Militanteng ginasaulog sang Romeo Nanta Command-New People’s Army (RNC-NPA) upod sang bilog rebolusyonaryong pwersa sa sakop sang South Central Negros ang ika-57 nga pagsukat sang liwat nga pagkatukod sang Partido Komunista sang Pilipinas sadtong Dec 26, 1968. Kadungan sini, ginahatagan sang taas-kamao nga pagsaludar ang tanan nga namartir nga naghalad sa ila kabuhi para sa dungganon nga rebolusyonaryong paghimakas sa pumuluyong Pilipino. Nagserbi sila nga wala kamatayon nga inspirasyon sa malapad nga pumuluyong ginahimuslan kag ginapigos.

Halin sang unos nga naagian sang bilog nga rebolusyonaryong pwersa sa pungsod nga nakaapekto sa aton tayuyon nga pagsulong, padayon ang aton pagpaninguha sa liwat nga pagpabaskog sini. Nakita naton nga sang mga nanligad nga tinuig, may ara mga internal nga problema labina sang hustong aplikasyon sang gerilyang paghulag base sa konkretong kahimtangan kag burukratismo sa hambalanon sang pagpamuno nga nangin rason sang paghinay sang aton pagsulong. Apang sa tampad, matutom kag sinsero nga pagsaway kag pagtadlong sang sini nga mga kasipyatan sang bilog katapuan sang Partido, amat-amat naton nga naigpawan ang ini nga mga kahuyangan kag nakita ang signipikante nga paglambo sa madamo nga bahin sang hilikuton.

Sa kasamtangan, mas nagalala ang sosyo-ekonomiko kag pulitikal nga krisis sa pungsod. Mas nagahawan man ini sa dalan para sa rebolusyonaryong pagsulong. Sang nabuyagyag ang malala nga korapsyon sang reaksyonaryong gobyerno nga naga-imbolbar sang pinakamatag-as nga opisyal sini halin sa putok-putokan tubtob sa ubos, sa pagpanguna sang mismo Presidente nga si Marcos Jr. kag ang Bise-Presidente nga si Sara Duterte, mas nagkalayo ang kaakig sang pumuluyo nga dinekadang naga-antus sang kapigaduhon. Naglupok ang trilyon nga korapsyon sang ‘flood control project’ sang milabay nga binulan, nga tubtob subong wala pa sang mga napasabat nga dalagkong opisyal sang reaksyonaryong gobyerno. Nangin sabat man sang mga pumuluyo ang sunod-sunod nga dalagkoan nga rali-protesta nga nag imbolbar sang lain-lain nga sektor sa sosyedad.

Ini tanan, nagasalamin sang padayon kag indi mapugngan nga kronikong krisis sa mala-pyudal kag mala-kolonyal nga sistema sang pungsod: ang wala kabulusgan nga ara sa poder kag ang wala katapusan nga pag-antus sang malapad nga pumuluyo sa kawad-on sang duta, barato nga suholan, wala sang trabaho, manubo nga sweldo kag kakulang sang benipisyo, wala sang kaugalingon nga industriya, kakulang sang serbisyo sosyal kag iban nga mga problema nga gina-atubang sang pumuluyo.

Partikular sa sakop sang South Central Negros, nangin hulga sa pangabuhian sang pumuluyo ang pagtibusok sa presyo sang kalamay. Mayorya sa apektado sini ang mga magagmay nga prodyuser ukon ‘small planters’ kag ang bultong pwersa sang mamumugon sang kampo. Amo man gihapon ang nagkalatabo sa presyo sang humay nga naglab-ot sang ₱9-₱15 pesos per kilo. Ini nga penomenon, epekto sang padayon nga pagpatuman sang neoliberalismo sa pungsod nga nagadala sang dako nga halit sa lokal nga produksyon. Dugang pa gid sa ginaabaga nga problema sa mga Negrosanon ang sunod-sunod nga kalamidad nga naghalit sa ila pangabuhian kag gani nagkalas sang kabuhi bangud sa wala puas nga pagbaha.

Apang sa kabukiran, ang pinakagina-antus sang pumuluyo ang wala untat nga operasyong militar nga nagaguba sang ila pangabuhi kag nagarisgo sa ila kabuhi labina sang mga mangunguma kag tumandok. Halin sang Hunyo 2025 tubtob subong padayon ang malaparan nga operasyon militar sa mga mabukid nga bahin sang Binalbagan, Himamaylan kag Kabankalan. Bisan sa subong nga panahon sang paskwa, naglab-ot sang indi magnubo sang 25 ka kolum ang nagalapta sa lain-lain nga baryo nga naga estar sang mga kabalayan, skwelahan, simbahan, health center kag iban pa nga populisado nga lugar.

Nagapakanaog man sila sang mga palisiya nga nagalimita sa aktibidad sang pumuluyo kaangay sang pagbawal sa mga mangunguma sa tagsa ka mga uma kag pagpakanaog sang ‘curfew’ sa komunidad.

Sa ila presensya, nangin lapnagon ang mga anti-sosyal nga aktibidad kaangay sang inom, sugal, paglantaw sang mga mangil-ad nga lalantawon (scandal), pagpinalupok kag iban pa nga sahi sang malain nga aktibidad. Kadungan sini, nangin madata man ang mga nareport nga pagpanglapas sa tawhanon nga kinamatarung sa mga pumuluyo sa kabukiran. Sa milabay nga anum kabulan natala ang masobra 20 ka kaso sang bayolasyon sa tawhanon nga kinamatarung ng may masobra 40 ka mg biktima.

Sa pihak bahin, para matabunan ang kaakig aang pumuluyo, nagpahamot ang militar paagi sang paglunsar sang mga liga kag mga pahampang, pagpakaon sang lugaw kag ano pa nga mga pakulo nga klaro pagpahinabon lang sa ila mapintas kag berdugo nga kinaiya. Ang ila presensya kag mga aktibidad nga ginlunsar sang mga komunidad, wala naghatag solusyon sang mga problema nga ginaatubang sa masang mangunguma kaangot sa hulga sa ila pangabuhian kag pangkabilogan nga kaayuhan ilabina nga nagahagna ang dislokasyon nga dala sang ‘₱12 billion tunnel road’ kag ‘Upland Expressway’.

Sa pihak sini tanan, nagapaabante ang bilog rebolusyonaryong paghimakas sa kabukiran kag kasyudaran sang Central Negros. Sa naglabay nga pila ka tuig matapos ang panawagan sang Partido nga ilunsar ang Ikatatlong Kahublagan Panadlong, mas nagbalik ang liwat nga kapagsik kag entusiyasmo sang rebolusyonaryong pwersa. Signipikante ang padayon nga hilikuton recovery kag pagpalapad sa erya nga ginahulagan sang pulang hukbo. Makita ang wala katapusan kag mainit nga pagbaton sang masa sa ila matuod nga hukbo nga dako nga rason sa wala kahubason sini nga kusog. Indi madula sang panumduman sang pumuluyo sa South Central ang mga kadalag-an sini sa ila kolektibong paghimakas upod ang mga pulang hukbo sa hambalanon sa ekonomiya kag pulitika. Naka-ugat na ini sa masang mangunguma nga indi basta-basta lang mabalewala sang pagpatalang sang militar.

Padayon man ang paglunsar sang aksyon militar sa mga Pulang hukbo batuk sa mga lehitimo sini nga target kag mg indibidwal nga may utang nga dugo sa pumuluyo kag rebolusyon. Mas nagabalik ang kaisog sang masa panahon sang makalunsar sang mga taktikal nga opensiba ang ila pulang hukbo labina sila ang nangunang biktima sang kalakasan sang reaksyonaryong estado paagi sang ila pasistang instrumento nga mga militar kag paramilitar. Nakita nila nga paagi sang paglupok sang pusil sang mga pulang hukbo malab-ot ang hustisya sosyal nga ila ginapangita tubtob san-o indi gid nila maangkon dira sa reaksyonaryong estado.

Padayon man ang pagpaarmas sang mga Pulang hukbo paagi sa mga internal nga konsolidasyon sini. Nangin pasulong ang kampanya sang paghiwat sang SICA sa tagsa-tagsa sini erya nga ginahulagan, kag sa mga mauti nga pagpalibog sa paghimo sang mga plano labina sa tatlo ka integral nga hilikuton sini nga amo ang pagtukod sang baseng masa, reb agraryo kag paglunsr sang armadong paghimakas.

Sa milabay nga duha ka tuig nakita ang dako nga paglambo sa lain-lain nga patag sang hilikuton kag ginalantaw nga paagi sang padayon nga pagtuon sang mga leksyon sang inagihan liwat nga magasulong sa mas taas nga lebel ang armadong paghimakas sa sakop sang South Central Negros.

Dugang sini, ang bug-os rebolusyonaryong pwersa idalom sang RNC-NPA sa absolutong pagpamuno sang Partido nga naarmasan sang teorya sang MLM, magatinguha nga doblehon ukon triplehon ang pagpaninguha sang paglunsar sang lapnagon kag sinsin nga pakig-away gerilya base sa nagadalom kag nagalapad nga baseng masa. Mas palanugon pa sini ang mga taktikal na opensiba nga sarang sini malunsar kadungan sang mabaskog kag nagadahunog nga panawagan sang malapad nga pumuluyo sa kadalanan kag kasyudaran para sa matuod nga pagbag-o kag isa ka gobyerno nga matuod nagaserbisyo sa pumuluyo.

Dapat magadahunog man ang mga aksyon militar sang NPA batuk sa armadong makinaryas sang reaksyonaryong estado kag mga makinaryas sini. Isip nangunang porma sang paghimakas, paagi lamang sa lupok sang pusil maagaw ang gahum-pulitika kag maangkon ang matuod nga pagbag-o sang pungsod.

Mabuhay ang ika-57 nga anibersaryo sang PKP!
Mabuhay ang Bagong Hukbong Bayan!
Mabuhy ang rebolusyonaryong masa!