Namutikan sang mga pumuluyo sa Carabalan, Himamaylan City, Negros Occidental ang pagdamo sa presensya sang militar sa ila komunidad halin sang nagligad bulan.

Sadtong Septyembre 19, nag-abot ang pasistang 94th IB sa baryo sang Carabalan kag ginsuyod ang mga sityo sang Kasipungan, Florete, kag Namugsok. Nagtiner sila sang simbahan kag mga balay sang mga residente sa sulod sang anum ka adlaw.

Samtang sa pag-imbukada sang Oktubre, nag-abot naman ang pito ka kolum sa berdugong militar sang amo gihapon nga barangay, partikular sa mga sityo sang Bonton, Medel, Sig-ang, Ortiz, Kambuongon, Tugas, kag Cunalom. Halos mga pampubliko nga mga institusyon ang ila gina-okupar kaangay sang eskwelahan.

Nagtuga ini sang kakugmat sa mga pumuluyo bangud asud-asud ang pagpatawag sa ila para sa interogasyon. Sa proseso sini, ginahadlok sila sang mga abusador nga militar nga kon indi sila magkooperar, patyon man sila lakip na ang ila mga kabataan.

Sini nga semana lang, ginpatawag ang pamilyang Fausto nga taga Sityo Nasalsag, ang pamilyang Espante halin sa Sityo Poblador, tanan residente sang Barangay Carabalan kag pamilya Malepaonon sa Sityo Cabadiangan, Barangay Mahalang. Paisa-isa naman nga ginsaka ang mga balay sang pumuluyo sa Sityo Baton, Barangay Carabalan kag amo man gihapon nga kalakasan ang ginhimo sang tropa militar sa ila lugar. Gintanyagan man sila sang 94th IB sang dako nga kantidad kabaylo sang ila mapadakop kag mapapatay nga Pulang hangaway.

Dugang diri, ginpalayas sa mga pasistang militar upod si Dandy “Isay” Salvador”, isa ka kriminal kag supog nga CAFGU, ang pamilya Domen nga taga Sitio Pangi, Barangay Carabalan.

Ginkondena sang Romeo Nanta Command-New People’s Army (RNC-NPA) ang pagpanglapas sa tawhanong kinamatarung nga ginkomiter sang tropa militar. Sa pihak bahin, nagapangabay man ini sang mga pumuluyo nga indi magkahadlok. Sa amo sini nga panahon, nagakinahanglan sang mas hugot nga paghiliusa sang pumuluyong Negrosanon.