Wala untat ang operasyon militar nga ginalunsar sang mga pasista nga 15th IB sa mga nabukid nga mga barangay sang Kabankalan City, Candoni, Sipalay City, Cauayan kag Ilog sa Negros Occidental. Nagtuga ang presensya sang militar sang kakugmat sa pumuluyo kag nagdugang sa ila kaimolon.

Halin pa sa bulan sang Hulyo, naglapta ang mga tropa sang 15th IB sa mga barangay sang Magballo, Tapi, Salong, Tabugon, Bantayan kag Locotan sa Kabankalan City; mga barangay sang Gatuslao, Payawan kag Agboy sa Candoni; mga barangay sang Camindangan kag Manlucahoc sa Sipalay City; mga barangay sang Tambad, Abaca, Inayawan, Linaon, Baclao, Caliling kag Camalandaan sa Cauayan; kag sa mga barangay sang Pinggot kag Canlamay sa Ilog.

Ginapakamalaut man sang Armando Sumayang Jr Command-New People’s Army (ASJC-NPA) ang mga pagpanglapas sa tawhanon nga kinamatarung nga ginkomiter sang 15th IB batok sa pumuluyo. Iligal nga gindetine sulod sa pila ka oras ang mag-utod nga sila Jemson kag Gaujel Villar sa Sityo Camboguiot, Brgy. Camindangan, Sipalay City sadtong Hulyo 22. Gindala sila sang mga elemento sang 15th IB sa proper sang sityo. Kon wala sila ginsugat sa ila mga asawa, wala ini nakapauli sa ila mga balay.

Samtang, walo ka mangunguma ang iligal nga gindakop sang 15th IB nga sanday Allen Fica (35 anyos), Alfonso Fica (65 anyos), Dary Vinson (41 anyos), Danilo Vinson Sr (65 anyos), Nerio Menardo (57 anyos), Alfredo Nobleza Jr (35 anyos), Gali Guanzon (62 anyos) kag Nelson Libron (60 anyos), tanan mga residente sang Sityo Tugas, Brgy. Pinggot, Ilog sadtong Hulyo 29. Ginpasibangdan sila nga amu ang nagpatay kay Nacar Granada. Si Granada isa ka land grabber kag regular nga ahente sang 15th IB nga ginsilotan sang ASJC-NPA sadtong Enero 28.

Ang mga gindakop sang militar ang mga benipisyaryo sa duta sang mga Granada. Sa subong, gindetine ang walo ka mangunguma sa Ilog Police Station.

Ini nga mga hinimoan sang 15th IB nagpakita sa ila pagka-kontra-pumuluyo. Nagdugang ang perwisyo kag pag-antus sang pumuluyo ilabi na ang mangunguma sa pagsingki sang militarisasyon sa mga komunidad. Wala na iban sulbad sa naglungtad nga pasismo sang berdugo nga 15th IB kundi ang paglunsar sang pungsodnon demokratiko nga rebolusyon nga amu ang maghilway sa pumuluyo sa pagpamigos kag pagpanghimulos.