Wala-puas ang pagpanglusob sang mga pasistang tropa sang 62nd IB sa mga komunidad sang mga mangunguma sa Central Negros gikan sang Hunyo 7 tubtob karun nga adlaw Hunyo 13, 2026.

Hunyo 7 sang aga, ginlusob sang militar ang komunidad sang mangunguma sa Sityo Tabago, Barangay Sandayao, Guihulngan City. Naperwisyo ang mga pumuluyo bangud ginapunggan sila nga magkadto sa ila mga uma.

Hunyo 8 sang aga, nakita sang mga pumuluyo nga nagapataklad ang tropa militar halin sa Barangay Alingasaw padulong sa Sityo Agogolo, Barangay Macagahay, Moises Padilla, Negros Occidental. Gilayon sila nga nagdirekta kag nagpundo sa balay ni Juanting Butas sang nasambit man nga lugar. Nagapangsaka-saka sila kag nagapang-imbestiga sa mga pumuluyo sa presensya sang NPA. Tubtob karun nga adlaw nagapadayon pa sila sa lugar samtang ginahimo nga kampo militar ang Agogolo Elementary School. Naghatag ini sang kakugmat sa mga pumuluyo sa panahon nga ginapangsaka ang ila mga kabalayan kag nagapang-imbestiga. Samtang nagperwisyo naman sa mga manunudlo kag nga kabataang-estudyante ang presensya sang pasistang tropa sa nasambit nga eskwelahan.

Hunyo 8 man sang gab-i, nahisayran man sang pumuluyo ang nagapanglakaton nga tropa sang 62nd IB pakadto sa Sityo Punong, Barangay Trinidad, Guihulngan City, Negros Oriental. Hunyo 9 alas 6:00 sang aga, nakit-an ang halos 80 ka tropa militar sa proper sang nasambit nga sityo. Nagdugang sila sang pwersa nga nakasakay sa 10 ka motor tubtob nga naglab-ot sa bulubanta mga 100 ka tropa.

Nagkatag ang mga ini sa 7 tanan ka kolum nga nagapanransak sa mga kabalayan sa mga Sityo sang Punong, Nabakalan, Anahaw, Tribu, Laos kag Agpapataw nga nahamtang sa tri-boundary sang mga Barangay sang Trinidad, Sandayao kag Binobohan tanan sang Guihulngan City. Nagpakuno-kuno pa ini nga mga katapo sang New People’Army para magsolbar sang problema sa duta.

Karun nga adlaw Hunyo 13, nagapabilin pa ang presensya sang militar sa mga nasambit nga lugar. Makita nga ara pa ang ila presensya sa mga lugar sa Sityo sang Libas, Barangay Imelda, sityo Agpapataw, kag Agbagacay sang Barangay Binobohan kag sityo Maluy-a, Barangay Sandayao tanan sang Guihulngan City. Ginatiid ang mga kabalayan sa tion sang kagab-ihon nga nagtuga sang kahadlok sa mga residente.

Sa kabilugan, nagatuga ini sang pagkadislokar sa pangabuhian sang mga mangunguma, nagatuga sang kahadlok kag trauma sa ila nga grabe nga nasinati nga militarisasyon kadungan sang ila pag-antus sa kapigaduhon labi pa nga karon pa nakapanggas bangud sang malawig nga init tuga sa climate change kag iban pa nga man-made calamities kaangay sang pagmina, pagpamomba sa mga kalasangan, kabaybayunan sang militar kag iban pa.

Ini nga kalakasan sang 62nd IB sa Central Negros ang muklat nga nagalapas sa tawhanon kimatarung, CARHRIHL kag pangkalibutanon nga laye sa tawhanon nga kinamatarung.