Hugot nga ginkukundenar han National Democratic Front ha Eastern Visayas an pinakaurhi nga pagduso han kaapihan han nagdodominar nga paksyon nga Marcos ha Kongreso agud igbalik an death penalty. An ginpoproponer nga balaud waray duda nga gagamiton kontra ha mga ginkukunsidera ni Marcos nga pampulitika nga pangontra ngan kritiko, kalakip an hiluag nga masa.

Diri nauuwat an mga rebolusyunaryo nga pwersa ha rehiyon han ira pambirikis ha balaud pinaagi han pagsering nga igpapatok la kuno an death penalty ha dagko nga negosyante han iligal nga druga. Ginproybaran na han mapan-uwat ngan pakyas nga “gerra kontra druga” han rehimen Duterte nga an pandarahug ngan puthaw nga kamot diri gud makakapugong ha pagsamwak han iligal nga druga, ngan pakyas an reaksyunaryo nga gubyerno nga sirutan bisan an pinakadako nga drug lord ha nasud nga hi Rodrigo Duterte. Diri gagamiton bisan san-o an death penalty ha mga sugad kan Duterte. Sugad han bug-os nga ligal nga sistema, dehado dinhi an kablasanon nga limitado an akses ha mga panligal nga serbisyo ngan diri ginpapaburan han balaud.

Karuyag han mga kakunsabo ni Marcos ha Senado ngan Nauubos nga Kapunungan nga manipulahon an pampubliko nga opinyon ngan sakyan an popular nga sentimyento kontra ha iligal nga druga agud tahuban an brutal nga katuyuanan han rehimen nga gamiton an balaud agud madarahug nga gipiton an katawhan. Gamit an ginpoproponer nga balaud para ha death penalty, bisan hin-o poyde pagawason komo “big-time nga dabi ha iligal nga druga” o nadadabi ha mga iligal nga aktibidad agud mapatukan hin death penalty. An estado nga ginpapamunuan ni Marcos unob nga higara magtanum hin ebidensya tikang ha waray agud makagsalawad hin mga buwa nga kaso ngan sirutan an mga pampulitika nga kakontra hini. Syempre, higara na na dinhi hi Marcos Junior bisan hadton panahon han diktadura han iya amay. An pagrason nira nga “waray angay igkahadlok an mga molupyo nga nasunod han balaud” nagdudurot la hin kabaraka.

Ha kamot han naghahadi nga paksyon nga Marcos-Duterte, nga grabe nga impluwensyado han mga utok-pulbura nga heneral, mayda mga militarista ngan mapanirot nga pagkulaw ha krimen, ngan butad nga nagpapakita hin kawaray moralidad, an death penalty usa nga armas agud pamingawon an ngatanan nga pag-ato. Tuyo han balaud nga mag-imponer hin klima han kahadlok ha hiluag nga ranggo han mga kakontra ni Marcos, kaupod an mga karibal ha pulitika, mga membro han mga ligal nga pormasyon, progresibo ngan militante nga organisasyon, mga ordinaryo nga sibilyan nga arbitraryo nira nga ginre-red-tag, ngan mga rebolusyunaryo nga pwersa. Kaparte ini han plano ni Marcos nga igkonsentra an poder ngadto ha iya ngan pamingawon an oposisyon. Diri ini bulag ha ginhihimo han rehimen nga madarahug nga pagpuypoy ha mga aksyon protesta, pagpamingaw ha midya, ngan militarisasyon han edukasyon pinaagi han mandatory ROTC.

Ngatanan ini nagseserbe ha katuyuanan ni Marcos nga igpadayon an pangawat han iya pamilya ha kwarta han katawhan, magpabilin nga talwas ha pagkakasentensya, ngan igpabilin nga malipayon an iya mga imperyalista nga agaron, mga local nga kapitalista ngan kroni.

Nananawagan an NDF-EV ha ngatanan nga katawhan Pilipino nga igsalikway ngan hul-os nga atuhan an mga pag-atentar han rehimen Marcos nga igbanhaw an death penalty. Kinahanglan nira tipahan an tanan nga madarahug nga balaudnon nga pagagawason han rehimen komo mga “prayoridad nga proposisyon” ngan padadagmiton, ha kahibangan han mga batakan nga katungod ngan kalibrihan han masa.#