Sinipikante nga ginasaulog naton karun nga adlaw-Disyembre 26, 2025 ang ika-57 nga anibersaryo sang Communist Party of the Philippines (CPP) gikan sa pagkatukod sini sadtong Disyembre 26, 1968.

Ang Leonardo Panaligan Command-New People’s Army (LPC-NPA) sa Central Negros, lubos gid nga nagapanginbulahan sa tanan nga mga katapo kag kadre sang Partido, mga hangaway sang banwa kag Pulang kumander kag bug-os nga katapuan sang rebolusyonaryong organisasyon masa sa ila kaisog nga magpangibabaw dira sa pag-atubang sa pokus kag sustenido nga operasyon militar. Sa balayon sang kahublagan panadlong, determinado nga gin-atubang nila ang mga sakripisyo kag kabudlayan sa patag-awayan.

Ginapasalamatan man namon ang mga alyado, demokratiko-patriotiko kag mga nahanungang pwersa kag iban pa nga mga abyan sa rebolusyon nga nakig-upod kag padayon nga pagsuporta sa mga paghimakas masa kag armadong rebolusyon.

Kadungan sini, ginapasidunggan man naton ang aton mga rebolusyonaryong martir nga naghalad sang ila kabuhi kag kinaalam sa masa kag rebolusyon. Ginahatagan man naton sang mataas kag rebolusyonaryo nga pagsaludo ang mga martir gikan sa hanay sang rebolusyonaryong masa nga wala kaluoy nga ginpamatay sang pasistang 62nd IB nga tubtob subong wala pa naangkon sang ila pamilya ang hustisya. Sila ang aton inspirasyon sa pagpadayon sang armadong rebolusyon.

Ang ini nga kahiwatan, saulugon naton nga puno sang militansya bangud sang aton mga naabot nga mga signipikanteng kadalag-an sa ideolohiya, pulitika kag organisasyon sa giya sang kahublagan panadlong.

Sa Partido; mataas nga ginbandera sang Partido sa prenteng gerilya ang Marxismo-Leninismo-Maoismo (MLM). Ini ang kalibutanong teoryang-ubay sang sahing proletaryado kag malig-on nga pundasyon sang Partido rason sang aktibo nga nagpabilin ang larangan gerilya sa tunga sang pasismo kag terorismo sang estado. Diri nahublasan ang rehimeng US-Marcos Jr sa ginasugid sini nga ”wala na sang larangan gerilya sa pungsod.” Ginkonsolida ang Partido sa pagbalik-tuon sang mga sandigan nga prinsipyo kag husto nga aplikasyon sini sa kongkretong kahimtang kag sitwasyon militar.

Sa partikular, madinalag-on nga nakalunsar ang LPC-NPA sang kolektibo nga pagtuon sang intermedyang kurso sa Partido. Nag-angat ini sang kamuklatan pampulitika sang mga katapo kag kadre sang Partido. Naggiya sa pagpalambo sang daan nga praktika padulong sa bag-o, lig-on kag mas malambuon nga aplikasyon sang mga teknika kag taktika sa pagpakig-away gerilya kag iban pa nga aspeto sang pagsulong. Ang sapanahon nga pagtuon sang mga memorandum, advisories, Ang Bayan, Ang Paghimakas kag iban pa nga publikasyon sang Partido ang naghatag man sang dugang nga giya nga makahimo sang nagakaigo nga plano sang mga hilikuton kag husto nga implementasyon sa natalana nga panahon. Subongman, dugang nga kinaalam sa paghakos sang mga sandigan nga prinsipyo.

Kadungan sini ang wala duha-duha nga pagsaway kag pagsaway sa kaugalingon agud nagapanguna nga puntingon ang sakit sang empirisismo sa ideolohiya; sikwayon ang konserbatismo kag liberalismo sa pulitika kag sakit sa organisasyon nga amo ang burukratismo kag ultra-demokrasya.

Madinalag-on man nga natigayon ang paghim-os sang Social Investigation and Class Analysis (SICA). Kolektibo nga gintun-an sa pagkilala kag paghakos sang mga kontradiksyon kag pagpunting sang nagapanguna nga problema kag isyu nga gina-atubang sang masa ilabe na ang kinaiya sang pagpamigos kag pagpanghimulos sa mga sandigan nga sahi kag sektor.

Gamit sang mga katapuan kag kadre sang Partido ang nagasanto nga mga pamaagi kag taktika para tigayunon ang malaparan nga pagpukaw, pag-organisa kag pagpahulag sa masa. Paagi sini mahim-os ang husto nga plano kag panawagan nga segurado batunon sang masa kag aktibo nga pagpahulag sa ila.

Dako man nga kadalag-an ang pagtuon kag pagpalapnag sang masobra dekada (2008-2023) nga sumada sa prenteng gerilya. Nangin iwag ini sang mga responsableng kadre kag opisyal sang Pulang hangaway sa dugang nga pagpa-uswag sang komprehensibong rebolusyonaryong hilikuton. May natigayon man nga pagsumada sang mga eksperyensya sa pagsulong sang armadong paghimakas nga nakabulig man sa iban nga larangan gerilya sa isla kag iban pa nga rehiyon sa pungsod. Ini ang kasugpon sa pagpalambo sang praktika gikan sa komprehensibong sumada sang nagliligad.

Padayon nga nagdaku ang kusog sang Partido sa saklaw sang larangan gerilya. Nakarekrut sang dugang katapuan sa sulod sang NPA, lokalidad kag iban pa nga yunit sang Partido. Nakapatuhaw kag nakadebelopar man sang mga bag-o, responsable kag mga batan-on nga kadre sang Partido nga desidido kag determinado nga pamunuan ang nagahimakas nga masa sang pumuluyo kag absoluto nga panguluhan ang NPA. Natigayon ini sa rekta nga paghanas sa ila sa pagdireher sang mga rebolusyonaryong hilikuton dira sa ginapatigayon nga hilikuton masa.

Nakapalig-on sa ila ang pagsumada sang ila mga rebolusyonaryong inagihan kag bukas nga kinaiya kag huna-huna sa giya sang edaran kag relatibong eksperyensyado nga mga kadre sang Partido. Nagpatunga sa ila ang prinsipyo sang pagsaway kag pagsaway sa kaugalingon nga may paghiusa kag hugot nga pagbinuligay. Sila ang mabakod nga pundasyon sang Partido sa pasulong kag mas nagalig-on nga armadong rebolusyon.

Sa sulod sang isa ka tuig (2024-2025), mas naglapad kag naglig-on ang baseng masa nga hilway mahulagan sang NPA kag rebolusyonaryong pwersa sa larangan gerilya. Ini bangud sang pursigido nga pagpatuman sang mga plano kag programa sang Partido nga nagsabat sa Kahublagan Panadlong nga liwat ginpanawagan sang Komite Sentral sang CPP ok. Magaserbe ini nga patag-awayan kag dugang nga kusog sa pagatukuron nga mga organong gahum pulitika paagi sa lapnagon kag dasok nga pakig-away gerilya sandig sa nagalapad kag nagadalom nga baseng masa.

Madinalag-on man nga natungdan ang hilikuton rekoberi kag solidong pag-organisa. Tayuyon nga naangat ang kamuklatan pampulitika sang masa dira sa padayon nga paglunsar sang mga rebolusyonaryong pagtuon kag paghanas sang PADEPA kag iban pa nga mga rebolusyonaryong pagtulun-an. Kadungan man sini ang padayon nga pagpukaw, pag-organisa kag pagpahulag sa masa dira sa wala-kataka nga paglunsar sang hilikuton edukasyon-propaganda. Naghatag sang kaisog sa masa sa pag-atubang sa wala-untat nga pagpamahug kag pagpang-ipit sang pasistang militar sa baseng masa.

Lig-on man nga napahulag ang masa sa agraryong rebolusyon halin sa ginagmay kag lapta-lapta nga paghulag sang masa batok sa lain-lain nga tipo sang mga pagpamigos kag pagpanghimulos sang agalon may duta sa hanay sang masa. Matingkad diri ang pagpanubo sa bahinay sang produkto kag liwat nga pagpang-agaw sa ila sang duta kag palangabuhian bunga sadto sang ila mga kadalag-an batok sa bag-ong nagpakilala nga heridero kag agalon. Isa pa sa mga matingkad amo ang pagpalapnag sang kooperasyon nga dagyaw alayon nag nagbunga sang pagtaas sa produksyon agrikultural sang mga mangunguma.

Ini ang kabangdanan sang padako kag padako pa nga isip sang nagabaskog nga solidong organisasyon masa. Indi magnubo sa 10% nga dugang sa kabilugan nga isip sang baseng masa. Sila ang madalom nga tuburan sang mga rebolusyonaryong pwersa sang nagabaskog nga rebolusyonaryong kahublagan ilabe na sang CPP-NPA-NDF sa sulod sang larangan gerilya.

Naglig-on kag nagbaskog ang kusog sang NPA. Sa giya sang kahublagan panadlong, ginhatagan tum-ok ang pagpangibabaw sa konserbatismo kag liberalismo. Madamo nga mga pamatan-on ang nagsampa sa NPA. May iban pa sini nga ara na sa proseso sang pagpatapo sa NPA. Sila ang mga aktibo nga mga katapo sang organisasyon masa sang Pamnansang Katipunan ng Magbubukid (PKM), Malayang Kilusan ng Bagong Kababaihan (Makibaka) kag Kabataang Makabayan (KM).

Paagi sa kolektibong pagtuon sang mga sandigan nga prinsipyo kag paghanas pulitiko-militar, nakonsolida ang kabug-osan nga katapuan kag opisyal sang MPA nga may hugot nga disiplina. Natukod, nare-organisa kag nakonsolida man ang mga yunit milisya kag iban pa nga yunit gerilya. Sila ang reserba nga kusog sang NPA sa pagtungod sang integradong hilikuton ilabi na ang nagapanguna nga tahas sa paglunsar sang taktikal nga opensiba batok sa reaksyonaryong kaaway.

Madinalag-on nga nakalunsar kita sang 13 ka taktikal nga opensiba nga nakakumpiska sang mga armas kag iban pa nga lohistika militar sa sulod sang isa ka tuig. Naka-agum man ang NPA sang isa ka depensibang aksyon kag duha ka kontra-opensiba kag madinalag-on nga napreserbar ang kusog sang Partido kag NPA. Samtang nag-agum ang pasistang 62nd IB sang 25 nga kaswalti kag madamo pa nga napilasan sa hanay sini. Kapin sa 13 man sang mga kriminal, kontra-rebolusyon kag malain nga elemento ang napahamtangan sang silot nga kamatayon nga naghatag sang hustisya sa hanay sang masa nga ila nabiktima.

Lubos nga ginaabi-abi sang masa ang NPA. Bilang matuod nga hangaway sang masa, nagluntad ang tuman ka hugot nga paghiliusa kag pagbuligay sa tunga sang NPA kag rebolusyonaryong masa. Samtang ara ang pagpaseguro sang masa sa seguridad sang Pulang hangaway batok sa pagpang-atake sang pasistang kaaway, libre man nga naghatag ang NPA sang pagtuon, paghanas, pagsolbar sang mga problema sa tunga sang pumuluyo, paghatag serbisyo medikal kag pagbulig sa produksyon sang masa. Ini ang tatak sang NPA nga ginakahamut-an sang malapad nga masa nga may lubos nga pag-alagad sa ila. Indi malutos ang NPA bangud sang wala paghubas nga suporta sang masa sa ila hangaway sang banwa. Sa ginasiling pa, “Wala bisan anu ang pumuluyo kon wala sang ila kaugalingon nga Pulang hangaway sang banwa.”

Sa kabilugan, naangkon lamang sang bug-os nga rebolusyonaryong kahublagan ang mga signipikanteng kadalag-an karun nga tuig, bangud sang husto nga pagpamuno sang CPP kag hugot nga angot sang Partido sa masang katapuan upod sa padayon nga nagabaskog nga suporta sang malapad nga hanay sang masa.

Ginasigahum nga malampuwasan pa naton ang sunod nga mga paghangkat kag liwat nga mag-agum sang mas supisyente kag signipikanteng pag-uswag sandig sa obhetibong sitwasyon kag suhetibong kusog sang bug-os nga rebolusyonaryong kahublagan.

Sa ika-3 ka tuig na nga kampanya sang kahublagan panadlong, mas malaparan nga aksyon rali-protesta kag iban pa nga aksyon masa sa mga kaumhan kag mga dalanon sa kasyudaran sang isla sang Negros nga ginapasakupan sang nagkalain-lain nga sektor sang mga kabataan-estudyante, kababaihan, imol nga taga-syudad, mga propesyonal, abogado, manunudlo, media, negosyante lakip na ang taong-simbahan sa pagpamuno sang sadigan nga alyansa sang sahing mamumugon kag mangunguma. Ini ang makahulusga nga kusog sang masang anakbalhas nga magpukan sa mapiguson, mahimuslanon kag garuk nga nagaharing sistema.

Base sa “lapnagon kag dasok nga pakig-away gerilya sandig sa nagalapad kag nagadalom nga baseng masa,” madamo nga maayong-anak sang banwa gikan sa mga intelektwal nga kabataang-estudyante ang magsaka sa mga kaumahan sang isla nga lubos panahon nga mag-alagad sa masa dira sa pagpasakop sa NPA. Sa ila mga kusog nakasandig ang pagpadayon sang armadong paghimakas sang mga rebolusyonaryong Negrosanon sa mas mataas nga halintang sang inaway banwa.

Kadungan sini ang pag-alingawngaw sang lupok sang pusil sa mga kaumahan paagi sa madinaugon nga taktikal nga opensiba sang Bag-ong upod sa nagadako kag nagabaskog nga kusog sang yunit milisya kag iban pa nga yunit gerilya agud pabayaron ang pasistang AFP, PNP, paramilitar kag NTF-Elcac sa ila mga utang nga dugo sa pumuluyong Negrosanon.

Itib-ong ang Marxismo-Leninismo-Maoismo!

Isulong ang demokratiko nga rebolusyon sang banwa kag pasingkion ang inaway banwa!

Mabuhay ang sahing proletaryado kag pumuluyong Pilipino!

Mabuhay ang Partido Komunista sang Pilipinas sa kahiwatan sang ika-57 nga Anibersaryo! ###