Wala sang serbe ang gintan-ay nga localized peace talks nila Cong. Mercedes Cheding Alvares kag Mayor Bading Escalante para sa mga mangunguma, mga mamumugon sa kampo, mga pamatan-on kag iban pa nga pigos kag ginahimuslan nga pumuluyo sa isla sang Negros, subongman sa bilog nga pungsod Pilipinas. Nagaserbi lang ini sa interes nila nga mga dalagku nga haciendero kag nagapanag-iya sang malapad nga kadutaan sa Negros upod sa mga lokal nga burgesyang komprador.

Ang ila ginatan-ay nga localized peacetalks ang nagatuyo nga pagpabilin sang kahimtang kon diin miserable nga ginapas-an sa mga mangunguma ang problema sa kakulangon kag wala sang duta kag masami biktima sa pagpalayas sa ila ginatikad nga kadutaan bangud sa pagmonopolyo sang duta sa pipila ka agalon mayduta; naga-antus ang mga mamumugon sa kampo nga nagabaton sang manubo nga sweldo nga tag 250-300 pesos kada adlaw nga indi makabuhi sa iya pamilya kag wala sang benepisyo; apektado ang mga pamatan-on sa kolonyal, komersyalisado, kag represibo nga edukasyon; kag kon diin ang kubos nga mga pumuluyo ang natam-an sang pagtaas sang presyo sa mga balaklon. Sa lip-ot nga pagkahambal, tumong sini nga ipabilin ang garok nga sistemang malakolonyal kag malapyudal.

Dapat itatak sa pamensaron sang mga opisyal sang LGU sa Negros nga ang problema nga ginaatubang sang Negrosanon kabahin sang pangkabilogan nga problema sa bilog pungsod. Pinakahaom nga tikang ang pagbalik sa hambalanon pangkalinong sa pungsodnon nga lebel agud mahatagan sang kasulbaran ang ugat sang masobra 5 ka dekada nga gyera sibil sa aton pungsod.

Para sa pumuluyong ginapigos kag ginahimuslan, nagasuporta ang LPC-NPA kag ang bilog rebolusyonaryong pwersa sa Central Negros sa pagrepresenta sang NDFP sa pagsulod sang peace talk. Subongman, may peace talk man o wala, handa ang mga pulang hangaway idalum sang LPC-NPA sa pagpasingki sang inaway banwa ilabina subong nga ang utok-pulbura nga si DND Secretary Gibo Teodoro kag iban pang opisyales sa Philippine Army ang nagpadayag na sa ila panindugan nga sirado na sila sa ‘peace talks.’ Isa ini ka palatandaan nga ang rehimeng US-Marcos II wala tuyo nga hatagan sang tsansa ang mga handum sang mga pumuluyo.