Sa sobra duha ka tuig nga pagdumalahan ni Marcos Jr, mas nagasingki ang iya kapintas batuk sa pumuluyo. Padayon nga nagadamo ang mga biktima kag kawad-on sang hustisya sa pagpanglapas sa tawhanon nga kinamatarung nga ginkomiter sang subong nga rehimen kasubong man sa ginbuslan sini nga rehimen ni anay presidente Duterte. Sa ika-76 nga pag-komemorar sang Internasyunal nga Adlaw sang Tawhanon nga Kinamatarung subong nga adlaw, nagalanog ang singgitan sang katawhan sa pagdemanda sang akawntabilidad sa nagapadayon nga kultura sang impyunidad sang reaksyonaryo nga gobyerno.

Bisan sa nagadalom kag nagalala nga banggianay sa pag-agaway sang gahum sang hubon sang mga Duterte kag Marcos, ginapadayon ni Marcos Jr ang mga kontra-pumuluyo nga mga polisiya kag programa nga ginsugdan ni Duterte lakip ang pagpalapnag sang pasismo kag terorismo batok sa pumuluyo ilabi na sa isla sang Negros.

Sa tabon sang pagpukan sang rebolusyonaryong kahublagan sa isla, ang masang ginapigos kag ginahimuslan ang gintarget sang reksyonaryong gobyerno gamit ang bayaran nga Armed Forces of the Philippines (AFP), Philippine National Police (PNP) lakip ang NTF-Elcac agud punggan ang ila paghimakas sa malala nga krisis pang-ekonomiya kag pahiposon sila sa ila lehitimo nga mga demanda sa ila kinamatarung sa kabuhi kag palangabuhian nga gindingot sa ila kaangay sang matuod nga repormang agraryo kag pungsodnon nga industriyalisasyon.

Bangud sini, nakarekord ang National Democratic Front (NDF)-Negros sa sini nga tuig sang 241 ka insidente sang mga bayolasyon sang Comprehensive Agreement on Respect for Human Rights and International Humanitarian Law (CARHRIHL) nga nag-imbolbar sa masobra 19,500 ka biktima (3,666 sini ang mga bata) nga ginkomiter sang mga pasistang AFP, PNP kag mga paramilitar lakip ang NTF-Elcac. Kabahin ini sa 823 ka mga bayolasyon sa tawhanon nga kinamatarung sang mga reaksyonaryong pwersa sa sulod sang masobra duha ka tuig nga paghari ni Marcos Jr.

Sa 71 ka mga biktima sang ekstrahudisyal nga pagpamatay sa idalom sang rehimen US-Marcos II, 16 sini ang ginpatay sa subong nga tuig nga naglakip sa brutal nga pagpatay sang mag-asawa sa Himamaylan City kag pagpatay sa duha ka hors de combat sa Sipalay City; tanan sa Negros Occidental. Samtang, wala pa gihapon sang hustisya ang pagmasaker sa pamilya Fausto kag Jacolbe kag sa brutal nga pagpatay sang mga NDF consultant nga sanday Ericson Acosta kag Rogelio Posadas.

Samtang, wala pa gihapon makita ang mga ginpang-abdak sang mga pasistang tropa sang nagligad nga tuig nga sanday Lyn Grace Marturillas, Deah Lopez, Renel delos Santos kag Denald Mialen.

Dugang sini, ang pagdali-dali sa pagdeklarar sang status sang state of Stable Internal Peace and Security (SIPS) sa isla, peke nga pag-angkon kag patalang para taguon sang AFP ang ila kapaslawan sa pagwasak sang rebolusyonaryo nga kahublagan sa gintalana nga dedlayn sini subong nga tuig. Tubtob subong, ginahimo sang mga pasistang tropa ang pagpangastigo, pagpamahug kag pagpangharas, pagpamomba, patarasak nga pagpaniro, pagpangransak kag iban pa batok sa pumuluyo sa ila wala untat kag malawigon nga militarisasyon sa mga komunidad sang kaumhan ilabi na sa mga lugar nga may mga mapangwasak sa kapalibutan nga mga proyekto sang oil palm, eko-turismo, mina, quarry kag iban pa.

Sa kasyudaran, ginapasingki ang pagpang-redtag sang mga lideres sang mga organisasyon sang mga demokratikong sektor kag pagpasaka sang pato-pato nga kaso sa mga development workers kag mga tigpangapin sang tawhanon nga kinamatarung.

Sa pagsaulog sang Adlaw sang Tawhanon nga Kinamatarung, dapat nga mas pabaskugon sang mga organisasyon sang mga mangunguma, mamumugon, imol nga taga-syudad, pamatan-on, tawong-simbahan, propesyunal, kag iban pa upod sa malapad nga pumuluyo ang demanda sa pagpasabat kay Marcos Jr sa iya mga krimen batok sa katawhan. Dapat man nga pasabton si Duterte kag ang iya mga kakunsabo sa iya mga hinimoan nga tubtob subong, wala pa nahatagan sang hustisya ang mga biktima kaangay sang Oplan Sauron 1 kag 2, Sagay masaker kag iban pa.

Samtang nagapabilin ang inhustisya kag indi magabot ang ugat sang kaimolon, magapadayon ang paghimakas sang masang ginapigos kag ginahimuslan batok sa mga nagaharing sahi kag padayon nila nga suportahan ang inaway banwa agud maangkon ang matuod nga hustisya kag kahilwayan.###