Matapos ang brutal nga pagtiro-patay kay Braulio “Bunny” Tubalado sang isa ka platun nga mga berdugong 62nd IB sadtong Disyembre 6 sang kaagahon sa sityo Karanawan, Barangay Amuntay, Binalbagan, Negros Occidental; mas ginpasingki pa ang militarisasyon kag pagpamintas sang “idu-buang” nga pasistang 62nd IB sa Central Negros para hinabunan ila kapalpakan kag mga kabutigan.

Disyembre 9-10, makita ang masobra 100 nga tropa sang 62nd IB nga nakapakat sa sityo Sun flower sang Barangay Santol kag sityo Tambo, Barangay Amuntay tanan sang Binalbagan, Negros Occidental.

Disyembre 9-pilit nga ginpabakwit sang berdugong 62nd IB ang kapin sa 15 ka panimalay sa sityo Karanawan, Barangay Amuntay. Malapit 100 ka indibidwal ang apektado lakip na ang mga inosenteng kabataan. Tubtob karun nga adlaw Disyembre 11 wala pa nakabalik ang mga residente sa ila mga puluy-an. Dako ang ila pagkabalaka sa ila mga kagamitan, kasapatan, puluy-an labi na ang ila pangabuhian kag pagpanguma. Perwisyo sa ila pagtalauma ang presensya sang tropa militar.

Gikan Disyembre 9 tubtob petsa 11 pabilin nga nagalagwatihot kaangay sang idu-buang nga mga tropa sang 62nd IB sa sityo Dadyangao, Pitik-pitik kag Hinobaan sang Barangay Luz kag sityo Pinasagan, Barangay Linantuyan tanan sang Guihulngan City, Negros Oriental. Naglab-ot sa 60 ka tropa militar ang ara sa lugar.

Samtang 75 man ka elemento sang berdugong 62nd IB ang mahisayran sang mga pumuluyo sa sityo Cambuktot, Barangay Cabagnaan, sityo Ilongga Barangay Camandag kag sityo Mandayao-4, Barangay Mansalanao sakop sang La Castellana, Negros Occidental.