Mahugot nga ginkukundenar han National Democratic Front-Eastern Visayas an ginhimo nga panmusil han usa nga hubog nga elemento han Alpha Company han 43rd Infantry Battalion, Philippine Army nga ginkasamad han duha nga sibilyan ha Barangay 13, Catbalogan City hadton Hulyo 21, alas-6 han gab-i.

Usa la ini ha mga landaw nga kaso nga ginkakadabihan han usa nga sundalo nga abusado ngan hubog. Hadton Marso 2 la ginpanmusil han usa nga hubog liwat nga sundalo nga nakadeploy ha hedkwarters han 8th ID an duha nga sibilyan ha Barangay Dalakit, Catarman, Northern Samar nga ginkamatay han usa nga sibilyan ngan ginkasamad han bugto han namatay. Ginpapakita hini nga mga insidente diri la an mapan-abuso nga kinaiya han mga elemento han 8th ID, kundi hasta an arogansya ngan pagigin hiara ha kawaray baratunon han reaksyunaryo nga hukbo. Labot ha hubog, imbes nga pamatian an suson han masa nga sibilyan kasumpay han kaayusan ha pagpaparada han sarakyan, an pasista nga tropa ha Catbalogan arogante nga binaton han pagpapabuto ngan panmusil.

Diri bag-o ha katawhan han rehiyon labina ha kabaryuhan an sugad hini nga batasan han mga elemento han 8th ID. Ha mga lugar nga nakadeploy an mga yunit han RCSP, adlaw-adlaw nga nahiaaguman han masa nga parag-uma an arogansya ngan kawaray baratunon han reaksyunaryo nga hukbo. Labot ha paghinubog, nangunguna nga tagawakay ini han mga kaayusan ha sakob han komunidad nga kolektibo nga ginpundar han mga residente ngan ginpadig-og pinaagi han mga ordinansa.

Pasimuno an mga sundalo ha pagduso han mga kontra-sosyal nga aktibidad sugad han paghinuygo, pagdudruga, pangunguryente han mga sapa ngan salog, ngan paniniyupi ha kababayin-an. Libyano an mga dayo nga sundalo nga sumakob-gawas ha komunidad samtang gin-gigipit ngan ginlilimitaran hini an matag-adlaw nga aktibidad han masa labina han mga parag-uma nga nagpapakabuhi. Gin-oobliga mismo an mga lokal nga residente nga mag-logbook ha kada paggawas ngan pagsulod han ira barangay ngan gindidid-an o ginlilimitaran hira nga gumawas para magpakabuhi. Ini nga pangabuso ginrereklamo han masa kundi ginbabaton ini han pananarhug, panhadlok, red-tagging ngan tubtub ha pagpatay.

Ha bug-os nga rehiyon, diri mamenos ha 100 nga kaso han pagpatay ngan gin-atentar nga pagpatay an nahilista hadton 2018-2025 diin dabi an mga sundalo han 8th ID nga nakabiktima han 151 nga sibilyan. Kaupod ha mga an mga menor de edad, mga upisyal han barangay ngan kababayin-an. An mga kaso han pagpatay ngan gin-atentar nga pagpatay ginhimo ha magkalain-lain nga porma sugad han estilo nga “tokhang,” pagsikmit antes patayin ngan pangistraping. Kaupod ha mga pinakaurhi nga biktima an menor de edad nga hi Jason Padullo Grafil nga ginpanmusil han mga elemento han 63rd IB ha Pinanag-an, Borongan, Eastern Samar hadton nakalabay nga tuig. Hini la nga nakalabay nga bulan nahireport an pagpapabuto han tulo karound han M203 ha sibilyan nga hi Olid Yanay ng Paco, Las Navas, Northern Samar.

An kamadarahug, pangabuso, ngan kawaray baratunon nag-eespiho ha pasista nga kinaiya han 8th ID. Naatok an sugad hini nga kultura ha kadak-an han elemento hini ngan komo usa nga istruktura ngan organisasyon nga nagseserbe ha matipyupion nga naghahadi nga klase nga gintataglawas yana han rehimen Marcos. Mahisasalikway, maaatuhan ngan mababag-o la ini pinaagi han determinado ngan duruyog nga paggios han katawhan diri la agud ibuksas an mga pangabuso ngan kamadarahug ngan papagbatunon an mga pasista, kundi labina gud pinaagi han demokratiko nga rebolusyon han katawhan. Ha sugad mahitutukod ngan mapapakusog an tinuod nga hukbo han katawhan nga magrurumok ha reaksyunaryo nga hukbo, mahipapasulong an hustisya nga pankatilingban, ngan madedepensahan an demokratiko nga katungod han katawhan.