Lip-serving ang mga paandam ni Capt. Catalogo sang Negros Occidental Provincial Police Office sa mga pulitiko kag landlords sa probinsya kaangot sa isyu sang paghupot sang mga private goons. Kabutigan kag pagpatalang man ang palayag ni Capt. Catalogo nga “Wala sang nagaluntad nga private goons sa probinsya.” Kaangay lang sang “paka nga nagpabilin sa idalom sang bubon” si Catalogo kon maghambal.

Ginahangkat sang Leonardo Panaligan Command-New People’s Army nga maggwa si Capt. Catalogo sa apat ka pamusod sang NOCPPO. Antis maghambal si Catalogo dapat may madalum nga pagpanalawsaw ilabe na sa 4th kag 5th District sang probinsya kon bala may naga-eksister nga private goons sa mga nasambit nga lugar. Indi matago sa mga pumuluyo kag sa NPA sa sini nga mga lugar ang paghupot sang mga private goons sang mga pulitiko kag despotiko nga agalon may duta nga masami amo ang ginagamit sa pagpamahug sa ila kasumpong sa pulitika kag pagpang-agaw sang duta ukon land dispute batok sa mga organisadong mamumugon sa uma, sa kampo, mga mangunguma kag iban pa nga mga tenants. Mabaskog nga nagapanindugan ang NPA nga may mga pulitiko kag despotikong agalon may duta sa Kwatro kag Kinto Distrito sang probinsya kaangay sang mga prominente nga pamilya nga naga-inisyal sang PELL-MONAROMI-CIN.

Ginahangkat sang LPC si Catalogo ilabe na ang NOCPPO nga mangin tampad sa publiko kag ipatuman ang inyo ginapa-andam sa mga pulitiko kag despotiko nga agalon may duta sa nasambit nga mga Distrito sa probinsya. Ipakita sa tanan nga mga pumuluyo sa probinsya nga may desaysibo kamo nga tikang sa pagbungkag sang nasambit nga mga private goons. Sa eksperyensya, indi malipod sa kadam-an; ang NPA may makasaysayan na nga rekord sa pagsilot pabor sa mga biktima nga pumuluyo kag indibidwal batok sa kapintas sang mga nasambit nga hubon.###