabo ang brutal nga pagpang-atake sa mga sibilyan nga nanulo og mga ihalas nga hayop duol sa komunidad. Ang mga nasangpit nga biktima mao sila Nasyon Gantangan, edad 30 anyos, menyo ug adunay tulo ka anak, Epin Dasol, anaa sa hustong pangidaron ug menyo, adunay usa ka anak, Waldo Lunon (16) ug Verano Matilak (15) nga tanan lumulupyo sa Sityo Tinagdanan, Brgy. Hinalaan. Ang maong pagpangatake miresulta sa usa nga patay (Gantangan) ug usa nga samaron (Dasol).

Matod sa nakalingkawas sa maong panghitabo, nanglakaw sila subay sa dakung dalan nga adunay espat sa ilang mga ulo, hangtod makaabot sila sa mga balay. Sa taknang alas-7:28 kalit silang gipabuthan sa 37th IB nga nag-opereyt sa maong lugar. Nakasinggit pa dayon ang biktima nga namatay og ” sibilyan ni” apan padayon gihapon ang pagpamusil nga mokabat sa usa ka oras. Hangtod sa pagkabuntag, nagpadayon sa pagpabuto ang mga berdugong sundalo. Matod sa taho sa kapamilya nga nagkuha sa patay’ng lawas ni Gantangan, sa sobra kadaghan sa igo kaniya, nanggawas ang tinae ug halos maputol ang lawas. Gibutangan usab og usa ka M14 og usa ka karbin ang iyang patay nga lawas aron himoong lehitimo ang pagpamatay.

Kining maong panghitabo, dili na kini bag-o nga hinimoan sa berdugo, mersenaryo ug pasista nga AFP. Gani kon mahinumduman niadtong Septembre 2020, gipatay ang duha ka sibilyan nga sila Dino Limboy og Makargas sa Brgy. Sta Clara duol sa ilang balay. Dugang pa niini ang panghitabo niadtong Hulyo 2022 kung diin gipatay usab si Kalesa Langgaw sa Sityo Matingaw, Brgy. Baluan, Senator Ninoy Aquino, Sultan Kudarat sa 7th IB.

Pipila lang kini nga insidente nga nahitabo sa mas daghan pang panglapas sa katungod-tawo dinhi sa Sultan Kudarat.

Tungod sa makalilisang nga panghitabo, nakuhaan ang asawa sa namatay nga biktima nga tulo-ka-bulang buntis. Partikular sa duha ka menor de edad, nakahi-agom sila og grabing troma, nagakurog-kurog ang kalawasan, grabing hilak og mahadlok na mogawas sa ilang balay tungod sa kalisang. Nakabaton usab ang mga taga-komunidad og troma sa maong panghitabo, ilabi na kay gipangransak usab ang mga balay sa sibilyan, gipangyabo ang ilang mga gamit. Nisamot ang ilang kahadlok sa pagpundo sa ilang komunidad.

Ang walay hunong nga operasyong militar ug pagsabwag og terorismo sa AFP sa dagway sa pagpatay sa mga yanong sibyan nga gipaloyuhan sa rehimeng US-Marcos Jr, dinhi sa 2nd district Sultan Kudarat mao ang dagway sa paghawan sa dalan sa pagsulod sa dagkung kompanya sa mina, logging, plantasyon ug uban pang makadaut sa kinaiyahan nga proyekto. Ang walay hunong nga pagyatak sa tawhanong katungod sa katawhan mas makapadilaab sa kasuko aron mosukol ug i-asdang ang ilang pakigbisog aron makab-ot ang ilang demokratikong interest ug mapanalipdan ang yutang kabilin.