Kaupod sang pumuluyo nga ginapigos kag ginahimuslan ang Partido Komunista sang Pilipinas kag tanan nga rebolusyonaryong pwersa sa paghanduraw subong nga adlaw sang ika-161 nga anibersaryo sang pagkabun-ag ni Gat Andres Bonifacio, dungganon nga baganihan sang pumuluyong Pilipino nga nagpamuno sa armadong pag-alsa para sa pungsodnon nga kahilwayan. Sa adlaw nga ini, handurawon man naton ang ika-60 ka tuig nga anibersaryo sang Kabataang Makabayan (KM) kag saulogon ang anum ka dekada sini nga wala sang kakapoy nga pag-abaga sang katungdanan nga pukawon, organisahon kag pahulagon ang mga pamatan-on Pilipino sa dalan sang pungsodnon-demokratiko nga rebolusyon kag pangmalawigon nga inaway banwa.

Sa okasyon man nga ini, liwat nga nagahatag sang pagsaludo ang Partido kay Kaupod Jose Maria Sison, tsirman nga tigtukod sang Kabataang Makabayan kag sang Komite Sentral sang PKP, sa iya dungganon nga nahimo nga liwat nga pagsindi sang espirito nga patriyotiko sang pumuluyo kag pamatan-on Pilipino. Utang sang subong kag maabot pa nga mga henerasyon sang pamatan-on kay Ka Joma ang ginpapanubli niya nga bug-os taguipusoon nga pagpalangga kag paghalad sang kaugalingon nga kabuhi para sa pungsodnon nga kahilwayan kag matuod nga demokrasya.

Ang pagtukod sang KM sadtong 1964 ang naghatag dagway sa natipon nga kaakig sang mga pamatan-on Pilipino batuk sa imperyalismong US kag sa tiraniya sang reaksyunaryo nga mga nagahari nga sahi. Ginpangunahan sang KM ang dalagkuan nga rali batuk sa mga indi patas nga tratado sang US sadtong 1965, ang mga welga estudyante sa bug-os nga pungsod sadtong 1967, ang pagpakigbahin sa mga rali sang mangunguma sadtong 1969 kag ang mga hublag protesta batuk sa gyerang agresyon sang US sa Vietnam. Ginpakamalaut nila ang pagkaido-ido sang papet nga rehimen, ginbatikos ang korapsyon sang dunot nga burukrata kapitalista nga estado kag ginpakig- awayan ang pasista nga pagpamigos. Ginwagayway nila ang bandera sang pungsodnon demokrasya kag ginpalapnag ang mga panawagan para sa matuod nga reporma sa duta, pungsodnon nga industriyalisasyon, kultura nga syentipiko kag pangmasa, pungsodnon nga demokrasya kag iban pa nga mga hinanali nga demanda sang pumuluyong Pilipino. Sadtong 1970, ginpangunahan sang Kabataang Makabayan ang Sigwa ng Unang Kwarto kon diin natay-og ang bug-os nga nagahari nga sistema sa nagadaguob nga tapaksang libuan ka pamatan-on nga nagamartsa kag nagalanog ang singgitan nga Rebolusyon!

Ang Kabataang Makabayan nagserbe nga dako nga eskwelahan nga nagtudlo sa ila nga analisahon ang kahimtangan sang sosyedad Pilipino, hakson ang reklamo kag handum sang masang mga mamumugon kag mangunguma, kag makig-isa sa ila paghimakas agud bag-uhon ang ila kahimtangan nga ginapigos kag ginahimuslan. Sa pagpanguna sang mga proletaryong kadre sa kubay sang KM, gina-engganyo ang mga pamatan-on nga magbasa kag magtuon sang mga libro kag ginsulat nanday Marx, Engels, Lenin, Stalin, Mao kag iban pa mga dungganon nga komunistang mangin-alamon agud hanason ang syentipiko, kritikal kag maragtason nga panghuna-huna sang pamatan-on Pilipino, kag gamiton ang rebolusyonaryong teorya bilang ubay sa ila paghulag agud isulong ang rebolusyonaryong sosyal nga pagbag-o.

Paagi sa KM, nagtuhaw ang isa ka bag-o nga henerasyon sang mga proletaryong rebolusyonaryong kadre nga sang ulihi nangin bahin sa liwat pagkatukod sang PKP sadtong 1968. Ang mga aktibista sang KM nga pinakatampad sa rebolusyonaryong kawsa nagpatapo sa Bagong Hukbong Bayan nga gintukod sadtong 1969. Sa mga masunod nga tuig, ang KM nagserbe nga isa ka tuburan sang mga pamatan-on proletaryong kadre, kabangdanan nga-a ang Partido Komunista sang Pilipinas nagapabilin nga mapagsik kag matutom. Sa nagligad nga mga dekada, tayuyon nga naga-ilig halin sa KM ang mga rebolusyonaryo nga nagkadto sa kaumahan, kag nagpakigbahin sa inaway banwa bilang mga Pulang hangaway kag mga kumander, kag mga upisyal sang pulitika sang hukbo sang banwa.

Bisan napwersa nga mangin likom nga organisasyon ang KM pagkatapos sang pagpatuman sang layi militar sadtong 1972, nagpadayon pa gihapon ang banas sang rebolusyonaryong pakig-away. Nagpanikasog ini sa propaganda- edukasyon kag pag-organisa sa mga pamatan-on agud ubayan sila sa pag- usoy sa banas sang pungsodnon demokrasya. Nagserbe ini nga malig-on nga haligi sa pagpakig-away agud pukanon ang diktaduryang Marcos, kag sa pakig-away sa sunod-sunod nga peke-demokratikong rehimen halin sadtong 1986.

Sa masobra lima kag tunga ka dekada, ang KM hugot nga kabulig sang Partido sa pagsulong sang demokratikong rebolusyon sang banwa. Ginahanduraw naton subong ang maragtason nga anibersaryo sang KM sa panahon nga ginasulong sang Partido kag bug-os nga rebolusyonaryong kahublagan ang isa ka kahublagan panadlong agud tadlungon ang mga kasaypanan kag kahuyangan sa ideolohiya, pulitika kag organisasyon, kag pangibabawan ang gindulot sini nga kahalitan kag pag-atras sa patag sang pagsulong sang armadong paghimakas kag rebolusyonaryong kahublagan masa. Sa subong ginapangibabawan sang Partido ang lain-lain nga tendensiya sang panghuna-huna petiburges nga nagpanalupsop kag nagpahuyang sa Partido, ilabi na sa atubang sang wala-untat nga pagwas-ag sang terorismo sang pasistang estado sa idalum ni Marcos.

Nagakuha ang Partido sang inspirasyon halin sa una kag ikaduha nga dungganon nga kahublagan panadlong nga ginpamunuan ni Ka Joma agud isulong ang pursigido nga paghimakas pang-ideolohiya agud liwat pabaskugon ang Partido kag rebolusyonaryong kahublagan. Gina-engganyo namon ang mga katapo sang Kabataang Makabayan nga maukod nga magtuon sang Marxismo-Leninismo-Maoismo, agud kritikal nga sumahon ang kaugalingon nga mga inagihan sa nagligad nga mga tinuig kag dekada, tumbukon kag tadlungon ang mga kasaypanan kag kahuyangan kag tanan nga bahin nga ipasaka ang ikasarang nga abagahon ang iya rebolusyonaryo nga katungdanan. Dapat nga matalum nga kilalahon kag pakig-awayon ang lain-lain nga tipo sang panghuna-huna petiburges nga nagapalapnag sang repormismo, liberalismo, ultrademokrasya, anarkismo, peke-radikalismo kag iban pa nga tipo sang panghuna-huna nga nagapahilayo sa ila sa banas sang rebolusyon.

Dapat pursigido nila nga kontrahon ang mga panghuna-huna nga indibidwalista, wala sang labot sa nagakahitabo sa sosyedad kag kasulhayan nga gintanum sang mga imperyalista sa ila panghuna-huna paagi sa masmidya, social media kag sang kolonyal nga sistema sang edukasyon. Katuyuan sang mga nagahari nga sahi nga gub-on ukon pahuyangon ang espirito sang ululupod nga paghulag sang mga pamatan-on kag ipalayo ang ila pamensaron sa mga komun nga ginahandum sang pumuluyo nga kahilwayan kag demokrasya. Kasubong ni Bonifacio, dapat himuon sang KM ang tanan agud tayuyon nga ibalhag ang Kalayaan bilang pahayagan nga nagaunod sang bag-o nga kritikal nga mga artikulo nga matalum nga naga- analisa sa napanahon nga mga isyu kag nagahapag sang rebolusyonaryong mga panawagan.

Dapat kontrahon ang imperyalistang pagkontrol sang panghuna-huna sang mga pamatan-on nga Pilipino kag pukawon ang ila espirito nga rebolusyonaryo paagi sa liwat pagpapagsik sang rebolusyonaryong pangkultura kag kahublagan propaganda para sa pungsodnon nga demokrasya. Ang mga pamatan-on nga intelektwal, ilabi na, ang natanggong sa ila mga akademiko nga tore dapat engganyuhon nga magpanaog sa duta, agud magtuon kag magpatigayon sang matuod nga may kapuslanan nga imbestigasyon sa sosyedad kag kahimtangan sang masang mga mamumugon kag mangunguma, nga sila ang nagatuga kag nagapauswag sang manggad sang pungsod, apang sila ang nagaantus sang pinakamalala nga kaimolon kag gutom.

Tuman ka mapuslanon sang maragtason nga halintang sang subong nga tindog sang Kabataang Makabayan kag mga pamatan-on Pilipino. Kasubong sadtong una nga gintukod ang KM sadtong dekada 1960 kag una nga mga tuig sang dekada 1970, ginasigahum sang Partido ang KM nga magbalhin sang bag-o nga rebolusyonaryong dugo kag magdala sang bag-o nga kapagsik sa madugay pa nga paghimakas sang pumuluyo para sa pungsodnon nga kahilwayan.

Sa okasyon sang ika-60 nga anibersaryo sang Kabataang Makabayan, mabaskog nga nagapanawagan ang Partido kag pumuluyong Pilipino sa makibanwahanon kag rebolusyonaryo nga mga pamatan-on nga magkadto sa kaumhan, magpatapo sa Bagong Hukbong Bayan kag magpakigbahin sa inaway banwa. Tuman ka kinahanglanon sa subong kumparar sang nagligad sang mga pamatan-on, ilabi na ang mga pamatan-on nga mamumugon kag mga pamatan-on nga intelektwal, nga mag-amot sang ila ikasarang sa pagpabaskog sang hukbo sang banwa, agud nga mas mangin epektibo ini nga hinganiban sang pagpakig-away kag pagpangapin sang pungsod sa atubang sang wala sang tupong nga terorismo sang reasyunaryo nga estado. Gina-engganyo sang Partido ang pamatan-on halin sa kasyudaran nga magkadto sa kaumhan agud magpakigbahin sa pagsulong sang rebolusyon agraryo, sa pagtanum kag pag-atipan sang mga binhi sang demokratikong gobyerno sang pumuluyo kag pagpundar sang bag-o nga sosyal nga sistema.

Sa atubang sang mas nagalala nga krisis sa ekonomiya kag pulitika sang nagahari nga sistema, nagasalig ang Partido kag pumuluyong Pilipino nga lakip ang mga pamatan-on nga Pilipino nga magmartsa sa unahan sang militante nga paghimakas sang pumuluyo batuk sa nagatinaas nga presyo, manubo nga sweldo, lapnagon nga kawad-on sang trabaho, kag pagpang- agaw sang duta kag palangabuhian sang masa sa kasyudaran kag kaumhan. Dapat pabaskugon ang ila boses sa pagpakamalaut sa papet, korap, paantus kag pasista nga rehimen Marcos.

Tuman ka kakinahanglanon subong nga manindugan ang mga pamatan-on kag pumuluyo agud pakig-awayan ang imperyalismo, pyudalismo kag burukrata kapitalismo, ang tatlo ka ugat nga problema sa subong nga nagatuga sang wala sang tupong nga pag-antus sa pumuluyong Pilipino. Ang tayuyon nga paglala sang krisis sa ekonomiya kag sosyedad sa nagligad nga apat ka dekada, kag sang nagakadunot nga sistema pangpulitika, ilabi na sa idalum sang nagligad nga latum sa tul-an nga pagkadunot sang rehimen Duterte kag subong nga rehimen Marcos, pamatuod nga wala sang padulungan ang mala-kolonyal kag mala-pyudal nga sistema kundi mas pa nga pagka-agnas, krisis kag pag-antus. Tuman ka kinahanglanon subong sa kasaysayan, dapat itib-ong ang espirito ni Bonifacio kag isulong ang rebolusyonaryong paghimakas agud agumon ang matuod nga pungsodnon nga kahilwayan kag demokrasya.