Ubuson man sang kaaway ang NPA, sa madugay kag madali, maga-alsa sa gihapon ang pumuluyong pigos kag ginahimuslan, agud sukton ang mga krimen sang nagahari nga sahi, kag sang bayaran nga armadong kusog sini, ang AFP. Ini ang pangako sang rebolusyonaryong kahublagan sang mangunguma sa Panay, sa idalum sang Pambansang Katipunan ng Magbubukid-Panay (PKM-Panay).

Ginahatag sang rebolusyonaryong masang mangunguma ang pinakamataas nga pasidungog sa onse ka kadre sang Partido Komunista sang Pilipinas kag mga pulang hangaway nga na-martir sa inaway nga nagluntad sa mga binukid sang Calinog, Lambunao kag Valderrama sa tunga sang New People’s Army kag mga bayaran nga soldado sang estado.

Ang NPA ang matuod-tuod nga hangaway sang rebolusyonaryong masang mangunguma. Ang pinakahandum sang sahing mangunguma amo nga mag-angkon sang kaugalingon nga duta nga matalauma kag mahilway sa kadena sang kapigusan kag kaimolon. Nahangpan sang rebolusyonaryong masang mangunguma nga ang ini nga handum malab-ot lamang paagi sa isa ka inaway-banwa, paagi Sa isa ka demokratiko nga rebolusyon sang banwa.

Ang hugakum nga agalon mayduta, burgesya kumprador kag ang amo sini nga imperyalistang Estados Unidos amo ang nagapatuyang sa manggad kag resorsa sang pumuluyo, kag sa kada paghulag sang masang mangunguma agud iduso ang ila kinamatarung sa duta, pagkaon, suporta sa panahon sang mga kalamidad—ang sabat sa ila mga matarung nga mga demanda amo ang malaparan nga pagsabwag sang kakugmat sa mga komunidad: militarisasyon, pagpamahug sa pumuluyo, pagpangdakop, pagkaso, pagpamatay sang mga lider-mangunguma.

Kun wala ang New People’s Army, wala sang gahum ang pumuluyo; ilabi na ang masang mangunguma. Amo ini ang nagtulod kay Romulo Iturriaga Gangoso, Jose Jerry Tacaisan, Armando Rogelio Savariz, Jielmor Gauranoc, Jovelyn Silverio, John Paul Capio – nga lunsay naghalin sa sahing mangunguma, nga magpasakop sa NPA kag mag-alagad sang lubos kag bug-os panahon sa rebolusyonaryo nga kawsa sang pumuluyo.

Ginapasidunggan man sang rebolusyonaryong masang mangunguma ang mamumugon-lider nga si Aurelio Bosque nga lubos ginhakos ang kawsa sang sahing mangunguma.

Pinakamataas man nga pasidungog ang ginahatag sang PKM-Panay kay Vicente Hinojales, sektretaryo sang Komite sa Rehiyon sang Panay; kay Ka Concha Araneta-Bocala, sang NDFP; kay Rewilmar Torrato sang Jose Percival Estocada Command.

Ang bug-os nga rebolusyonaryong kahublagan sang mangunguma sa isla nagapakig-unong sa ila mga pamilya kag abyan sa ila pagpangalisod. Ang ila pagkamatay daku nga kadulaan para sa bug-os nga rebolusyonaryong kahublagan. Apang, isa man ini ka pagpanghangkat para sa aton tanan nga magpadayon, kag sugpunan ang ila rebolusyonaryo nga pagpaninguha.

Ang miserable nga kahimtangan sang masang mangunguma kag ang pagpang-ipit sa ila sang estado kag armadong kusog sini ang nagatulod sa pumuluyo agud mag-pasakop sa armadong paghimakas kag magpatapu sa New People’s Army. Kag sa kada pagkamartir sang hangaway sini, nagadalum ang indi matakos nga kaugot kag dumot nga ginabatyag sang rebolusyonaryong masang mangunguma batuk sa mga kaaway sini.

Wala sang ilusyon ang rebolusyonaryong masang mangunguma nga matalunsay ang pagrebolusyon. Mapiot kag madamo sang tunok ang banas pakadto sa kahilwayan; apang ginatulod ini sang kahimtangan, kag wala sang iban pa nga pwede ubrahon agud mahilway ang masang mangunguma kag bug-os nga pumuluyo, kundi ang magpasakop sa NPA, kag magpursiger tubtob sa kadalag-an sang demokratikong rebolusyon sang banwa.

Mabuhay ang rebolusyonaryong masang mangunguma! Mabuhay ang Pambansang Katipunan ng Magbubukid! Mabuhay ang New People’s Army, ang pulang hangaway sang pumuluyo!