Pannakaabak ni Mayor Dunuan, pakakitaan ti disgusto ti umili iti Baggao

Adayo nga amang ti naala a botos ni incumbent Mayor Joan Dunuan kumpara iti dua a kalaban na iti kinamayor kadaytoy 2022 National and Local Elections. Dakdakkel ti 5,000 a botos ti naala ni mayor-elect Leonardo Pattung ken nasurok 1,000 ti nangabakan ni incumbent Board Member Cris Barcena kumpara iti 9,461 a botos ni Dunuan. Saan a nagbalin ti “pakaradap” na nga inurnong na manipud iti pondo ti surrender program a pinagbalin na a pagbagasan iti unos ti tallo tawen. Uray tu pay iti mismo balwarte na ket nganngani pay a maabak isuna.

Naupay ti umili nangruna dagiti mannalon iti nagbalin a perpormans na iti umuna pay laeng a termino na. Kasano ket saan na nga inaprobaran ti kiddaw ti mannalon a pagbalinen a municipal ordinance ti panagpunas ti interes ti pautang iti panawen ti kalamidad. Daytoy a kiddaw ket napagballigian ti timpuyog ti mannalon iti Baggao kalpasan iti naiinget a komprontasyon nu sadino ket naiduron nga agpirma dagiti trader ti baba inggana surong Baggao. Ken kas iti among na a ni Duterte, puskol-rupa ken lantaran a nakikadua isuna kadagiti pulis ken militar a kas keni Col. Reynante Salvador tapno agtalinaed iti turay. Apagtugaw na pay laeng idi 2019 ket nagadu a lider-mannalon ti peke-pwersado a pinagsurender, pinagsubli-subli kadagiti kampo, binutbuteng, minulaan ti ebidensya ken inpabalud na.

Malagip tayo nga iligal a sinerrek ti balay da Isabelo Adviento, Regional Coordinator ti Anakpawis ken Amanda Echanis, peasant organizer iti Amihan Cagayan Valley idi December 2020. Kaan-anak lang ni Echanis ngem inbalud da isuna karaman ti maysa bulan a maladaga na babaen iti mula nga ebidensya. Sinaruno daytoy ti pannakatiliw met laeng ni Kapitan Ruben Salvador iti Agaman Norte a minulaan met laeng ti paltog ken eksplosibo.

Kasilpo na ket pinakampoan na dagiti barbaryo nu sadino a napigsa ti tignayan ti mannalon para kadagiti demokratiko nga interes da. Babaen ti Retooled Community Support Program (RCSP), hinamlet dagiti tropa ti 77th Infantry Battalion ti agarup 11 a baryo iti Baggao. Inokupa da dagiti eskwelaan ken barangay hall. Kinotaan dagiti baryo nu mano ti agbalin a CAFGU. Linimitaran ken under surveillance dagiti malisyoso a pagat-atapan a suporter kano ti NPA. Pinagparintumeng da iti bumaryo iti nakaro a buteng ken panagamak kadagiti militar. Alusiisen ken saan a paturogen a nasayaat dagiti bumaranggay iti rinabii nga taol ti aso iti aglawlaw, rinabii a panaglawlaw ken panagsiim dagiti soldado iti paraangan ti balbalay laksid pay ti saan a maan-anawa a panangisungsong da ti panagbartek, panagtakaw kadagiti dinguen, panagsugal, panagbabae ken dadduma pay nga anti-sosyal nga aramid.

Linapdan na la ngaruden ti karbengan dagiti mannalon nga agtignay a nawaya, inpaidam na pay dagiti abono a naggapu iti Department of Agriculture (DA) inggana timangtangken latta imbes koma nga ibunong na dagitoy kadagiti mannalon nga agkasapulan la unay ti subsidyo, iti tengnga ti nagngingina a farm inputs. Adda ngarud tatta mamati a minadi dagiti mannalon ti libre nga abono? Ania metten! Kasta la unay ngata ti panagtagibassit na ti kabaelan tayo nga agamiris.

Ti pay maysa, inaramat na ti bileg na kas mayor tapno in-inut nga agagum ti dagdaga! Pinamulaan na ti bayog ken kiling dagiti kumkuman ti masa laksid pay dagiti imun-una nga inpamula na a rubber tree ken dadduma pay a klase ti kaykayo. Pambar na ti eco-tourism projects tapno nawaya a makaserrek dagiti dadakkel a kumpanya ti minas nga agngayngayayay manen nga agoperate iti kabakiran ti Sta. Margarita, banag a makaigapu apay a plano da a patakderan ti detatsment ti militar ti nasao a baryo. Adu a kakabsat nga Agay ti agngangabit a mapatakyas kadagiti paggigianan da a kabakiran.

Iti kabuklan na, nangngeddeng ti umili ti Baggao nga gibusan ti panagturay ti maysa a kontra-mannalon ken kontra-umili a lider a kas keni Mayor Joan Dunuan. Ti pannakaabak na ket pangilasinan, saan laeng a gapu iti nasaknap a kultura ti vote-buying a kuna ti dadduma a nakaabakan na, ta dakdakkel ti naipasuksok dagiti kalaban na, nu di ket nalawag a pammaneknek a ti umili ket agbirbiruk ti panagbalbaliw, panaggibus ti mananggundaway a sistema. Isu nga karit kadagiti baro nga agturay iti ili ti Baggao nu kasano a sangoen ken risuten ti nabayag a singasing ti umili, nangruna dagiti mannalon para kadagiti karbengan da a nawaya nga agorganisa ken ituloy ti laban para iti panagpababa ti interes ti pautang; panagpapanaw kadagiti soldado iti baryo ken lapdan ti panangibangon ti military detachment; panaglaban ti panag-agum ti daga babaen kadagiti manangallilaw a proyekto; subsidyo ken ayuda para kadagiti mannalon ken naawanan trabaho kadaytoy pandemya; de-kalidad ken abot-kaya a serbisyo a pangkagimongan.

Ti reaksyunaryo nga eleksyon ket maysa laeng kadagiti sekundaryo a wagas tapno marissut dagiti basaran a problema ti umili a Pilipino. Iti kumarkaro a krisis ti malakolonyal ken makapyudal a gimong a Pilipino, lumawlawag ti basaran ken pagkasapulan tapno itandudo ken idur-as ti umili ti armado a pannakidangadang babaen ti Demokratiko a Rebolusyon ti Umili nga adda sosyalista a perspektiba na. Rumbeng a papigsaen ti NPA babaen iti panagpasampa kadagiti kabataan ken panagirussuat ti taktikal nga opensiba; addang-addang ken sustinedo nga irussuat ti agraryo a rebolusyon ken ipagballigi dagiti antipyudal, antipasista ken anti-imperyalista a kampanya ti masa ken; buklen ti panagkaykaysa ken timpuyog ti masa para iti bukod a panaggobyerno da.

Mannalon, agkaykaysa! Irupir ti pudno a reporma ti daga!

Mannalon, kangrunaan a pwersa! Lumaok iti gubat ti umili! ###

Pannakaabak ni Mayor Dunuan, pakakitaan ti disgusto ti umili iti Baggao