Nagahara-hara nga nagapanglusob ang mga berdugong tropa sang 62nd IB sa mga komunidad sang mangunguma sa mga binukid sang Moises Padilla, La Castellana kag Guihulngan.

Marso 12 tubtob subong nga adlaw Marso 13 may mga kolum sang militar ang makit-an sa Barangay Tacpao, Guihulngan City. Pilit nga ginapamalay-balay ang mga pumuluyo agud patambungon sa pulong-pulong. Ginapahug ang mga pumuluyo, ginapasikto nga mga suporter sang NPA kag pilit ginapasurender. Kadungan man sini, may platun man sang 62nd IB nga naga-operasyon sa sityo Binil-iwan, Barangay Kalupaan, Guihulngan.

Pabilin gihapon ang presensya sang pasistang militar sa mga sityo sang Linggahub kag Mercedes tanan sang Barangay Sag-ang, La Castellana, Negros Occidental. Nagatiner ang berdugong tropa sa mga panimalay sang pumuluyo.

Sa Moises Padilla, Marso 13-may isa ka platun sang 62nd IB nga nagatiner sa Day Care Center sa sityo Tibubong, Barangay Quinten Remo. Samtang sini lang nga aga (Marso 13) may 20 ka tropa sang 62nd IB nga nagatiner sa Barangay Hall sang Barangay Macagahay sang amo gihapon nga banwa. Ginapangsaka man ang mga kabalayan malapit sa publiko nga mga lugar nga ginatineran sang berdugong tropa.

Dugang nga nagaperwisyo ang presensya sang pasistang militar sa kaumahan sa tunga sang kalamidad dulot sang El Niño.