Karong ika-76 nga anibersaryo sa Internasyunal nga Adlaw sa Tawhanong Katungod, dili kini adlaw sa selebrasyon kundili adlaw sa pagpahinumdum sa tibuok katawhang Pilipino nga kinahanglang manlimbasog nga makab-ot ang hustisya nga dugay nang gihikaw sa masang hinimuslan ug linupigan. Labaw pa nga palig-unon ang determinasyon nga manindugan ang katawhan sa ilang mga tawhanong katungod.

Kung tun-an og balik ang kasaysayan sa atong nasud, gipakita niini nga gikan pa man sa nahimong kolonya ang Pilipinas sa Espanya, kuyanap na ang nagkalain-laing porma sa pagpanghimulos ug pagpamig-ot sa masang Pilipino. Wala kini nawala ug gani mas nigrabe pa niadtong pag-abot sa mga Amerikano ug Hapones.

Miresulta kini sa pagkatataw sa tulo ka ugat hinungdan sa kalisdanan nga nasinati sa mga batakang sektor sa katilingban nga mao ang pyudalismo, burukrata kapitalismo ug imperyalismo. Gipalig-on niini ang alang-alang-pyudal ug alang-alang-kolonyal nga sistema sa nasud nga wala naghatag og bili sa interes ug kinabuhi sa mga yanong lumulupyo niini.

Isip papet nga rehimen sa imperyalistang US, ang reaksyonaryong gobyerno nagpatuman og mga balaod ug palisiya nga maki-langyaw ug elitista nga naghikaw sa katawhan nga makatagamtam sa ilang tawhanong katungod nga nakasulat man unta kini sa konstitusyon.

Partikular sa Negros nga nahigot sa monocrop nga industriya, daghang mamumuo sa kampo ang nag-antos sa tuman ka mubo nga sweldo. Ang lapad nga kabukiran sa isla wala natikad sa mga mag-uuma tungod sa mga pagpangamkam og yuta sa mga agalong yutaan ug dagkung komprador burgesya. Sa laktod nga pagkaistorya, ang desenteng panginabuhi wala nasinati sa mga Negrosanon.

Busa, nagdilaab ang kaisog sa mga Negrosanon nga nagpabuto og dagkung mobilisasyon batok sa kontra-katawhang mga balaod ug palisiya. Apan imbes nga dunggon ang demanda sa mga Negrosanon, pasismo ang tubag sa reaksyonaryong gobyerno pinaagi sa militarisasyon sa kabukiran ug kasyudaran. Nangunang kriminal ang mga kasundaluhan, kapulisan, ug mga paramilitar nga mao ang direktang naghadlok, nag-interogar ug nag-aresto nga wala nag-agi sa saktong proseso, nagpasaka og kaso nga walay basehanan, nag-abdak, ug nagpatay sa mga Negrosanon nga nakigbisog, nagpangransak ug pangbomba sa mga komunidad, sa tumong nga pahilumon ang katawhan ug gub-on ang rebolusyonaryong kalihukan.

Mao nga angayan lang nga karong Internasyunal nga Adlaw sa Tawhanong Katungod, ipalanog sa katawhan ang kusganong pagkundena sa mga paglapas sa tawhanong katungod nga gibuhat sa nagkalain-laing administrasyon sa reaksyonaryong gobyerno, lakip na ang masaker sa mga mag-uuma sa panahon sa Oplan Sauron 1 ug 2 ubos sa pasistang rehimeng Duterte ug masaker sa pamilyang Jacolbe sa Central Negros ubos sa pagpungko ni Marcos Jr ug ang sunod-sunod nga pagransak sa kabalayan, pagpanghulga ug pagpangulata sa mga pwersa sa 62nd IB sa mga mangunguma sa Barangay Bucalan ug Barangay Budlasan, sakop sa Canlaon City sa miaging mga semana.

Dungan niini, hiniusang idemanda sa katawhan nga patubagon ang mga responsable sa maong krimen ilabi na ang utok niini nga sila si Duterte ug Marcos Jr. Palig-unon usab nato ang paghiliusa sa mga mag-uuma, mamumuo, kabatan-onan, kababayen-an, mga tawong simbahan, ug uban pang mga patriyotikong pwersa para sa pag-asdang sa komprehensibong kontra-pasista, kontra-pyudal, ug kontra-imperyalista nga pakigbisog.

Labaw sa tanan, giawhag usab nato ang halapad nga masa nga mosalmot sa armadong pakigbisog isip nangunang porma sa pakigbisog alang sa pagpaasdang sa nasudnong-demoktratikong rebolusyon para maangkon ang tinuod nga hustisya ug kagawasan.