Ginadayaw sang Mount Cansermon Command-New People’s Army South Central Negros Guerrilla Front ang maisog nga pagdepensa sang isa ka yunit sang New People’s Army batok sa pagpang-atake sang pasistang 94th IBPA sa sityo Kamuag, Brgy. Carabalan, Himamaylan City karun nga adlaw, Abril 19 pasado alas 9:00 sang aga.

Natabo ang engkwentro sang nagapatigayon ang NPA sang Community Health Campaign kontra-COVID-19. Bisan pa man nga nagdeklarar ang NPA sang ceasefire extension, lipod sa pasistang AFP nga wala gid naghalog ang pulang hangaway sa pagbantay sa ila posibilidad nga pagpang-atake.

Resulta, indi magnubo sa 8 ang kaswalti sa mga nasambit nga mersenaryong AFP. Kumpirmado 3 ang KIA, 4 WIA samtang hungod naman nga gintago sa publiko ang iban pa nga kaswalti sa nag-atake nga pasistang tropa. Samtang matawhay naman nga naka-atras ang NPA matapos ang 30 minutos nga linukpanay.

Wala nagapangayo-kayo ang NPA sa mga masa sa lugar. Kundi indi mapunggan ang pumuluyo nga magsuporta sa NPA bangud hugot nga naka-angot ang rebolusyonaryong kahublagan sa ila dira sa “lubos nga pag-alagad sa masa”. Ang CPP/NPA ara sa ila sa tion sang mga katalagman kag kalamidad. Kaangay karun nga nagapakig-away kita sa makamamatay nga Coronavirus kag grabe nga pag-antus sa gutom kag kapigaduhon.

Wala man handum ang NPA nga magpangkuha sang mga relief goods nga para sa pumuluyo. Taliwas ini sa mga kabutigan nga mga palayag ni Col. Inosencio Pasaporte sang 303rd BdePA batok sa New People’s Army.

Kabutigan kag pagpatalang man ang justification ni Col. Pasaporte nga ang 94th IBPA nagapanagtag sang Social Amelioration Program (SAP) dira sa mga pumuluyo sa lugar. Lunsay operasyon militar ang ginlunsar sang pasistang tropa batok sa NPA kag bug-os nga rebolusyonaryong kahublagan sang natabo ang engkwentro.

Liwat ginamando sang MCC-NPA nga padayon nga magbinantayanon sa dugang pa nga patraidor nga pagpang-atake sang pasistang AFP, PNP kag iban pa nga tropa militar batok sa NPA kag bug-os nga rebolusyonaryong kahublagan.

Ipadayon ang paghatag sang serbisyo medikal sa masa batok sa COVID-19 pandemic. Magmatinugahon sa hilikuton produksyon kabahin sang agraryong rebolusyon batok sa gutom kag kapigaduhon bunga sang kawad-on sang duta kag palangabuhian sa pihak sang kakulangan sang serbisyo sosyal gikan sa inutil nga US-Duterte nga rehimen.