‎Ginpanginbulahan sang Armando Sumayang Jr Command (ASJC-NPA) ang mga Pulang Kumander kag hangaway sang larangang gerilya sa Southwest Negros sa ila mga madinalag-on nga pagduso sang mga aksyon militar sa bulan sang Marso, bilang pagselebrar kag pagsugata sang ika-57 nga anibersaryo sang New People’s Army (NPA) subong nga adlaw, Marso 29.
‎
‎Sa ini nga bulan, may tatlo ka harassment operation ang natigayon. Sadtong Marso 1, ginpalupkan ang detatsment sang 15th IB sa Proper Barangay Haba, Candoni; sadtong Marso 9, sang mga pasistang tropa sa amo man nga batalyon nga nagtinir sa tunga sang komunidad sang Sityo Patol, Barangay Caliling, Cauayan; kag sa Marso 16, ginpalupkan ang lain man nila nga detatsment sa Sityo Tagaytay, Barangay Narra, Cauayan.
‎
‎Matapos ang harasment sadtong Marso 9, nagdinalagan ang mga kaaway kag nagkaginamo. Bangud sang kahuya, ginpalapta nila ang istorya nga nagmaoy lang ila upod bisan nga ginharas sila sa matuod.
‎
‎Dugang pa sini, nakakuha sang duha ka armas luthang sadtong Marso 12 kag Marso 19 ang ASJC-NPA halin sa mga kontrarebolusyonaryo kag malain nga elemento nga ginpangdis-armahan bangud napamatud-an nga may mga sala sa pumuluyo kag rebolusyonaryong kahublagan.
‎
‎Ini nga mga aksyon militar ginpatigayon sa tunga sang focused military operations sa lugar (ilabi na sa Kabankalan kag Sipalay City, kag mga banwa sang Cauayan kag Candoni) halin sadtong Pebrero tubtob subong. Gani, pamatuod ini nga sa pihak sang nagalala nga pasismo kag kapintas upod sang krisis sa ekonomiya, nagaibwal ang armadong rebolusyon bangud ini ang nagapabilin nga husto kag kinahanglanon nga solusyon.
‎
‎Subongman, ginpasidunggan sa bug-os nga rebolusyonaryong pwersa sa Southwest Negros sanday Ritchell ‘Ka Makoy/Venom’ Verano, Milky ‘Ka Gorting/Dores’ Sampini, kag Joedil ‘Ka Cairo/Junjun’ Balsimo nga namartir sadtong Marso 21 sa Sityo Santol, Barangay Tampalon, Kabankalan City. Ang paghalad sang ila kabuhi sa altar sang rebolusyon magaserbi nga inspirasyon sang mga pwersa nga ipadayon ang ila banas nga ginsubay tubtob sa paglab-ot sa matuod nga kahilwayan kag demokrasya.
‎
‎Magapadayon ang ASJC-NPA nga magpatuman sa iya mga integradong hilikuton sa armadong paghimakas, agraryong rebolusyon, kag pagtukod sa baseng masa, puno sang leksyon kag kaalam halin sa 57 ka tuig nga paghimakas upod sa masang ginapigos kag ginahimuslan.

Atubang sa nagalala nga krisis sosyoekonomiko, ang pagsulong sang demokratikong rebolusyon sang banwa pinaagi sa pangmalawigon inaway banwa nga may sosyalistang perspektiba ang paglaum sang bilog pumuluyo agud mawasak ang nagharing sistema kag mapundar ang sosyedad nga wala sang pagpanghimulos.
‎
‎Bilang nangunang instrumento sa Partido Komunista sang Pilipinas, determinado kag pursigido ang ASJC-NPA nga iduso ang rebolusyonaryong katuyuan kag makakas ang kadena sang pagpangulipon sang imperyalismo, pyudalismo, kag burukrata kapitalismo. Ang armadong rebolusyon amo ang husto nga sabat sa sistematikong terorismo sang estado.
‎
‎Ginahangkat sang ASJC-NPA ang pumuluyo, ilabi na ang pamatan-on nga mangahas nga mag-intra sa NPA kag depensahan ang interes kag kinamatarong sang pumuluyo, agud maduso pa ang inaway banwa sa mas mataas nga lebel tubtob sa lubos nga kadalag-an. Ari sa aton mga kamot ang makahulusga nga pwersa agud maliwat ang kahimtangan.