‎‎Madinalag-on nga natigayon ang aksyon militar sang isa ka yunit sang Armando Sumayang Jr Command (ASJC-NPA) paagi sa pagharas sang nagaoperasyon nga tropa sang pasistang 15th IB sa Sitio Lomboy, Barangay Caliling, banwa sang Cauayan sadtong Abril 18, 2026. Suno sa inisyal nga mga report, indi magnubo sa 2 ka elemento sang kaaway ang pilason.

‎‎Gintigayon ini base sa demanda sang pumuluyo sa lugar bangud sang malawig nga operasyon militar sa mga nabukid nga bahin sang banwa sang Cauayan kag Candoni, kag syudad sang Sipalay kag Kabankalan halin pa sadtong Pebrero. Paagi sa pagbulig sa mga rebolusyonaryong masa kag pwersa sa lokalidad, napalupkan ang mga pasistang tropa nga nagpinahulay sa nasambit nga lugar.

‎‎Hugot man nga ginakundenar sang ASJC-NPA ang buraghal nga paggamit sang mga black hawk helicopter sa indi munubo sa 4 ka beses sa bulan sang Abril, kalabot na sadtong Abril 18 pagkatapos sa pagpangharas sa mga Pulang Hangaway, sa mga banwa kag syudad sang Southwest Negros. Nagpakita lang ini sa kainutil kag katerorista sa pasistang rehimeng US, nga mas ginapaboran ang sobra-sobra nga paggasto militar samtang nagaantus ang pumuluyo sang mahal nga presyo sa tughong kag sandigan nga balaklon kag tuman ka nubo nga sweldo.

‎‎Ini nga panghitabo nagapakita nga ang pumuluyong Negrosanon padayon nga magasuporta sa ila matuod nga suldado. Ang demokratikong rebolusyon sang banwa paagi sa pangmalawigon nga inaway banwa padayon nga magaabanse sa pihak sang sakripisyo, kabudlayan kag wala untat nga atake sang AFP ang nagapabilin nga solusyon kag pakadtuan sa pumuluyong ginhimuslan kag ginpigos sa garok nga sistemang malakolonyal kag malapyudal.

‎‎Magapadayon ang binuligay sa Pulang Hukbo kag ila rebolusyonaryong masa paagi sa pagpamuno sa Partido Komunista sang Pilipinas. Gani, ang larangan gerilya sang Southwest Negros magaduso sa iya mga hilikuton sa armadong paghimakas, rebolusyon agraryo, kag pagtukod sang baseng masa. Sakmiton sini ang higayon para amat-amat nga buhinan ang pwersa sa kaaway samtang gapreserba sa iya nga kusog para mangin paborable ang timbang sa pwersa sa rebolusyon.