Mabaskog nga ginakondenar sang Leonardo Panaligan Command-New People’s Army ang padayon nga militarisasyon sa mga kaumahan sang Central Negros ilabe na ang paglusob sang 200 ka tropa sang berdugong 62nd IB sa binukid sang Brgy Amuntay, Binalbagan, Negros Occidental kag mga barangay sang Talaon, Aya kag Cansumandig sakop sang La Libertad, Negros Oriental sadtong Enero 21-27, 2023.

Pilit nga ginsulod sang 30 ka tropa sang 62nd IB ang puluy-an sang senior citizen nga mag-asawa nga sanday Marting Pedro kag Roama Pedro sang Brgy Amuntay proper alas 4:30 sang kaagahon sadtong Enero 22, 2023. Ginpahug kag ginpilit sang nasambit nga tropa ang mag-asawa nga itudlo ang nahamtangan sang NPA samtang wala man sang presensya sang NPA sa lugar. Pagkagab-i sini gihapon nga adlaw (Enero 22) samtang mahamuok nga nagakatulog ang mag-asawa, illegal naman nga ginransak sang amo gihapon nga tropa militar ang ila puluy-an. Ginkuha ang ila mga kagamitan kaangay sang 2 ka baofeng handheld radio (kinaandan nga gamit sang mga mangunguma bilang means of communication bangud kalabanan sa hilit nga lugar ang wala sang signal sa cellphone kag baofeng handheld radio ang madali nga magamit sang pumuluyo kaangot sa ila adlaw-adlaw nga mga aktibidad pareho sang pagsimba, miting sa IP’s, PTA meetings ) kag iban pa. Enero 23 sang kaagahon liwat naman nga ginransak ang ila balay sang katapo sang 62nd IB. Naguba ang ila puluy-an kag nagtuga sang grabe nga kahadlok sa mag-asawa nga tigulang. Natrauma ang ila anak nga dalaga kag 16 anyos-babaye nga apo sini.

Kadungan man sini, desperado man nga ginpahug sang nasambit nga tropa militar si Digoy Pedro (anak ni Marting kag Roama Pedro) sang Brgy Amuntay proper sang nasambit banwa. Ginlusob ang ila balay, ginpahug kag ginpasibangdan nga supporter sang NPA.

Enero 26, 2023-ginransak kag ginguba man sang militar ang balay ni Dongkoy Pahayahay sang sityo Ampalali, Brgy Aya, La Libertad, Negros Oriental. Pilit nga ginsaka ang balay nga wala sang tawo. Kadungan man sini, ginransak man sang militar ang balay ni Randy Pecore kag Maribel Pecore (mag-asawa) sa sityo Mabato, Brgy Tàlaon, La Libertad. Ginpang-ukay ang balay kag ginpangkuha ang ila mga pagkabutang.

Kon nadumduman pa nagligad nga November 2022, ginransak man ang balay ni Tony Elod sang sityo Mabato, Brgy Talaon. Ginkastigo kag illegal nga gin-aresto si Elod tubtob nga ginpriso sa himu-himo nga mga kaso. Kasubong man ang pagkastigo sang mga katapo sang 62nd IB kay Dongkoy Pahayahay tubtob nga naka-angkon madamo nga mga samad sa lawas. Nagdislokar sa pagpuyo kag pangabuhian sang pamilya Pahayahay sang sityo Ampalali, Brgy Aya, La Libertad.

Ala Martial Law ang ginapaluntad sang militar sa mga kaumahan sa Central Negros nga nagahalit sa kabuhi kag pangabuhian sang mga mangunguma. Sa tunga sang grabe nga krisis sa ekonomiya tuga sang implasyon nga gina-atubang sang pumuluyo, ginabayo pa ini sang grabe man nga pagpamintas sang militar tuga sang militarisasyon sa kaumahan. Imbes nga ipaluntad ang kalinong, matuod nga reporma sa duta kag ihatag ang nagakaigo nga serbisyo sosyal sa katawhan, militarisasyon ang nangin sabat sang inutil nga rehimeng US-Marcos Jr. Imbes nga proteksyon sa seguridad sang pumuluyo sa kaumahan dugang nga nagperwisyo ang presensya sang militar sa naga-antus na nga daan nga mga pumuluyo sa kàumahan.

Ang LPC-NPA lubos gid nagapanawagan sa mga SOCIAL ACTION CENTERS (SAC) sang Dioceses of Bacolod, Kabankalan, San Carlos kag Dumaguete sa paghimo sang separado nga imbestigasyon kaangot sa lapnagon nga Human Right’s Violations nga ginkomiter sang Armed Forces of the Philippines partikular ang 62nd IBPA, PNP kag iban pa nga katapo sang state forces batok sa mga pumuluyo kag sibilyan sa kaumahan.

Ang padayon nga paglapak sang mga pwersa sang estado sa tawhanon nga kinamatarung sang pumuluyo sa Central Negros indi isolated-case kundi isa ka muklat nga pagpamintas kag lapnagon nga ginakomiter sang militar sa baylo nga ipatuman ang International Humanitarian Law sa tunga sang gyera sibil sa pungsod.

Ginapanawagan man ang International Committee of the Red Cross (ICRC) nga maghimo sang maid-id kag kongkreto nga imbestigasyon kadungan sang nagakaigo nga serbisyo sa pumuluyo kag sibilyan nga masami nangin biktima sang pagpamintas sang pasistang militar kag reaksyonaryong estado.