Lubos nga ginakundenar sang Armando Sumayang Jr Command-New People’s Army (ASJC-NPA) ang nagasingki nga paghari-hari kag pagpanghalit sa pumuluyo sa Sipalay City kag banwa sang Cauayan, Negros Occidental. Upod sa mga pasista nga hubon sang Armed Forces of the Philippines (AFP) ang mga traydor sa rebolusyon nga sila ni Jino Ogong ukon mas kilala sa ngalan nga ‘Ka Jumong’ kag si ‘Ka Bubbles.’

Napaidalum sa operasyon kombat kag Retooled Community Support Program (RCSP) ang Barangay Camindangan, Sipalay City; mga barangay sang Inayawan, Camalandaan, Camindangan kag Caliling sang Cauayan. Nagapangsaka-saka sila sa mga pamalay sa lugar kag ginapilit ang pumuluyo nga magsurender kag mag-upod sa mga malain nga elemento pareho sa ila. Pasulit-sulit man nga ginapatawag ang mga mangunguma sa mga elemento sang Special Action Force (SAF) kag pilit nga ginapapirma bilang mga surrenderee. Ginagamit nila nga pagpamahug ang Anti-Terrorism Law kag ang Terrorism Financing agud manyutralisa ang mga pumuluyo kag mapalayo sa rebolusyonaryo nga kahublagan.

Nagapakuno-kuo man sila nga mga NPA kag nagapangilkil sa pumuluyo agud gamiton sa ila wala-tuo nga mga bisyo. Ginagamit nila ang taktika nga “hubsan ang suba agud maguwa ang mga isda” nga sa kasaysayan indi nangin epektibo, gani mas nagtulod pa sa pumuluyo nga mag-uyat sang armas agud pangapinan ang ila interes sa duta, kabuhi kag palangabuhian.

Dako ang kahilabtanan sang mga traydor sa rebolusyon upod sa pasistang 15th IB sa natabo nga engkwentro sa Sityo Cambogui-ot, Barangay Camindangan, Sipalay City sadtong Enero 10, nga nagresulta sa pagkamartir ni Rodney “Ka Wanny” Lumanog.

Salabton man nila ang ginahimo nga pagpamahug sa kabuhi kag palangabuhian kag iban pa nga mga pagpanglapas sang tawhanon nga kinamatarung sang mga pamilya sang Pulang hangaway nga pasulit-sulit nila nga ginapatawag sa barangay agud pasungkaon. Dapat nila pagauntaton ang emosyonal kag sikolohikal nga pagpang-ipit sa pumuluyo. Paglapas ini sa kinamatarung sibil kag sang internasyunal nga laye sang gyera.

Sa pihak sini, nagapabilin nga hugot ang determinasyon sang bilog nga Pulang hangaway sa idalum sang ASJC-NPA, mga kadre sang Partido Komunista sa Pilipinas, kag sang bilog nga rebolusyonaryo nga pwersa nga labi pa nga pabaskugon ang pagpatuman sang Kahublagan Panadlong para sa padayon nga pagsulong sa rebolusyonaryo nga kahublagan. Ginamandoan ang tanan nga mga yunit sang NPA nga hatagan sang hustisya ang tanan nga mga biktima sa mga krimen nga ginhimo sang AFP kag silotan ang mga traydor sa rebolusyon.