Kaangay sa mga idu-buang nga naglusob sa mga komunidad sang mangunguma sa Central Negros ang mga tropa sang 62nd IB sini nga adlaw, Pebrero 22.

Sini nga aga, apat ka reo truck nga puno kag kargado sang pasistang tropa sang 62nd IB ang ginbubo sa Crossing Bon-bon, Barangay Hinakpan, Guihulngan City, Negros Oriental.

May mga kolum man sang militar sa Barangay Plagatasanon proper, Sityo Bon-bon, Barangay Hinakpan kag Sityo Maluy-a sakop sang Barangay Sandayao, tanan sang Guihulngan City.

Karun nga adlaw, sa bahin sa Negros Occidental, makita ang duha ka mga kolum sang militar nga nagatiner sa mga kabalayan sa Sityo Binayaran, Quintin Remo, Moises Padilla. Samtang may kolum man nga makit-an sa Sityo Maka-angkaw, sakop sa Barangay Sikatuna, Isabela.

Sa La Castellana, mentinado ang presensya sang militar sa Barangay Kamandag proper, Sityo Mercedes kag barangay proper sang Barangay Sag-ang.

Sa Binalbagan, padayon nga nagalambiyong ang berdugong 62nd IB sa mga sityo sa Tambo, Nabilog sang Barangay Amuntay, sa mga sityo sang Inapugan kag Purok Greenan sang Barangay Santol.

Samtang sa La Carlota City, nagapadayon ang pasistang 62nd IB sa pag-interogar sa pumuluyo paagi sa kuno pagpangsensus ilabe na sa sityo sang Nailab, Barangay Araal.

Nagtuga ini sang kakugmat sa pumuluyo kag kabataan bangud lab-as pa sa ila huna-huna ang brutal nga pagpaniro-patay sang militar sa duha ka mga sibilyan nga sanday Dionesio “Boy” Baloy kag Bernard Torres sa Hacienda Gomez, Barangay Sag-ang, La Castellana sadtong Enero 17, 2024.