Karun nga Semana Santa, wala gapamalandong ang pasistang 62nd IB. Padayon nga naglusob sa mga komunidad sang mangunguma sa binukid sang Guihulngan sa Oriental Negros kag Moises Padilla kag Binalbagan sa Negros Occidental.

Abril 5-6, may 150 ka tropa sang 62nd IB nga nakalapta sa Brgy Quinten Remo, Moises Padilla. may kolum nga makita sa sityo Inarawis kag Tibubong sakop sang nasambit nga baryo.

Ini man nga adlaw, may kolum man sang pasistang 62nd IB sa sityo Bungao, Brgy Trinidad, Guihulngan. Samtang sa sityo Busluton, Brgy Sandayao, Guihulngan may kolum man nga makit-an.

Abril 6 sang gab-i may 1 ka platun nga tropa militar nag-abot sa sityo Bugalo, Brgy Santol, Binalbagan.

Apang sadtong Marso 26, 2022 alas 8:00 sang aga, pilit nga ginsaka sang 62nd IB nga tropa militar ang balay ni Landie Grapa kag 2 pa ka mga mangunguma nga sanday Windel kag Rosin sang sityo Alamag, Brgy Linantuyan, Guihulngan. Ginapasibangdan sila nga nagatago sang NPA.

Marso 31 sang aga, ginkastigo sang nasambit nga tropa militar sanday Mary Joy Cabanag, Maylin Carillo, Eddie Recanillo, Jenny Bontalao kag Leng-ling Recanillo lunsay mga kababaihan sang sityo Kansiyawan, Brgy Linantuyan, Guihulngan. Gin-interogar kag pilit sila nga ginapatug-an kon diin ang NPA. Bangud sang naagum nga kasakitan sa lawas bangud sa pagpamintas sang militar natrauma ang nasambit nga mga kababaihan. Alas 5:00 sang aga sa amo gihapon nga adlaw, ginsaka man sang militar ang balay ni Jonald Belando, ginpasandig sa dingding sang iya puluy-an si Jonald kag ginkastigo. Ginapahug pa sila sang militar nga patyon kon indi manugid kon diin na ang NPA. Kadungan man sini, ginsipa man sang militar si Arnel Belando anak ni Jonald sa amo gihapon nga lugar.

Samtang sa sityo Kanduyanon, Brgy Linantuyan, Guihulngan-pilit man nga ginsaka sang militar ang balay ni Rolando Marosino, Marso 31, 2023 alas 5:00 sang aga. Ini man nga adlaw pilit man nga ginsaka sang militar ang balay ni Dora Legaspi sang sityo Pinasagan, Brgy Linantuyan, Guihulngan, Negros Oriental.