Nakighiusa ang NDF-NCMR sa konseho sa Malaybalay batok sa Del Monte

,

Nakighiusa ug ginadayeg sa National Democratic Front – North Central Mindanao Region (NDF-NCMR) ug sa tibuok katawhan ang konseho sa Malaybalay City sa pagkondena ug paghimo og resolusyon batok sa ekspansyon sa plantasyon sa Del Monte Philippines.

Matud sa taho, nasayran nga, sukad pa Oktubre, naghawid og bag-ong Environmental Compliance Certificate ang Del Monte nga nagatugot kanila sa pagpalapad sa plantasyon sa Brgy. Manalog, Brgy. Kibalabag, Brgy. Silae ug Brgy. Miglamin kung asa mookupar kini sa 6,000 ka ektaryang yuta sa lugar alang sa pinya, kapayas ug abokado.

Niini, kusganon kaming nakighiusa sa tanang makatarunganong lakang nga ginaduso sa katawhan aron atong masiguro ang kasiguruhan sa pagkaon sa katawhan, pagpanalipod sa kinaiyahan ug pagkundena sa mga pasismo sa estado.

Nakighiusa kami sa pagkondena sa unsamang programa ug institusyon nga nagahulga sa kaseguruhan sa pagkaon sa masang mag-uuma. Sa mga lugar kung asa nagtunhay ang mga plantasyon sa Del Monte, grabeng nag-antus ang katawhan sa kagutom ug kawalay kasiguruhan sa trabaho. Ginaligsan sa Del Monte ang mga umahan ug pangkonsumong pananom sa mga residente. Mas bangis nga ginahimo sa kumpanya mao ang direkta ug dili-direktang pag-akup-akop sa yuta sa mga mag-uuma alang sa interes sa pagpalapad sa plantasyon. Tungod niini, siguradong maabog na sab ang mga lumulupyo sa hilit nga mga bahin sa lasang. Sa kasamtangan, nagasuhol lamang ang ilang mga mamumuong panguma og P318.00 matag adlaw—grabe ka layo sa minimum nga panginahanglan sa matag pamilya nga P1,120.00.

Nakighiusa kami sa pagkondena sa tanang aktibidad nga nagadaot sa kinaiyahan. Nakigduyog kami sa konseho sa Malaybalay sa kabalaka nga lagmit maligsan ang mga protected areas sa plantasyon sa Del Monte. Nabantog ang Del Monte sa taas na nga panahon nga notoryus sa pagguba sa kayutaan, paghugaw-hugaw sa tubig ug hangin ug paghulga sa panglawas sa tawo ug mga mananap. Niining pagpalapad sa Del Monte, mahimong madaot ang Silae River ug sapa sa Miglamin. Maapektuhan usab ang water reservoir sa Kibalabag river nga maoy nagasuplay og tubig sa Malaybalay City.

Bag-uhay pa lamang gipahigayon ang COP27 Summit sa lain-ling nasud sa tibuok kalibutan nga nagtinguha sa pagpreserba ug pagpugong sa dugang pang kadaot sa kinaiyahan. Isip mga opisyales sa nagtunhay’ng estado, makatarunganon lamang ang pagbarog sa konseho sa Malaybalay City aron makatampo sa pangkalibutang paningkamot sa pagpakunhod ug pagpugong sa climate change o pag-usab sa klima.

Nakighiusa usab kami sa pagbabag ug pagkondena sa tanang kriminal nga pagpamig-ot sa katawhan sa ngalan sa interes sa kita. Dili lamang simpleng goons kundili lakip na ang mga sundalo ug pulis sa nagsilbing gwardya sa mga multinasyunal nga kumpanya. Mas subsob nga operasyon sa plantasyon ug mina, mas subsob ug sustenido usab nga operasyon sa AFP ang ginapahigayon. Dahumon nato nga kung magmalampuson ang Del Monte sa maong pagpalapad sa plantasyon, mas modaghan pa ang paglapas sa tawhanong katungod sa Brgy. Silae ug Brgy. Miglamin sama sa pagpatay, iligal nga pag-aresto, pagbakwit ug uban pa.

Niini, angayan lamang nga ipadayon ug suportahan pa sa katawhan ang maong resolusyon sa konseho sa Malaybalay. Maayo usab nga subling matan-aw ug masusi ang gihimong kasabutan alang sa operasyon sa mina sa Kalalan River sa Sityo Bendum, Brgy. Busdi, Malaybalay aron mahimoan kini og haom nga lakang. Kung madayon ang operasyon niini, siguradong makontamina ang tubig sa Pulangui ug masinati kini hangtud sa kadagatan sa General Santos City.

Nakighiusa ang NDF-NCMR sa konseho sa Malaybalay batok sa Del Monte