Ginharas sang isa ka yunit sang Roselyn Jean Pelle Command-New People’s Army (RJPC-NPA) ang mga pwersa sang #DiMasaligan79IB, alas 7:25 kagab-i, Septyembre 14, Purok 5, Barangay XI (Gawahon), Victorias City, Negros Occidental. Nakaagum sang pila ka pilason ang nasambit nga militar sa amo nga taktikal nga opensiba sang NPA.

Ang amo nga tropa kabahin sang Charlie Company sang #DiMasaligan79IB nga nagabase sa Barangay E. Lopez, Silay City, Negros Occidental.

Subongman, ang madinalag-on nga operasyon sang mga Pulang hangaway nagapakita sa nagalapad nga suporta sang masa sa iya matuod nga hukbo, ang NPA, nga nagaserbi sa interes sa ginapigos kag ginahimuslan nga sektor.

Ang Barangay Gawahon may nagaluntad nga agraryo nga konplikto bangud sa pagapabaya sa reaksyonaryo nga gobyerno sa pagpatuman sang Comprehensive Agrarian Reform Program (CARP).

Ini man nga lugar ang may yara nga ginapasulod nga mga proyekto sang mga nagaharing sahi nga nagabutang sa peligro sa kabuhi kag palangabuhian sang mga pumuluyo sa lugar.

Ang presensya sang #DiMasaligan79IB sa Barangay X1 (Gawahon) nagapasiguro nga wala sang magapamatok sa amo nga mga proyekto.